Thursday, September 26, 2013

كيف أطور لغتي الإنجليزية ؟

 
السلام عليكم

سوو بوست اليوم مختلف حبتين عن العادة

حتكلم عن اللغة الانجليزية و كيف تقدروا تصقلوها من خلال الكتب

يلا بسم الله ؟

بدايةً لازم تقنعوا نفسكم ان تعلم اللغات حاجة جداً سهلة ، 
خصوصاً الانجليزية لأنه كلنا بنلاقيها في أيامنا و لو لشيء بسيط
و ضروري تبعدوا عن بالكم الأفكار السلبية و كلام الناس المحبط
كلنا نقدر ، لأنه الي نجحوا أبداً مو أحسن مننا
كلنا لنا قدرات خاصة ، المهم نعرفها و نوظفها صح (:

تاني حاجة حقولكم اش الأساسيات الي لازم تكون معاكم:

 - قاموس عربي إنجليزي + إنجليزي إنجليزي
الأول عشان يعرفكم بالمعاني
و التاني عشان يثبتها باللغة الأصلية
و الأفضل هو قاموس أوكسفورد 


- نوت بوك ، دفتر صغير ، أو حتى ورق أصفر مربعات



- أقلام ملونة 



بعد كدا حقولكم على حركة حلوة و حتتحمسوا لها
كل يوم أكتبوا كلمة جديدة أو كلمتين مع معناها باللغتين و حطوها في جملة
و لمن تصحوا و قبل لا تناموا شيكوا عليهم و حترسخ في بالكم ان شا الله
دي من أسهل الطرق لتعلم الفوكابلري " الكلمات "

غير كدا ، ضروري كمان تقووا القواعد عندكم " الجرامر " ، 
في عندي كزا ملف شارحين فيله القواعد و كمان أساسيات اللغة  
جداً مفيدين وان شا الله حينفعوكم كتير


كدا نقول خلصنا الأساسيات
نجي لخطوات متقدمة ، الي هي القراءة و الاستماع

بالنسبة للقراءة ، فهي طريقة مهمة للتعلم لأنها بتنمي حاسة البصر 
و تقبلها للكلمات الجديدة و الغريبة 
و طلاقة اللسان لو كنتوا من النوع الي يردد بصوت عالي 
و ازا في كتب تجي معاها CDs ، يكون الكتاب فيها بصيغة صوتية
أو في تمارين مختصة بمحتوى الكتاب
حينفعكم كتير (:

اش تقرأوا؟ 
لو تحبوا الروايات، أقرأوا الروايات العالمية الي تجيكم باللغتين
صح الكلاسيكيات صعبة لغتها لكن الروايات المترجمة من [ دار البحار ] مثلاً ، يستعملوا إنجليزية مبسطة 

مو شرط تلتزموا بروايات ، 
كتب تطوير الذات كمان لغوياتها حلوة و تلصق بسرعة 
كتب عن الإسلام كمان أحلى و أحلى ..
منها تتعلموا إنجليزي و منها تتعلموا حاجات جديدة عن الدين

و هادي مجموعة منوعة أنصحكم بيها لأنه لغتها سهلة و سلسلة








و طبعاً خلوا جنبكم القاموس و الدفتر ، أي كلمة جديدة سجلوها و دوروا عليها 
في خيارات تانية كتير ، بس دي من الكتب المشهورة الي ان شا الله حتناسب أزواقكم المختلفة
و لكم حرية الاختيار في الكتاب الي يريحكم

في معلومة معينة متعلقة بعلم الطاقة ،
دحين الي يقرؤا، يخلوا دايماً كتاب خفيف جنب السرير يتسلوا عليه قبل النوم
و دايماً ينصحوا بكتب تطوير أو محفزات أو شي إيجابي، خصوصاً القرآن
الفكرة انه لمن الواحد ينام ، 
الكتاب الي جنبه بيرسل طاقة تؤثر عالدماغ حسب فكرة الكتاب ..
أنا أكتشفت الشي دا قريب و كان فعلاً الكلام صحيح بدون ما أدري !

ماحقولكم ألتزموا بيها و كلامي مليون بالمية صح ، 
لكن بقولكم جربوها وشوفوا (:

كدا أنهي بوست اليوم .. 
ما حبيت أتقل كتير عليكم مع انه عندي زرلومية فكرة و كتاب أبى أقولها لوول

في بالي أسوي بوست بكيفية التعلم حسب نمط شخصياتكم
من حيث كونها [ سمعية ، بصرية ، حسية ]
اش رايكم بكدا ؟

المهم يارب تكونوا أنبسطتوا و أستفدتوا 
و أي سؤال ، آكاونتي عالآسك مفتوح 
أي تعليقات و آراء ، الله يحييكم في قسم التعليقات أسفل أو عالتويتر 
كل حساباتي تقع تحت اسم Bayanola92
و الروابط موجودة في أعلى الصفحة ، تحت اسم المدونة على طول

كلمة بسيطة لكل قارئ مر من هنا:

شكراً لثقتكم في بيان ، و شكراً لأنكم تسعدوها بتفاعلكم معاها ، 
انتوا فعلاً نعمة كبيرة عليا و الله يديمها يارب (: .. الحمدلله
ربنا يسعدكم كلكم و يرضى عنكم <3

ابقوا سُعداء

- بيانولا ~

6 comments:

  1. جميل جداً انا قرات نساء صغيرات من زمان ومخططة اشتري اخر كتاب طرحتيه
    The7 habits of highly EFFECTIVE PEOPLE
    انتظر بوست التعلم حسب نمط الشخصية موضوع شيق وممتع وراح يفيد ناس كثير

    ReplyDelete
  2. فعلا لمن تقرئي شي قبل لا تنامي تنحفظ في مخك انا قد جربتها قرئت مره قصيده بس مو مره وحده لا تقريبا خمسه مرات نمت وصحيت وانا حافضتها صم ، اي شي حابه تحفظي اقرئي قبل لا تنامني بس مو اي كلام يعني تكوني مركزه معا حتى مره تنفع للاختبارات والمذاكره ، بس بوست جميل ومفيد وراح اجرب كم كتاب عجبوني

    ReplyDelete
  3. This comment has been removed by the author.

    ReplyDelete
  4. نا مرة مقتنعة بكلامك .. لانه الانجليزي اسهل من العربي بمراحل!
    لو كل يوم الانسان خصص لنفسة صفحة يقرأها ويتعلم كلمات جديدة .. بعد سنة هيلاقي حصيلة اللغوية مرة ارتفعت..

    شكرا على التدوينة الجميلة :))

    ReplyDelete
  5. شكرا مرة 3> ء افدتينا

    ReplyDelete
  6. فعلا فكرة جميلة و لو تكملي دي السلسلة من الموضوع حيكون شي حلو

    ReplyDelete