Saturday, August 23, 2014

تاق أسرار دولابك




السلام عليكم 

جاني تاق من زمااان من الجميلة ( إيناس ) عن أسرار دولابك ، 
و دايماً يصير شي و أضطر أؤجله

بس حمدلله نزلته اهو فـ يلا نبدأ

1) اش أقدم قطعة عندك؟

جاكيت قصير عندي من زمان مرة، 
يعني أظنه كان حق بنان وماعجبها قمت أخدته أنا xD
ماعرف ليش متعلقة بيه بس أحس مابى ألبسه و في نفس الوقت مابى أوزعه


2) أجدد قطعة في دولابك؟

هو حسب ما صورت بنان فهي دي البلوزة من نيويوركر 
* الكلام من رمضان *
فمادري لو حتلاقوها ولا لاء
 أول ماشفتها حسيتها تقول لي خديني ونامي بيا 
مرة مريحة وباردة و أهم شي انها موردة :p
تخيلوا دا مقاس XS  


3) أغلى قطعة في دولابك؟

فستان شبكتي
ماعندي صورة كاملة له لأنه مشوار عشان أفكه 
بس دي الصورة لمن كنت بجربه في المحل
فمشوا حالكم بيها :$


4) قطعة حللتيها مقارنة بسعرها البسيط

هم قطعتين يعني عشان نكون صريحين مع بعض :p

الجاكيت الجينز من نيولوك قسم البنات
 تقدري تلبسيه مع تقريباً أي حاجة 
سواء بلوزة ظهرها مفتوح
أو لبس صامت


و البولو حق جيوردانو عشان جاني من بنانا :p
بالإضافة لانه عندي هوس ببلايز البولو


5) أحسن مكاسرة؟ أو يعني قطعة أخدتيها بسعر جيد مرة

كروب توب من بيرشيكا
كان بـ 15 ريال تقريباً


6) قطعة تحبيها و الكل يكرهها ؟

القمصان الواسعة
أخدت مجموعة من محل F&F
أستعملها لوقت النوم لمن أكون طفشانة وقرفانة
و مابى أحس بشي ماسك فيا


7) قطعة ضيعتي عليها فلوسك؟

والله هي قطعة مخزية بصراحة :p
يعني ممكن غيري تعجبه
بس دحين لمن أطل فيها أقول لنفسي فين كان مخك؟
أول أيام الجامعة كنت متحمسة أقضي وأشتري
وشفت الطقم دا في محل في عزيز مول وكان مخفض
تنورة طويلة - بلوزة بدون حمالات - جاكيت بكم طويل
قلت أقدر أستفيد من كل قطعة لوحدها مع قطع تانية 
و كنت أظن ... و خابت ظنوني .. 
قاعد في الدولاب زي ماهو وبورقته xD


 8) أكتر 3 قطع تحبيها في الفترة الحالية؟

الصندل دا من نيولوك
يعني تلاحظوا انه سود خلاص من الاستعمال ماشا الله xD


فستان ماكسي من سيتي ماكس
من زمان عندي بس أحسه مريح جداً 

و بلوزة من نيولوك ، أحب هادي الحركة في الأكتاف و كتير كنت أدورلها
وفترة كدا صارت موضة و أنتشرت بس كان سعرها مبالغ فيه بالنسبالي
الين لقيت ضعيفة الله دي xD

 
و بس ، يارب عجبكم البوست 
و شكراً لإيناس لأنها سوتلي تاق

ابقوا سُعداء

- بيانولا ~

1 comment:

  1. ممممتتتتع <3 شكراً جدا على تفاعلك ومشاركتك هذا النوع من التاق ، والجزمة التيفني تجنن ابغا منها لحمي جدددداً! ��

    ReplyDelete