Monday, August 11, 2014

أساسيات ونصائح للمدرسة

السلام عليكم

بناءاً على رغبة بنات المدرسة اللطيفين 

رح نتكلم عن أساسيات العودة للمدارس 
زي ما أتكلمنا عن الجامعات

يلا بسم الله

طبعاً الشنط ، ماعندك إلا خيارين 


شخصياً أفضل شنطة الظهر ، تكون أريح للأكتاف و الظهر 
عكس حقت الكتف الي يكون الوزن كله على جهة وحدة

ممكن تاخدي حقت الكتف لو ماحتشيلي أغراض كتيرة 
زي مثلاً أول يوم أو أيام الاختبارات 

و ازا تقدري خدي ألوان غامقة عشان الأبيض و البيج 
حيتعبك شوية و يبالك تغسليها وتنظفيها كل شوية

محلات شنط المدرسة الي تعجبني 
و الي مرات أشتري منهم للجامعة كمان

سنتربوينت 
مكتبة جرير
ساند آند سبورت 
* مجمع العرب - الروضة - البلد *
محلات الرياضة 
و في محل مرة جيد في الردسي أسفل 
لمن تسيبوا فيرجين على يساركم 
و تطولوا حتلاقوه عاليسار و ديكوره كله وردي 

طبعاً حتشيلي فيها دفتر و قلم و قارورة موية 
و محفظة صغيرة و بسكوتة و لا فاكهة 
لو ماعجبك أكل المقصف أو جعتي فجأة

و خلي فيها شنطة صغيرة و سميها شنطة 911
* يعني حقت الطوارئ :p *

حطي فيها مناديل معطرة أو معقم - مناديل - كيس صغير - 
و منتجات صحية في حال انه خالة وردة قررت تستظرف 
و تجيكي وقت الدوام

الجزم الله يكرمكم 

 
الأريح في المشي هي جزم الرياضة 
مو شرط تدفعي 500 في جزمة للمدرسة 

تقدري تشتري من خطوات - نيويوركر - نيولوك - سنتربوينت 

أسعارهم ماتزيد عن 150 ريال

أو تقدري تطلبي من موقع ( نمشي ) أو ( فوغا كلوزيت ) 
كلهم يوفروا خدمة الدفع عند الاستلام

بالنسبة للعناية بالبشرة


طبعاً أول شي أستشيري صيدلي أو دكتور جلدية 
عن روتين للبشرة لو انتي ماعندك 

حيشوف نوع بشرتك و يعطيكي " غسول - تونر - مرطب " 
تستعمليهم يومياً و مقشر تستعمليه مرة أو مرتين في الأسبوع

و قبل لاتخرجي من البيت لاتنسي واقي الشمس
جداً جداً جداً ضروري 

رح يحافظ على لون بشرتك الطبيعي
مايسبب تصبغات للبشرة
يحميكي من أشعة الشمس الضارة
مايحسس بشرتك

لاتقوليلي ماحب قوامه ولا ماحب ريحته 
أعتبريه زي الدوا ، غصباً عنك تستعمليه xD

برضوا لمن تروحي الصيدلية اسألي الدكتور عن واقي شمس
و اسأليه اش يناسبك أكتر " السن سكرين و لا السن بلوك " 
بس يكون عامل الحماية مابين 30 إلى 50 
لاتاخدي أعلى و لا تاخدي أقل
الأقل ماينفع مع شمسنا
الأعلى مجرد خدعة تسويقية
و كمان أتأكدي انه يوفر حماية من ( UVA و UVB )

عندك أنواع جيدة زي مثلاً 
( نيتروجينا - آفين - بايوديرما - فيتشي )

و لو تبي من دبنهامز مثلاً أو وجوه عندك
( كلينيك - إستي لودر - بينيفت )

^ المفروض أغلى شي عند الشركات دي كلها هو 180 ريال

و كمان في مرطب شفاه شفاف من لابيلو يوفر حماية من الشمس بنسبة 30

 
أنا أستعمله بس يسبب طبقة بيضا 
فانتي كل ماتحطي أقعدي طبطبي الين يخف البياض

و لو مسموح لكِ تاخديهم معاكي فخديهم أحسن عشان كل ساعتين تحطي
أو خدي منهم في العلب الصغيرة دي الي تنباع في محلات أبو ريالين

بالنسبة لمزيلات الرائحة/العرق

أول شي في فرق بين مزيل العرق و مزيل الرائحة

مزيل العرق Antiperspirant
يمنع الخلايا من انها تفرز العرق
و دا غير صحي لانه العرق بيتخزن جوا الجسم
 ^ في دراسة أثبتت العلاقة بين مزيلات العرق و الأمراض الخطيرة
بينما جات دراسة تانية نفتها 

مزيل الرائحة Deodorant
يخلي الخلايا تفرز العرق لكن يمنع الرائحة
و يقتل البكتيريا

الخيار يعود لكِ في اختيار واحد فيهم 

بالنسبة لمزيلات الرائحة فأنصح بـ
( بيزلين - فيتشي - لويس ويدمر )
^ دولا رول

لو تبي بخاخ
( فا - دوف - نيفيا )
في الصيدليات موجودين النوعين

و بخصوص العطور

ماعرف كيف نظام المدارس 
لأنه أحياناً يقولوا ممنوع تجيبي عطر معاكي 
فلو كانت الحالة كدا و انتي أحد من محارمك حيوصلك المدرسة
بخي على ملابسك قبل ماتخرجي

لو والله مع سواق و كدا ، فأشتري من مكياجي بخاخات العطور 
الي تتعبى و شيليها معاكي المدرسة

عطور المدرسة أحسن شي تكون خفيفة
زي مثلاً عطور بودي شوب - ايف روشيه - زهور الريف
   
آخر شي المكياج 
ماقولك حطي مكياج في المدرسة
لأنه على أيامنا كان ممنوع وتفتيش وقروشة

" لو " مسموح تحطوا شي بسيط أو ماحد يدقق

تقدري تستعملي ماسكارا تعطي منظر طبيعي للرموش
مثلاً بودي شوب الوردية
لوريال 1 Million
ماكس فاكتور الموف أو 3000Calories الذهبية
* موجودين في سنتربوينت *

مرطب شفاه ملون زي حق لابيلو أو بودي شوب أو بينيفت

لو عندك آثار وحابة تخفيها استعملي كونسيلر نفس درجتك أو أغمق 

مثلاً ماك برو لونق وير - ديبورا أو ريفلون *سنتربوينت*

أتمنى أكون غطيت كل استفساراتكم 

و عودة دراسية سعيدة

لاتنسوا تجددوا النية في قلوبكم 
انكم رايحين المدرسة لطلب العلم و عشان ترضوا ربنا

وسائل التواصل معايا في أعلى الصفحة

ابقوا سُعداء

- بيانولا ~

0 comments:

Post a Comment