Monday, February 10, 2014

الشراء عن طريق الإنترنت 101




السلام عليكم

أول شي أحب أزكركم انه القيف آواي راح يقفل بعد 4 أيام ان شا الله
فاللي ماسجل، يروح للتدوينة الي قبل دي و يقرأها (:

المهم تدوينة اليوم خفيفة وان شا الله حتفيدكم

الحلم و الكابوس لمعظم بنات جيلنا " الشراء عن طريق الانترنت " 
*صوت رعد* لوول

كلنا نشوف منتجات أو ملابس أو حتى خدمات أونلاين و نفسنا نجربها 
أو نقتنيها لكن نخاف من صعوبة الإجراءات أو قلة الأمن

أحب أقولكم إني أكبر انسانة خوافة في الحكاية دي 
و أتغلبت على خوفي حمدلله في شهر نوفمبر 2013 
* تصفيق و لمبات ديسكو * xD

يكفي هروج يلا نبدأ بسم الله

اش أحتاج ؟

طبعاً إما ماستر كارد أو فيزا مسبقين الدفع

*مسبقة الدفع يعني تكون فاضية و انتوا تشحنوها بالمبلغ الي تبوه 
وقت الحاجة و دا أحسن نوع

اش البنوك المشهورة بالخدمة دي ؟

- الإنماء * الي أنا بستعمله *
- الراجحي
- الأهلي
 * في كمان سامبا والبلاد بس ماعندي معلومات كافية *
اش ميزات و عيوب كل بنك ؟
 طبعاً كل بنك يشترط انه يكون عندكم حساب فيله

 الإنــمــاء:

- بدون رسوم اشتراك
- بطاقة الصراف هي نفسها بطاقة الفيزا
- تستلموا البطاقة في نفس يوم فتح الحساب
- سعر صرف الدولار ثابت و هو 3.75 ريال
- ماياخدوا عمولة على الشراء
- لو الحساب فيله 0 ريال ، الحساب مايتجمد 
- تقدروا تفعلوا و تقفلوا خاصية الشراء عن طريق الانترنت لضمان أكثر
- في محلات تجارية معينة تقدروا تاخدوا منها تخفيض لو حاسبتوا بالبطاقة
زي آنوش و دايت سنتر

بالنسبة لـ عيوبها ، 
أنا ماشوفها عيوووووب لكن ممكن تكون مهمة عند غيري:

- لانه أنا مو موظفة لسى فأقصى حد للشراء في اليوم الواحد هو 3000 ريال
- المبالغ المحجوزة تاخد شهر
- قلة الفروع
- لمن تحولوا لحساب برا البنك بيحسبوا 3 أو 7 ريال زيادة

الــراجــحـــي:

- رسوم 100 ريال سنوياً
- سعر الصرف 3.79 ريال
- اصدار الفيزا في نفس يوم الطلب
- المبالغ المحجوزة ترجع خلال 5 أيام
- لمن تسحبوا من صراف الراجحي بياخدوا 12-16 ريال 
و لو بنك تاني فـ 26 ريال تقريباً

 ماستر كارد الأهـــلــي:

- 100 ريال اصدار و 100 ريال رسوم سنوية
- سعر الصرف 3.80 أو 3.85 ريال
- إصدار البطاقة خلال أسبوع إلى 14 يوم
- لو سحبتوا من البطاقة كاش برا البلد فياخدوا عمولة 30 ريال
- المبالغ المحجوزة تاخد شهر أو 45 يوم

اش الشروط عشان أفتح حساب أو أطلع بطاقة؟

- تكونوا أكبر من 18 سنة
- معاكم بطاقة الأحوال أو اثبات الهوية 

الشراء و الشحن:

طبعاً البيانات المطلوبة الي تعبوها لازم تطابق الموجودة 
على البطاقة حقت الشراء ، الاسم بالرقم بالتاريخ

و بالنسبة للشحن معروف انه نص المواقع الجبارة ماتشحن للسعودية 
*فيس يبكي في الزاوية* 

بس في طبعاً خيار انكم تفتحوا بريد في أمريكا بمبلغ بسيط 
و يصير تشحنوا الأغراض عليه و بعدين منه على بلدكم

من فين أفتح بريد أمريكي؟

- آرامكس عندهم خدمة شوب آند شيب

تدفعوا مرة وحدة 130 ريال
و قيمة الكيلو بـ 100 ريال
مدة الشحن من أسبوع إلى 14 يوم

بس مشكلتها انه ماعندهم خاصية تجميع الشحنات ، 
يعني مسلاً انتوا أشتريتوا من 3 مواقع مختلفة ، 
أول موقع رسل شحنته خلاص يقوم آرامكس على طول يشحنها على بلدكم
- موقع وورلد شيب *الي أستعمله*

عندهم نوعين ، الأساسي و المميز 
" الفارق في السعر و خدمات تانية بسيطة "
- اشتراك مرة وحدة بـ 24 دولار تقريباً
- عنده خاصية تجميع الشحنات
- يحسبوا سعر الشحن بالأبعاد حقت الصندوق مو بالوزن زي آرامكس
- الشحنات تجلس في البريد مدة 45 يوم


عندهم أكتر من خدمة و الأفضل هي البريميوم

- رسوم إنشاء بـ 20 دولار
- اشتراك سنوي 50 دولار أو شهري بقيمة 7 دولار 
- عنده خاصية تجميع الشحنات
- تقدروا تضيفوا 3 أسماء إضافية للحساب لو تبوا تشحنوا لأحد تاني وكدا
- الباوند الواحد يكلف 36 دولار

* لو كنتوا ماتشتروا كتير فالبيسك أحسن لكم 
لأنه أرخص و بدون اشتراك بس مافيله تجميع شحنات *


- الاشتراك مجاني
- قيمة الكيلو بـ 50 ريال في معظم البلدان ماعدا الصين بـ 100
- ماعنده خاصية تجميع الشحنات
- مدة الشحن من أسبوع إلى شهرين

اش المواقع الي أقدر أشتري منها؟

أنا انسانة تقدس آمازون ، أي شي محتاجته تقريباً بلاقيه عندهم

بس عموماً المواقع المشهورة والمضمونة ماعندكم مشاكل معاها ان شا الله

أحسن موقع الي فيله تشكيلة مكياج و منتجات عناية و كدا هو [ DrugStore ]

دا يجمع بين موقعين ، موقع منتجات رخيصة و موقع منتجات غالية

و في مواقع تشحن للسعودية زي مثلاً


العملات:

أغلب المواقع تتعامل بالدولار الأمريكي [ $ ] الي يعادل 3.75 ريال سعودي تقريباً

في مواقع تتعامل باليورو [ ] يعادل 4.75 ريال سعودي

و مواقع تانية تتعامل بالباوند أو الجنيه الإسترليني [ £
يعادل 6 أو 7 ريال سعودي

تسهيلاً عليكم ، 
تقدروا تنسخوا المبلغ و العملة و تطلعوا لمستر قووقل و تكتبوا كدا:

10 £ to dollars 
20 Euros to SR

و تطلعلكم الحسبة بكل سهولة ان شا الله 
 
تجاربي:


عملية جداً سلسة و سهلة و كل شوية يرسلوا لي إيميل بالتحديثات حقت الشحنة


موقعي المفضل لو كنت مستعجلة وأبى جزمة الله يكرمكم أو قطعة ملابس ماني محصلتها

عندهم تشكيلة كبيرة و حلوة ، بس لو يخففوا قيمة الشحن شوية


ماشا الله خدمتهم سريعة و حلوة 


برضوا ماشا الله سريعين و مرتبين في الشحنات حقتهم


حسبي الله نشفوا دمي ههههه
سحبوا مبلغ من حسابي و قالوا لي ترى العملية فشلت
و قعد المبلغ محجوز مدة شهر بعدين رجعلي حمدلله

موقع سيفورا نفس المشكلة الهبلة ماعرف ليش

قريب ان شا الله راح أشتري من كزا موقع و أهمها هو
iHerb.com
بس أبى أتناقش أول مع الدكتور حقي عن الفيتامينات الي أحتاجها
و كمان أشوف اش الي ممنوع شحنه
عشان فلوسي لا ترسم لنفسها أجنحة لوول

ما أقتنعت بالكلام دا، أبغى خطة بديلة للشراء ، أتصرفي يا بيان :p

في حال كونكم متخوفين أو مستصعبين الفكرة ، 
في حسابات و مواقع توفر خدمة الشراء بدالكم
يعني تعطوهم روابط للحاجات الي تبوها و هم يحسبوا لكم التكلفة 
و يشتروها عنكم 

أنا ماقد جربتها بصراحة لكن هادي الي عليها مدح:




و بكدا خلصنا تدوينة اليوم

أتمنى تكون فادتكم و عجبتكم

و ازا حابين إني أسوي تدوينة تانية عن طريقة الشراء 
من آمازون أو آي-هيرب أو أي موقع تاني 
قولوا لي في قسم التعليقات أسفل أو عالتويتر
@Bayanola92

أي سؤال فأنا موجودة عالآسك بنفس اليوزر 

و روابط التواصل موجودة على يمين الصفحة فوق

ابقوا سُعداء

- بيانولا

7 comments:

  1. شكرا حبيبتي على الموضوع الرائع
    حبيت مواقع الكتب
    حبيت اسأل شو فايدة تجميع الشحنات؟؟؟؟

    ReplyDelete
    Replies
    1. فايدتها انه راح تقل عليكي قيمة الشحن من أمريكا إلى بلدك ، مثلاً بدل مايشحن قطعة وحدة بـ 100 ، راح يشحن لك 5 قطع بـ 100 و هكذا

      ^ــ^

      Delete
  2. يالله افدتيني كثييير وين مدونتك عني جميله بحد السماء الله يسعدك ع هالتعب واضح ومفهوم وسلس

    ReplyDelete
    Replies
    1. آمين يارب ويسعدك ان شا الله
      شكراً على كلامك اللطيف <3

      Delete
  3. حبيبي ابا اسألك قدرتي تشتري من موقع التا بدون مايكون عندك فيزا أمريكية.. شكرا مقدما

    ReplyDelete
    Replies
    1. جربت أشتري منهم بس مع الأسف ماقبلوا العملية .. الفلوس قعدت محجوزة عندهم 30 يوم وبعدين رجعوها تاني لحسابي

      Delete
  4. حبيبتي شكراً مره على التدوينة افادتني
    حبيت اسأل لو طلبت من موقع امازون حاجات كثيره زي واشي تيبز واقلام وخرابيط ثانيه احتاج تجميع شحنات ولا؟
    اخاف اذا ماسويتها تجي كل وحد لحالها وادفع لكل شي منهم مبلغ
    فزبده السؤال اذا بطلب من امازون (لوحده) احتاج استخدم تجميع الشحنات ولا لا؟
    وشكراً مقدما

    ReplyDelete