Thursday, May 8, 2014

تحدي 100 كتاب - الجزء الثاني


 
السلام عليكم 

مرت شهرين تانية من ٢٠١٤ ،
دي المرة كانت سريعة بالنسبالي 

الي ماشاف الجزء الأول يضغط ( هـــنـــا
عشان تعرفوا حكاية " #تحدي_100_كتاب "

في شهر مارس قرأت ١٠ كتب حمدلله 
و في أبريل مع الأسف بس ٤ .. 
آبريل كان شهر مزحوم و جديد كلياَ بالنسبالي 

المهم بسم الله نبدأ

١- بنات البَبِي 
لاء ماهي البي بي .. فتح الباء الأولى وكسر التانية
معناها العرق الي في القلب المختص بالرقة

الكتاب عبارة عن دواوين شعرية ..
أنا أبداً ماني من متذوقي الشعر و النثريات دي 
بس أخدت الكتاب عشان الكاتب كانت روحه حلوة في حفل التوقيع 

بالنسبالي الأسلوب كان بارد ومكرر و خال من المشاعر في الكتابة 

الشي الغريب في الكتاب انه مترجم للغة الروسية و التركية .. 
ماعرف ليش xD 

١/٥

٢- ثمانون عاماً في انتظار الموت
* و ياريت جا الموت لبطل الرواية * 

القصة هي انه شخص نموه متوقف عند ١٨ سنة 
بالرغم من انه أصلاً هو عمره  ٤٠ سنة!

فيوريكم كيف يحاول يتحايل عالقانون و كيف انه بيعيش 
و فجأة يصير حدث غريب و " آكشني " .. 
الحوار و الأحداث كانت حقت مراهقين بالنسبالي .. 
يعني مرة بسيط و مرة سطحي و ساذج لدرجة 
انه كنت متوقعة انه السطر الجي حيكون فيه 
( و قام بالإستيقاظ فجأة ليجد نفسه محاطاً بأولاده الخمسة ) !! 

٢/٥

٣- مصاصو دماء العواطف
كتاب بيتكلم عن الأشخاص الي يستهلكوا مخزوننا العاطفي 
و يسيبونا جافين و منهكين و متعبين نفسياً 
أخدته بناءاً على نصيحة و ماندمت 

صح فيله أجزاء مملة شوية بس بشكل عام الكلام الي يقوله 
والشخصيات الي حددها فعلاً نواجهها في حياتنا اليومية وبكثرة!! 

٣/٥ 

٤- أنا عشقت 


 رواية فكرتها غريبة شوية .. 
تتكلم عن بنت تتصلب في محطة قطار بعد ما خطيبها يسافر و يسيبها 
فالمحقق يحاول يوصل للخطيب لعل و عسى تفك هي و ترجع للحياة
فيمر بأحداث كتيرة و مخيفة و " مقززة " 

الرواية كان ممكن تكون حاجة جبارة لو تم التغاضي عن المواقف 
" الي ماينفع تنقال في العلن " 
شخصياً أنا أشوف انها ماتزود شي على القصة /: .. 
أنا أشيل هم الصغار الي يقرئوها بصراحة

1/5

5- مابعد ذلك
ماحتكلم كتير فيها لأنه كتبت عنها في الانستا

رواية مبتذلة رومانسية زي بقية الكتب الي تكون موجهة للمراهقات 
عشان تخليهم يحلموا و يفكروا و يثبتوا في أدمغتهم 
انه الاناث ضعاف و ماهمهم إلا انهم يلاقوا 
" الفارس الأشقر أبو حصان " .. جداً مستفزة

1/5

6- تارتاروس
رواية بفكرة مضحكة بالنسبالي

اتنين بيتكلموا عالتلفون و الولد بيحاول يرجع العلاقة زي ماكانت 
فطول الكتاب وهو يشعر و يتفلسف و هي تصد و تزيده فلسفة و مأساوية

مافيها شي مميز أبداً بصراحة

1/5

7- الجزار
رواية بطابع دموي عنيف جداً

تتكلم عن واحد يخسر عيلته و كل مايملك ظلماً
فيقرر انه ينتقم من الي ظلموه و قتلوا كل شي مهم في حياته

رواية مسلية بحكم انها تنمي الجانب المظلم حقي :$

بس أنا نفسي أتقززت شوية .. الوصف ماكان مزبوط .. 
الوصف المفروض يخليكم تتخيلوا انكم عايشين اللحظة
بس الي خلاني أحس بيه هو القرف شوية 
لأنه الأسلوب كان سطحي و ساذج حبتين

3/5

8- لأنها تقرأ


فرحت لمن جاتني موقعة من الكاتب نفسه 
أيام معرض الكتاب في الرياض

بس جاني اكتئاب شديد من المحتوى .. !

فارغ جداً ومافيله حيوية و مليئ بالأخطاء الاملائية 

1/5

9- البرمجة اللغوية العصبية 


كتبت تغريدات عن الكتاب دا في هاشتاق " جلسة_تطويرية "
كتاب مرة جميل و مفيد ، كعادة كتب الفقي الله يرحمه

4/5

10- عفريت من الجن 
رواية تتكلم عن واحد يطلع له عفريت يحقق له أمنية نفسه فيها
و بعدها تدخل الشخصية في صراع مع الذات و الضمير 

الي عجبني هو مغزى القصة الي وضح في النهاية 

2/5

- - - - 

كتب آبريل .. 4 كتب يتيمة xD

1- نزهة حرف

كتاب نثري فيله عدة مواضيع من الثقافة العامة للدين للحضارات

حلو و متنوع و مفيد للي يبوا يطوروا من أنفسهم بشكل خفيف وسريع

بس بالنسبالي حسيت بتشتت شوية من كترة المواضيع

2/5

2- أقوم قيلاً
من الكتب الي سوت ضجة كبيرة أول ماطلعت

و هو حلو يعني ما أنكر .. 
زي ماقلت في الانستا انه خلاني أفكر في حاجات كتير أنا جاهلتها في ديني

في البداية كان مشوق جداً و عالنهاية صار ممل شوية و كله حشو 

3/5

3- شرفة العار
رواية تتكلم عن الشرف و مدى أهميته للشخص 
و قد ايش الناس ممكن تسوي المستحيل 
عشان تنظف اسمها و عيلتها من العار

قد تكون شوية مكررة كفكرة .. 
بس كأسلوب كانت ممتعة و مؤثرة

كرهت النهاية بصراحة .. 
كانت مستفزة و واضحة xD

3/5

4- Beautiful Disaster


رواية لها 3 أجزاء منفصلة عن بعض شوية 

تتكلم عن البنت المثالية الهادية الي تلبس وردي و عقود لؤلؤ 
و كيف الولد المشاكس العنيف طيب القلب 
يحاول يخليها تحبه و الكلام الفاضي دا :p

بيني وبينكم عجبتني كأسلوب بس مو كقصة 
لأنه في أحداث حسيت انه " اش دا؟ هي القصة خيال علمي!!؟ "

مافيها شي مميز يخليني أنصحكم بيها

بس في نفس الوقت حلوة لو تبوا تقضوا وقت 
في شي مسلي و مكرر بشكل ممتع

3/5

و هي دي كانت خلاصة الشهرين الي فاتوا

ان شا الله الشهرين الجية رح يكونوا أحسن من كدا ، سووا دعا بس xD

 شاركوني الكتب الي قرأتوها عالتويتر 
أو الانستا أو في قسم التعليقات أسفل
وسائل التواصل معايا موجودة في أعلى الصفحة عاليمين
و كلها تحت مسمى Bayanola92

ابقوا سُعداء

- بيانولا ~

4 comments:

  1. ما شاءالله عليكي يا بيان.. دائما تبهريني.. الله يديكي العافية على الملخص السريع والخفيف. بالنسبة لي انا لو خلصت كتابين في شهر كويس.. ان شاءالله ازيد من سرعة قرائتي وابذل مجهود اكثر. وحاطة في بالي اقرا كتب ابراهي الفقي ومصطفى محمود اهمم مو كلها الي مواضيعها تلفتني.. 😀

    ReplyDelete
    Replies
    1. الله يعافيكِ عزيزتي .. و ربنا يقويكي ويقدرك <3

      سعيدة بطلتك الحلوة

      Delete
  2. حاجه حلوة ماشاءالله.. حركتك هذي موجوده في موقع اسمه goodreads
    اتوقع عارفتيه بما انك تحبين الكتب.. يعطيك تحدي كم كتاب تقدرين تخلصينه في السنه.. بس تدرين انا ماعجبتني الحركه.. لان اهتمامك اغلبه راح يكون متى تخلصين الكتاب الي في ايدك عشان الكتاب الي بعده.. بالنسبه لي مو المهم كم كتاب اقرا.. المهم اني لما اقرا الكتاب الي بين يديني اكون مركزه فيه واروح لعالم ثاني معاه. ممكن تقرين ١٠ كتب بالسنه بس محتواهم يسوى محتوى ١٠٠ كتاب.. بس حلو تدخلين في عالم الكتب.. تعرفين اي نادي للقراءه موجود عالنت بلوق وبنات يقروا كتاب بمده معينه بعدين يناقشوه في البلوق والكومينتس؟

    ReplyDelete
    Replies
    1. أنا شخصياً أشوف العدد يحمسك انك تقري أكبر عدد ممكن وبتاخدي الفايدة منها :)

      ومع الأسف ماعرف ، ولو انها حتكون فكرة حلوة <3

      سعيدة بطلتك

      Delete