Tuesday, July 15, 2014

أساسيات العناية بالأيدي و الأرجل

السلام عليكم 

تدوينة اليوم حتكلم فيها عن أساسيات العناية باليد و الرجل 

ماحتكلم كتير و أتعمق بس حقولكم على روتيني أنا 
و انتوا على أساسه تقدروا تختاروا الروتين الي يريحكم 

بالنسبة لليد و الأظافر


طبعاً قطاطة - قصاصة - مقطة ، 
ماعرف اش تحبوا تسموها بس الشي الي يقصر الأظافر :p

و مبرد حديد ، 
شخصياً أنا متعودة عالحديد أكتر من التاني العادي ، 
في بنات يقولوا انه الحديدي ممكن يضعف الأظافر 

أنا ماستعمل المبرد غير لمن أقصر أظافري ، 
يعني مرة كل 3 أسابيع تقريباً فماحس انه أظافري بتضعف حمدلله

العود البني الطويل دا أستعمله لمن أبى أخرج جلد ميت ولا أنظف تحت الجلد 

بعد كدا المستطيل الأبيض فوق عبارة عن مبرد ملمع أخدته من كشك في دبي

له 3 أوجه تستعمليها لكل ظفر عشان ينظفه و يلمعه 

و الخشب الي في الأخير هو حجر مقشر و فرشاة تنظيف

الحجر ماحس اني أستفدت منه لانه مو عاجبني ملمسه -_- 

بس الفرشاة مفيدة لمن تبي تنظفي الظفر من بقايا جلد أو حاجة 



بعد التقصير والتطويل والعمليات الجراحية ندخل في التصليح :p

الي في علبة المناكير هو زيت موية الورد برضوا من دبي

أحطه على الأطراف و يخفف من الجلد الزايد 

تقدري بداله تحطي زيت اللوز على الظفر و بعدين تلفيه بقطنة 
و قصدير و تسيبيه ربع ساعة 

حيعطيكي نعومة و تفتيح مع كتر الاستعمال

أو ممكن تستعملي قلم زيت اللوز الحلو من بودي شوب
 برضوا يؤدي نفس الغرض
 

أهم شي في الحياة الترطيب

هادي الأنواع الي مجربتها وعاجبتني 

الي في الأطراف ترطيبهم يستمىر حق ساعتين تقريباً 
أما البقية أطول بساعتين زيادة 

عموماً انتي احتياطاً خلي دايماً معاكي الكريم 

و ماراح يسمر يدك طالما خرجتي للشمس بواقي ، 
غير كدا مستحيل تسمري 

كـ تقشير:

أنصح بأي نوع زيت طبيعي + سكر + ليمون أو موية ورد

و أفركي بيها يدك و أصابعك بحنية و بعدها غسلي يدك و رطبيها ، 
حتحسي يدك تنعم مع الوقت و تفتح


بالنسبة للأرجل و الي أحسها أكتر جزء مهمل مسكينة xD



مقشر بووتس بالنعناع واللافندر

حبوبه المقشرة كبيرة شوية لكن تنظيفه جميل ، 
أستعمله مرة لمرتين في الأسبوع

وبعدها الكريم المرطب الي تابع له 
* متوافرين في صيدلية بوتس *

و مع الوقت لو عندك جفاف رح يخف كتير بفعل الترطيب 
خصوصاً لو لبستي شراب متين بعدها

الشراريب المتينة تلاقيها محل أويشو في المولات 
أو لا في إي روز أتوقع عندهم كمان

و تلاقيها برضوا في الهرم عادي يعني :p

مقشر هيمالايا بالجوز والأناناس وجوز الهند

دا كان توصية من صاحبتي بيان ، حبيباته صغيرة بس كتيرة مرة 

وماهو خشن مرة ، أحسه ألطف من حق بوتس و ريحته كمان راااايقة

و بشكل عام لاتلبسي جزم بدون شراريب ، 
لو عالأقل الشراريب الي تجي قصيرة عشان تحمي جلدك 

و السمار حله التقشير و الترطيب و العناية 

جربوها على مدى 4 أسابيع و حتحسوا بالفرق

و بس، يارب تكونوا أستفدتوا :)

وسائل التواصل معايا في أعلى الصفحة عاليمين

ابقوا سُعداء

- بيانولا ~

1 comment:

  1. ثانكيوووو عالبوست المفيد صراحه
    ������

    ReplyDelete