Monday, June 17, 2013

1st Mini Beauty Haul

السلام عليكم 

اليوم رحت أستعملت كوبون التخفيض الي من بودي شوب .. 

ماقدرت أستنى هههههههه

ماشتريت حاجات كتيرة ، بصراحة كان زحمة ماشا الله و ما أخدت راحتي

عموماً دي الغنيمة البسيطة حقتي


نبدأ من اليمين


فرشاة مشطوفة للآي-لاينر 

لاني بستعمل الجل لاينر حق ميبيلين و تتعبني الفرشة الي معاه لانها عايدية ماهي مايلة بس دي تسهل المهمة عليا

سعرها تقريبا 39 ريال أعتقد


كولونيا التوت الأحمر الجديدة ، قلت لنفسي بس راح أشم الريحة 

لكن الريحة دووووختني و سكرتني و ما قدرت أقاوم هههههههه

ريحتها زي الحلاااااوة ، عارفين حلاوة التوت حقت هولز ؟

بنت عمها بالتمااااام 

فمرة حبيتها و أخدتها 

سعرها الأصلي بـ 69


كريم الليل بالصبار للبشرة الحساسة

كنت بدور على منتج للعناية الليلة للوجه بسعر معقول 

فصادفني دا فقلت أجربه ، مع انه كنت أفضل آخد أولاي الي بالكولاجين بس مالقيته مع الأسف

فنعطي الصبار فرصة (:

و الحلو فيه انه بدون زيوت أو مواد عطرية

سعره بـ 80 ريال


كريم مرطب للنهار بدرجة حماية 15

ماهي درجة عالية طبعاً للحماية ، نقدر نقول حق بيت أو صباح 

كنت بدور على كريم مرطب للوجه لان الكريم حق فيتامين إي خلص من عندي و أبى شي جديد

و برضوا بالصبار للبشرة الحساسة

بـ 80 ريال

و بس هو دا الي أشتريته

في عاملين عروض حلوة 

الأرواج صارت بـ 29 بعد ما كانت بـ 58 ريال

و الآنتي باكتيريا ، أشتري واحد و التاني بنص السعر

الليب جلوس الجديدة ، أشتري 2 و التالت مجاناً ، سعر الواحد بـ 59 ريال

و في على بعض المنتجات ، أشتري واحد و خدي التاني مجاناً

فعاملين حاجات مرة حلوة ، لا تفوتكم خصوصاً داخلين على رمضان و العيد بازن الله

(: 

و بعدين عديت على محل إيف روشيه

و لقيت عندهم أقرب حاجة للفلفي برش الي أباها !!


ما تتخيلوا قد ايش حست عليها ! هههههههه

أنا متأكدة انه كان ممكن ألاقيها في ماك أو سيفورا ، بس ماكنت مستعدة أدفع 140 ولا 110 على فرشاة

هادي أخدتها بـ 39 ريال

و يارب تزبط معايا بس

و هادا كان ملخص لمشتريات اليوم :)

ابقوا سُعداء

- بيانولا







2 comments:

  1. بالعكس فرشة ميبلين جميلة وسهله
    اول ما اشتريتوا اعتمدت على كلام البنات انو مو حلوة
    مره قلت خليني اجربها طلعت شي جميل افضل بالنسبة لي من المشطوبة

    ReplyDelete
  2. هي مسألة تعود و اتقان بس بغض النظر عن الأداة (:

    أنا عشان كابوسي المكياجي ، الكات آيز هههههه

    شرفتيني (: ~

    ReplyDelete