Monday, April 28, 2014

دليل بيانولا التسوقي في اسطنبول

لسلام عليكم

سوو تدوينة اليوم حتكون جولة لأهم المناطق الي رحتها في اسطنبول 

سفرتي كانت لغرض الشراء

فمارح تشوفوا متاحف ولا معالم هههههه
 
* الصور الي بدون اسمي معناها من النت *

يلا نبدأ بسم الله

أول شي عندكم ٤ خيارات للتنقل 
* بترتيب الأرخص * 

- المترو و الترام
- الباصات
- التاكسي
- السيارات الخاصة

الي أستعملتها أكتر شي كانت الأولى 

تتنقلوا بين المحطات بعملة اسمها " جيتون
تنباع في نفس المحطات سعرها ٣ ليرة للوحدة

أغلب العرب ينزلوا في منطقة اسمها " تقسيم
لانها هي المنطقة الحية في اسطنبول ، 
أتخيلوا التايمز سكوير في نيويورك ، نفس الفكرة تقريباً

أنا نزلت في منطقة أروق اسمها " دورت ليفينت
هي مخصصة أكتر شي لرجال الأعمال و الناس السناقل فعشان كدا هادية شوية 

الفندق كان اسمه " موفنبيك " قريب من محطة المترو و من مول اسمه سافاير 
 
 

* لا يغركم شكل المول ، ترى من جوا حق مشي حالك مررررة *

أهم الأماكن للتسوق:

طبعاً في آوت لتس كتيرة ، 
أنا مامداني أروحها لانها بعيدة بس هادي الي كان عليها مدح
 
- أوليفيوم
- Istanbul Power 212
- ArmoniPark

بعد كدا عندكم أهم منطقة شعبية اسمها إمينونو ، 
في سوق كبير جامع حاجات كتير ، أواني، أقمشة، جزم، شنط، 
ملابس ، اكسسوارات، حلويات و أي حاجة نفسكم فيها

طبعاً مستحيل تخلصوه في يوم ، 
يباله روقان و استكنان و نفس طاااااوووويييييل و هادي صور منه
 






 
أحسن محل تشتروا منه الحلقوم والكستنا هو هازير بابا ، 
تحديداً روحوا لواحد عربي اسمه نور الدين ، 
رح يزبطكم و يساعدكم كتير ان شا الله
 * موجود في الصورة أسفل ، لابس نظارات طبية وشعره أسود عاليمين *
* ابحث مع بيانولا * :P

و كمان عند المحل دا، مسك الغزال .. ريحته تدوووخ
أبداً مو زي الي عندنا ، هادا كدا كثيف و ريحته مرة حلوة x)

اوه و كمان لو طلبيتكم كبيرة ، 
رح يحطوها في شنط مرتبة و يوصلوها إلى مقر السكن حقكم



تاني منطقة كبيرة مهمة هي " عثمان بيه
مكان كاااااابييييير للملابس ، بس أغلب المحلات بالجملة ، لكن تنفع للي حابة تفتح بزنس أو عيلتها كبيرة ماشا الله لانه الاسعار مرة حلوة .. 
بس انتبهوا فين تروحوا و فين تجوا لانه في أماكن كلها بدلات رجالي 
و أماكن تانية بس نسائي و كدا فانتوا اسألوا قبل لاتتوهوا 

و دي صور للمنطقة 
 







 
تالت منطقة هي " تقسيم
* هناك المحل حق كلينيك الي نزلته في الانستا *

المنطقة عموماً مرة حلوة و ممتعة في الجو البارد تتمشوا 
و تشتروا من المحلات أو تجلسوا في التراس 
حق المطاعم مع كوب سحلب ياسلااام 
 






 
من الحاجات المهمة الي لازم تدوقوها في تركيا
هي الكستناء * أبو فروة *
 

و طبعاً المانتي " المنتو الصغير " .. 
للناس الأرقى فهي نفس فكرة التورتليني :p
 
 
في محل حق ملابس أنصحكم تروحوه ، 
عنده ملابس كدا غريبة شوية 
وحقت حفلات وجمعات بنات اسمه " Kiki Riki" 

خلوا بالكم من أغراضكم لانه هناك الشحاتين كتير 
و لو أعطيتوا واحد، قبيلة رح تحوم حواليكم

خلصنا من الشعبيات نروح للحاجات المكيفة هههههه

أهم مولات اسطنبول:

أول واحد طبعاً جواهر مول ، 
أكبر مول عندهم تروحوه بالمترو لمحطة " شيشلي
و لمن تخرجوا منها تمشوا شوية وحتلاقوه عاليسار مايضيع
 

فيله محلات كتير ، ماركات عالمية ومحلية ودورين كاملة بس مطاعم 

و أهم شي انه عندهم صيدليتين تجميل 
وحدة اسمها واتسون و التانية جراتيس
 
 
عندهم قدام جراتيس في الدور الأرضي 
كشك لوحدة خطاطة ترسملكم وتعملكم كتابات 
على أي حاجة تبغوها و أسعارها معقولة جداً 
 

بعد كدا عندكم مترو سيتي
 
 

هادا برضوا كبير وفخم وفيله سيفورا 
تروحوه بالمترو لمحطة " ليفينت

و جمب المول دا في مول تاني اسمه كانيون مول
لو تتزكروا في الانستا نزلت صورة له وقلتلكم ان نصه مكشوف ونصه مغطى

مرة رايق وهادي و فيله مطاعم فخمة في آخر دور
 
 
 
و فيله محل يبيع حاجات غريبة و فلاوية في الدور الأخير
 
 
في كمان استينيا بارك 
 
 
ماركات فخمة زي شانيل و كيت سبيد وكدا
وعندهم سيفورا كمان 

هادا بالنسبة للأماكن الي رحتها 
في مولات حلوة كمان زي:

- أستوريا مول


- بياكا


طيب نجي لآخر حاجة وهي موضوع الماركات المهمة 

كمكياج فأنا أنصحكم بقولدن روز، باستيل و آن فليكس 
و ذا بام لانه دي المنتجات ماتلاقوها في السعودية عندنا 
ورخيصة نسبياً كمان و بعد كدا شوفوا الماركات الي عندنا زيها 
زي ميبلين، ايسنس، لوريال .. 
لانه ترى عندهم منتجات مرة ماهي عندنا ماعرف ليش /: 

كملابس روحوا فروع كوتون و إل سي وايكيكي 
لأنه بضاعتهم أكتر و أحلى من الي يجيبوها عندنا 

و بس هو دا كله الي أبى أقوله لكم لو ناوين تزوروا اسطنبول قريب ، 
أتمنى تكونوا أستفدتوا 

أي استفسار أنا موجودة عالكيك أو الآسك
و لو حابين تتابعوني عالتويتر أو الانستا فتشرفوني

@Bayanola92 

ابقوا سُعداء

- بيانولا

2 comments:

  1. كنت حنزل بوست كده انا في تلاته سنوات الاخيره اكثر تقضيتي من تركيا واسطنبول خصوصي
    حتى جهازي كان كامل من اسطنبول لاني قيدي عرفت السوق
    المحل الي قلتي عليه دا بشارع تقسيم وحاجاتو مره تعجبني
    افتكر اخر مره رحت كان ديكور المحل حق ساحرات وكدا بابا قال ايش دا المحل يحسبو حق حاجات تنكريه lool
    في شارع اسمو شارع بغداد وله اسم ثاني شارع مره راقي
    كلو ماركات العالميه من شانيل برادا لويس فيتون وماركات الصراحة ماعرفتها
    بس واضح انها كل من الهاي ايند

    الي يعجبني بتسوق هناك انو في ماركات تركيه مرره راقيه وشي محترم
    زي ايبيكول و في باراك وكمان machka
    دا محل ماما المفضل :p

    بس محلاتهم مكرره نفس الماركات تلاقيها بكل المولات والشوارع بس بعض الاحيان البضاعه تختلف
    اهم كم مول
    metro city
    istunbul fourn
    istiny park
    carol mole
    بنسبه لجواهر ماحبيتو مره :$

    شوقتيني لاسطنبول تاني نفسي ارجع البلد الي ماتنمل :(

    ReplyDelete
  2. اعطيني لو سمحتي اسم محل يبيع مكياج ان وأي اكس و وين بالضبط باسطنبول

    ReplyDelete