Tuesday, May 13, 2014

تقييمي لمنتجات خلصتها My First Empties !!


السلام عليكم

مع دخولنا فترة الاختبارات و الزحمة فكرت أسوي تدوينة خفيفة 
و أتوقع دي حتكون آخر وحدة قبل الاختبارات ان شا الله
لسى بفكر xD

و قبل لا نبدأ صح .. كاميرا بنان في الصيانة ، 
فاضطريت أستعمل كاميرا أقل جودة و مع فوتوشوب جامد هههههه 
فمشوها المرة دي :$

 المهم يلا نبدأ بسم الله


غسول للوجه بالصبار للبشرة الدهنية

أنا بشرتي عادة ماهي دهنية .. هي تميل للجفاف أكتر 
بس من فترة طلعتلي حبوب والدكتور كتب لي دا الغسول

الحلو فيه انه بدون صابون و رغوي 
وبالصبار الي مرة مفيد للحبوب و يهديها

بس مع الأسف مافادني برضوا .. 
الحبوب ماصغرها ولا هداها ولا أي حاجة في الحياة

و سعره قرابة الـ 200 ريال ! -__- 
زعلانة عليها أستغفر الله هع

ماراح أشتريه أبداً


جل استحمام من بورجوا بخلاصة الزنجبيل

زمان كنت أحب الورود و الفاكهة و الحاجات الخفيفة .. 
دحين ليا فترة أحب البهارات و الروايح الحارة  
فأنبسطت لمن شفت الشي الفلة دا و لونه موف كمان <3

ريحته حلوة ، ماهي زنجبيل خام يصدع .. 
زنجبيل على لوز و تقعد ثابتة حق ساعتين تقريباً

ماحرجع أشتريه تاني .. مافيله شي مميز


عطر هني مينيا من ذا بودي شوب

ريحته مو عسل عسل .. 
ريحته حلاوة على فانيليا على شي لزيز 
* كالعادة أنا و وصفي الجبار في الروايح *

انتوا لمن تشموها حتفهموني xD

مرة أحبه للنهار و الجامعة .. يحسسني بأنوثتي :p

سعره ب 69 ريال .. 
و رح أشتريه ان شا الله بعد ماتخلص العطور الي عندي 
* مدري لو هو ليميتد اديشين و لا موجود لسى*


بخاخ جسم بالفانيليا من صيدلية بووتس

أنا عندي هوس بالفانيليا .. سواء كريحة أو كطعم 

الي أحبه فيه انه ريحته مركزة و ثابتة .. 
تمسك في الملابس بالرغم من انها مجرد بخاخ

أكيد حرجع أشتريه تاني 
* أصلاً عندي واحد جديد في الدرج * هع


معجون أسنان أوبتيما بالصبار

ميزته انه من غير فلورايد أو صوديوم لوريل سولفيت

على حسب ماقرأت انه مشكلة المادتين دولا 
انهم مضرين عالأسنان واللثة على المدى البعيد

خصوصاً انه المعدل الطبيعي هو استعماله 3 مرات

صححوا لي المعلومة دي لو كنت غلطانة 

المهم المعجون قوامه تقيل شوية 
بس يعطي احساس بالانتعاش مرة جميل 

غالباً حشتري العلبة الأكبر المرة الجية ان شا الله


برايمر ذا بورفشنال من بينيفت

برايمر لتصغير المسام و تثبيت المكياج

يسيبب البشرة مخملية ناعمة 
و يدمج الأساس أحسن مما لو كان من غير برايمر

برضوا حرجع أشتريه لأنه ماستغنى عنه أبداً


مناديل مزيلة للمكياج من نيتروجينا

من غير زيوت و دي نقطة مهمة جداً

تنظف الوجه كويس .. صح ماتحسوا انه خلاص شالت كل شي

لكن كوحدة من خطوات ازالة المكياج فهي فعالة و ماتحسس الوجه

حشتريها تاني


مقشر سوب آند قلوري فليك آوي

سويت عنه ريفيو في الانستقرام

ريحته لوز على شيا على برتقال
ماهو مرة خشن يعور الجلد و لا مرة خفيف مايسوي شي
بالعكس يقشر الجسم و ينعمه كتير و ريحته تقعد معاكم لليل

حشتريه تاني بس بعد ما أجرب منتجات غيره


زبدة الجسم من سوب آند قلوري ، ذا رايتيس بتر 

دا الحجم الصغير حق السفر .. 
ريحته حمضية أكتر من كونها سكرية
ترطيبها يفضل معاكم طول الليل 
و تمتصه البشرة بسرعة و ماتحسوا انه جسمكم مدبق

يمكن ماشتريها تاني .. برضوا مافيها الشي المميز


تونر للبشرة الجافة/الحساسة من نيفيا

أنا كنت دايماً أخاف أستعمل تونر عشان لايحسس لي بشرتي 
فماكنت أستعمل إلا تلج و موية ورد

بس لمن جربت الشي الجميل دا أتغير روتيني

خفيف عالبشرة و يديها اشراقة بسيطة ، 
و ينشف الوجه شوية فيباله على طول كريم مرطب

مرتاحة عليه وماعتقد حغير عنه حالياً

حشتريه تاني أكيد


آخر شي هو مزيل مكياج العيون من لوريال

الحلو فيه انه يناسب العين الحساسة فمايهيجها 

يشيل المكياج بمسحة وحدة 
* مسحة وحدة يعني تضغطوا عالعين لمدة نص دقيقة 
و تمسحوا بشويش *

ماسببلي حساسية حمدلله 
و يشيل المكياج الي ضد الموية بس بشوية عنف xD

حشتريه تاني 

و بكدا خلصنا 

أخيراً رح أرمي العلب ، 
ترى من أول ماخدة مساحة عندي وماني عارفة فين أوديها ههههههه

شاركوني آرائكم في المنتجات دي لو جربتوها
و اش أكتر منتج ندمتوا عليه؟

وسائل التواصل معايا في أعلى الصفحة عاليمين

ابقوا سُعداء

- بيانولا

2 comments:

  1. انا جربت البتر حق سوب اند قلوري ماعجبني ابداً ع قولتك مافيه اي شي مميز ، المشكله اني اشتريت الحجم الكبير فجالسه اغصب نفسي عليه متحسفه قيمتو ��
    ولا راح ارجع اشتري مره ثانيه

    ReplyDelete
  2. Awesome post! Jameel jiddan I love the idea.

    I would like to gladly inform you that I have nominated you to the 'Shine on' blogging award, as I really admire and enjoy reading your blog:
    http://www.albalsamlife.com/2014/05/fashion-blogging-litalienne-shine-on.html

    Please take a look at the post, hoping that you enjoy reading through my personal answers! and I look forward to read YOURS!

    p.s: Don't forget to follow the rules which are to 1) Mention the blogger who nominated you with a link back to their blog. 2) Nominate 15 other bloggers that you admire and follow. 3) Answer the questions and have fun!

    Lots of love,
    Balsam
    http://www.albalsamlife.com

    ReplyDelete