Sunday, December 17, 2017

ايش لازم يكون في مطبخي كـ نباتية Vegan .. نصائح و بدائل صحية تنفع للكل!

السلام عليكم ورحمة الله و بركاته 

بناء على طلبكم راح نتكلم عن ضروريات النباتيين في البلوق .. 
حنركز اليوم على وجبات الغداء و العشاء

فـ يلا بسم الله

بالنسبالي أول شي يجي في بالي لمن أسمع نباتيVegan  هي البقوليات لأنها المصدر الأساسي للبروتين عندنا.

أنصح انكم تبدئوا بالتدريج فيها لأنه تتلخبط المعدة 
لمن فجأة تستهلكوا بقوليات كثير 


دائماً أفضل انكم تاخدوا البقوليات النية و انتوا تسلقوها بنفسكم 
لانه المعلبة بتكون فيها مواد حافظة و نسبة ملح
لكن وقت الكسل تلاقوني أستعمل المعلب أمانة 
و حاولوا دائماً تقرئوا المكونات لكل شيئ تشتروه سواء نباتي أو غير نباتي
من البقوليات الي أحب أخليها جاهزة و أحطها على كل شي تقريباً

1- الحمص ( البليلة أوChickpea  )
2- الفاصوليا الحمراء ( Red Kidney Peas )
3- العدس الأصفر ( استعمالي الأساسي له هو للمعدوس )
4- العدس الأسود 
( استعمالي الأساسي له كبديل للحم المفروم في خلطة اللازانيا هـنـا )

غير البقوليات نجي للنشويات، 
طبعاً الخيارات مفتوحة بس لو تبوا شي صحي عندكم:

1- الكينوا 


بمختلف ألوانها، كلها معززة بالألياف و الحديد و المغنيسوم و بديل رائع للأرز
و أنصح تغسلوها زي الأرز قبل الطبخ عشان طعم المرارة يروح

2- الباستا المعدة بدقيق القمح الكامل   Whole Wheat Pasta 


الفرق بينها وبين الباستا العادية هو احتوائها على كمية كبيرة من فيتامين ب و الألياف و تساعد على انقاص الوزن كمان 

3- القرنبيط ( Cauliflower

ايوا لاتستغربوا بس هو بديل رائع للناس الي تبى تخفف نشويات في نمط غذائها
كل الي عليكم تسووه هو انكم تقطعوا القرنبيط لزهرات
 و تغسلوها و تحطوها في الخلاط الين تصير مفتتة وتاكلوها نية
 أو تقدروا تسلقوها أو تطبخوها عالبخار و تضيفوها لأي شي انتوا حابينه
4- الأرز الأسود أو المحرم ( Forbidden Rice


فيله كمية مهولة من مضادات الأكسدة المفيدة للجسم 
و معزز بالألياف والحديد و خالي من القلوتين ،
 تلاقوه في الدانوب وiHerb  بس لازم تغسلوه عشرومية مرة 
الين يبدأ لون الموية يصفى 
و أهم جزء في النظام الغذائي مهما كان نوعه هو الخضار و الفواكه
بالنسبالي في كزا حاجة مستحيل أستغنى عنها
 و لازم نجيب منها كل ماخلصت
1- الملوخية ( سواء المفرزنة أو الورقية ) 
 

فيها نسبة من البوتاسيوم و فيتامين ألف و الكالسيوم
 كمان و وجبة مشبعة فوق ماتتخيلوا
في ناس تسويها شوربة أو إيدام ،
 حسب رغبتكم و من الأكلات الي كل الناس المفروض تتعلمها حقيقي 
2- البامية ( Okra  )

كانت من الخضار الي مستحيل أحطها في فمي رغم اني ماقد جربتها،
 بس لمن ذقتها أتغيرت حياتي كلياً والله جداً لذيذة و لينة
أنا أسويها كـ إيدام مع الطماطم و شوية فلفل رومي كمان
فيها فيتامين سين و ألف و ب-6 و كمان مغنيسيوم 
3- السبانخ

فيها كمية بروتين و ألياف عالية و مصدر مهم لحمض الفوليك
نزلت طريقة إيدام السبانخ على قناتي ( هـنـا )
أو تقدروا تضيفوها لعصيراتكم أو عالباستا و السلطات 
4- الفلفل الرومي ( Bell Pepper )

 
فيله كمية فيتامين سين أعلى من البرتقال متخيلين! 
و يعطيكم فيتامين ب-6 و ألف!
تقدروا تحطوه مع الطبخات حقتكم سواء كنتوا تحبوه مسلوق أو ني 
( أفضل الني عشان تاخدوا كل الفوائد )
5- فاكهة الكاكا أو  Persimmons

 
الي يقول لي ماقدر أستغنى عن الشوكولاتة أقوله جرب دي الفاكهة
حقيقي ماعرف أوصف طعمها و هي مستوية، 
تمر على شوكولاتة على مانجو ، لازم تجربوها عشان تفهموني 
6- القرنبيط مرة تانية 
بس هنا استعماله حيكون بديل للدجاج. 
بعد ما أغسله و أقطعه زهرات صغيرة أحط له خلطة من راسي 
و أدخله الفرن الين يستوي ويصير لين شوية بعدين أضيف عليه 
خلطة صينية و يصير كانه دجاج صيني و يطلع جداً لذيذ
 وماتحسوا انكم بتاكلوا شي مختلف أبداً
 نجي لآخر فقرة حتفيدكم ان شاء الله ألا وهي 
البدائل النباتية للأشياء الغير نباتية

 
1- بديل كريمة الخفق في الطبخ هو حليب جوز الهند 
( أفضل المعلب من ماركة Freshly

لمن ينطبخ مايبان طعم جوز الهند أبداً بس يعطي كثافة و ثقل للقوام .. 
أستعملها في الريزوتو و الباستا الكريمية 
2- بديل للجبنة الحيوانية هو جبنة بالصويا أو الكاجو 
شخصياً حاولت أجرب أسويها مرة وحدة وفشل الموضوع
 فطلبت من دا الحساب و مرة عجبتني والله كانها جبنة عادية ( هـنـا )
3- بديل الحليب الحيواني هو حليب اللوز، الصويا، الأرز، الشوفان 
لو انتوا أول مرة تجربوا البديل الحليبي أنصح تبدئوا بـ حليب اللوز و الأرز بدون نكهات مضافة هم أكثر اثنين مالهم طعم عكس الصويا و البندق 
( أنصح بشركة Alpro و Rude Health و Bio Organic و Pure Harvest )
4- بديل البيض للفطور هو مكعبات التوفو 
أفضل تشتروا الي تجي في الثلاجات تلاقوها في المحلات الآسيوية 
و اختاروا الـ Soft Tofu تقدروا تفتتوه و تحطوه عالنار مع بهاراتكم المفضلة 
و صار Scrambled Eggs .. 
حلاة التوفو انه ماله طعم أبداً، يتشكل حسب طريقة طبخك له

5- بديل صلصة البشاميل 
البشاميل الأساسية فيها دقيق و زبدة و حليب حيواني
البديل هو دقيق زيت زيتون و حليب لوز أو أرز سادة 

6- بديل العسل 

Maple Syrup
Agave Nectar
Brown Rice Syrup

هادي كلها موجودة في الدانوب و مانويل و أونلاين  

تقريباً هادي أهم الحاجات الي حابة أشارككم هي حالياً
أنتظر آرائكم و اقتراحاتكم و قولوا لي لو حابين جزء ثاني 
و ممكن نعملها سلسلة (: 
ابقوا سُعداء
- بيانولا ~

Tuesday, November 21, 2017

تقييمي المفصل لجهاز تصفيف الشعر من دايسون | Dyson Supersonic Hair Dryer


 

السلام عليكم ..

كيف حالكم جميعاً؟ وحشتكم المدونة صح؟ 
مع الأسف من يوم مابدأ اليوتيوب و أنا مهملة المدونة
فحابة أنعنش الأمور شوية 

حنتكلم اليوم عن سشوار شعر أكتسح السوق الفترة الأخيرة من ماركة دايسون

الي يعرفني مزبوط يعرف قد ايش أنا انسانة كسولة فيما يخص الشعر 
ونادراً ما أسشوره و لا أدلعه مسكين
فقعد الجهاز عندي فترة طويلة بدون استعمال الين بدأت 
المناسبات تجي ورا بعض اضطريت أستحي على نفسي
فحتاخدوا التقييم من منظور وحدة كسولة تحب الشي السريع 
الي ماينكب شعرها لمن تعجز 

دايسون عادة معروفة بالمكانس الكهربائية 
و أشياء البيت فكونهم طلعوا شي للشعر بعد 5 سنين بحث، شي مثير للاهتمام

خلونا نبدأ بالأشياء التقنية عشان نفهم اش هرجته

فكرة سشوارهم انه الوحيد الي بيستعمل الـ Air Multiplier™ technology
تقنية الهواء المتعدد: تجمع الهواء وتطلقه بزاوية 20 درجة 
 على شكل طبقات أو دفعات مضاعفة
عشان يكون على وتيرة وحدة و سموذ



من الميزات المهمة الي فيله هي Intelligent heat control، 
فكرتها انه في sensor أو جزيئات حساسة تقيس درجة الحرارة 
حقت الرأس 20 كل ثانية وتنقلها لمعالج صغير 
يحدد المستوى الملائم للشعر عشان يتحكم في الحرارة 
و يحمي الشعر من الضرر! تخيلوا بس 

ومصمم انه ماتزيد حرارته عن 150 درجة مئوية
 و هي الدرجة القصوى المسموحة للشعر بدون تدميره 

في المقبض كمان في جزء مطاطي يخفف احساس الذبذبات
 و الصوت الصادر من المحرك أسفل فماتنزعجوا و انتوا ماسكينه 

طيب نجي دحين للملحقات حقت الجهاز و التفاصيل الحلوة 

الجهاز يجي معاه 3 رؤوس و سجادة للحماية من الانزلاق
 و كمان شريطة صغيرة لو حابة تعلقيه 

 


ميزة الرؤوس انها مغناطيسية يعني سهلة التركيب 
و تقدري تحركيها زي ماتبغي وماراح تحسي بالحرارة حقتها كمان

 
أول رأس و هو أكبر واحد مخصص للشعر الكيرلي المبروم 
يوزع اللفلفات وينشفها بدون ماينفش شعرك  ولا يخرب اللفة

 
ثاني رأس مخصص لتنشيف الشعر 

 
ثالث رأس مخصص للاستشوار أو الـ Blow drying 
أو حسب ماكل وحدة تسميه


نجي لاعدادات الجهاز 
عندكم 4 درجات حرارة عاليمين 
برودة مستمرة ، تنشيف لطيف ، 
تنشيف عادي ، تنشيف سريع و تسريح 


و عاليسار 3 درجات لسرعة الهواء 
تنشيف لطيف ، تنشيف عادي ، تنشيف سريع

و تحت زر التشغيل 
و تحته زر البرودة، كل ماتضغطي عليه يخرجلك هواء بارد

 الفلتر موجود أسفل المقبض
 يعني ماراح يطفشك و لايمسك الشعر كل شوية و تنظيفه سهل 
بس تلفي عند النقاط وتشيلي أي وساخة بمنشفة و تلفيه تاني 


طول السلك حوالي 270 متر يعني مناسب للصوالين
 أو اذا كهربتك بعيدة عن المراية مثلاً 

طيب نجي للجزء الي كلكم مستنينه من أول و هو تجربتي معاه 

 
أنا شعري ويفي ، يتجعد بسرعة لانه طويل ماشاء الله 

و غير كدا قلتلكم ماحب اني أسشور شعري و أزبطه ، 
خلاص أظفره و أمشي don't judge me lol

فلمن قررت أجربه ، أشتريت الفرشاة دي من الصيدلية 
أتوقع كانت الشركة ريفلون مو متأكدة 
بس عموماً جربت رأس التنشيف و الاستشوار بس
لأنه ماعندي أحد شعره كيرلي حقيقة xD

لمن كنت أروح الصالون من صغري أمانة بالراحة يقعدوا أقل شي ساعة
 مهما كان طول شعري ، يعني مرة كنت قاصته الين كتفي بالزبط ، 
قعدت فيا 50 دقيقة! و كنت دايماً أشوف الدخان 
و هو يطلع و ريحة الحرق من شعري التعيس

عموماً الي لاحظته انه ماهو ثقيل على اليد أبداً
 و ماتعبت من المسكة حقته عكس سشواري القديم الي يدور ( هـنـا ) 
و بالكثير أخلص شعري كله في 30 دقيقة بس متخيلين! 
هذا و أنا يعني ماخدة راحتي و كنت أقسمه تقسيمات صغيرة 
و كنت حاطة درجة 2 في الحرارة 

حقيقي مامزح كيف غير حياتي ، لاني مرة كنت أكره التعب الي يجيني
 و أنا أسشور شعري و الوقت الي يضيع و أحياناً بعد الغلب يطلع مو مزبوط
 ولا يفضل جزء مو ستريت و أسوي دراما 

غير كدا زمان كنت ألاحظ دايماً بعد الاستشوار انه بعض خصلات الشعر
 صارت مجعدة يعني أنحرقت وماتت مسكينة 
بس مع حق دايسون مرة ماكان في الشي دا ، 
ماعرف هل من نفس الجهاز
 ولا عشان ماصرت ألصق السشوار على الفروة 

لو كنتوا حتطلبوه أونلاين أو تشيلوه معاكم في التنقلات
 فالحلو في الصندوق انه في اسفنج يحمي المنتجات
 بحيث انها ماتطيح أو تنفعص و تنعدم 



أخيراً .. هل كلنا نحتاجه في حياتنا؟ 

تحتاجوه لو كنتِ من النوع الي لازم كل يوم سشوار 
و كل يوم تسريح و شعرك كيرلي و يتعبك 
أو لو كنتوا أكثر من بنت في البيت و راح تستعملوه سوا 
أو لو انتِ انسانة كسولة و تحبي شغل السريع الحلو
 و عندك ميزانية لتجربة شيء جديد 
فأنصح بيه و بقوة لأنه من جد حيغير الـ Game حقت تسريح الشعر حقتك 

سعره حوالي 1,500 ريال سعودي 
و موجود حصرياً في محلات سيفورا و موقعهم أونلاين

ان شاء الله تكونوا أستفدتوا من التدوينة يارب 
قولوا لي لو قد جربتوه أو أتحمستوا تجربوه 
ممكن أضيفه لـ Giveaway لو مهتمين (: 

ابقوا سُعداء ~