Monday, August 25, 2014

كيف أزود ثقتي بنفسي و أتجاهل كلام الناس؟


السلام عليكم

مع قرب الدوام حبيت أتكلم معاكم في موضوع ملاحظة انه مسبب مشكلة 
لبنات كتير و أنا شخصياً كنت زيهم .. خصوصاً أيام المراهقة 

 [ موضوع الثقة بالنفس و كلام الناس ]

كتير مرات كنت أتفادى الناس و أبعد عن بنات العيلة 
و ماكان عندي صاحبات كتير ، 
كنت أخاف أرفع عيني و أطل في عين أحد حتى لمن أمشي 
كنت أطل في الأرض و أعتبر نفسي وحدة غير مرئية

معظم الوقت كان الخلل في الثقة عندي هو انه عندي صدفية
فكانت في مرحلة من مراحل حياتي باينة في وجهي 
فكانوا كتيرين يسألوني اش هادا طيب ليش ماتعالجيها 
طيب ليش ماتجربي الخلطة الفلانية طيب مدري ايش

وكنت مررررة أتضايق و أتحسس .. 
ماكنت أحب أتناقش مع أحد غريب عن مشاكلي الخاصة
و كنت أحس انه عمره ماحتعالج و حقعد زي ما أنا 
و كل الناس حتجلس تطل فيا بشكل غريب  

اش غيرني؟ 

 لمن بدأ يصير عندي وعي عن مشكلتي و قرأت عنها
و بدأت أتقبل نفسي بكل شي فيها
و عرفت انه ربنا لمن يحب عبد يبتليه
و صرت شوية شوية أحب نفسي وأدلعها
أقل شي كنت أسويه هو اني أطل في المراية 
أكتر من 5 ثواني و أبتسم لنفسي 

و لمن شفت بنات كتير حواليا مبسوطين وعندهم ثقة بأنفسهم
و مرة أحسهم عايشين حياتهم ومايفكروا في حاجة تضايقهم

شوية شوية خرجت من فقاعتي و صرت أتكلم مع بنات فصلي 
و أتصاحب معاهم ، و أقول رأيي وقت الحصة حتى لو غلط
أحياناً بعد ما أتكلم أحس قلبي يوقف في حلقي 
و لمن تقول لي الأستاذة صح كلامك 
أقوم أحس انه موية باردة مشيت جواتي ، 
لاحد يضحك لو سمحتوا هههههه :p

نبطل هروج حريم و نخش في النقاط الأساسية والحلول

رح أكتب المشاكل و حل كل وحدة

1- أنا مو حلوة، أنا فاشلة، أنا مو عارفة شي

^ زي ماتشوفي نفسك في مخك
غيرك حيشوفك بنفس الصورة

لانه سبحان الله مشاعرك تترجم في جسمك وحركاتك وكلامك
فالناس تمتص مشاعرك و تقول عنك انك كدا كدا

الحل:

تغيري قناعاتك كلياً !

كل يوم لمن تصحي و قبل لاتنامي طلي في المراية
و قولي لنفسك : انتِ حلوة .. انتِ عيونك جميلة .. انتِ رح تخلصي دراسة و تنجحي بأعلى المراتب .. انتِ رح تفوزي بالوظيفة الي تحلمي فيها .. انتِ أحسن من الناس الي حواليكي

دلعي نفسك بالكلام و ابتسمي لها

و لمن تمشي وسط الناس وتحسي انك بدأتي تخافي
رددي نفس الكلام في نفسك

أو اجلسي أكتبيها في ورقة أو نوت أو صورة خلفية للجوال
عشان تشوفيها بشكل متكرر و تردديها

ترى مرة بعد مرة حتحسي في شي متغير فيكي 

2- لمن أمشي أخاف من نظرات الناس

أفردي أكتافك - أرفعي راسك - ركزي عينك على الأفق
يعني طلي قدامك

لاتطلي في رجلك ، لاتطلي في يدك و لاتطلي في جوالك

الطريقة دي حتخلي الناس تعترف بوجودك
حتقول فلانة هنا و هم الي حيحسوا بـ رهبة منك

و شيلي من بالك فكرة انه حيضحكوا عليا عشان مشيتي

مشيتك مافيها حاجة طالما ظهرك وأكتافك مستقيمين

و خليهم يطلوا فيكي .. خليهم يتأملوا خلق الله ياستي 
3- أتوتر في الكلام وأتلخبط

سواء كنتِ تتكلمي مع أحد أو تبغي تبدئي كلام مع أحد

قوليله لحظة بس 
بعدين خدي نفس عميق .. 
رتبي الكلام في مخك وخلي الكلمات بسيطة جداً 
خدي نفس عميق تاني
و أتكلمي بهدوء و خلي مخك هو الي يفكر ، 
انتِ بس قولي الكلام الي كنتِ مرتبته في مخك

مو لازم تردي على طول أو تتكلمي بسرعة 

أتخيلي الموقف في مخك بشكل ايجابي و طبقيه

مرة على مرة حتلاقي نفسك أتقنتِ الحديث و صار عندك طلاقة

4- الناس يضحكوا عليا و يعايروني 

أضحكي معاهم !

لو مثلاً قالوا بيان ماتعرف تهرج كل شوية تقول آآآه ءءء 
حقولهم ايوا أعملكم بريكات وسط الكلام عشان ما أتعبكم 
و هاهاهاهاا أضحك معاهم 

ولا يا بيان مسكينة شعرك مرة معدوم و جسمك اشبه تخنان بزيادة؟

قوليلهم الواقع، ليش صار لك كدا .. عادي بس قوليلهم كلمة تختصر حالك
وبعدين قولي و الحمدلله يارب مرتاحة ومقتنعة لانه حالي أحسن من غيري
و جالسة أحسن من نفسي .. أستني عليا فترة و حتشوفي الفرق

ترى مرة عايدي انه في ناس تضايقنا بالكلام
سواء عن قصد أو بالغلط

لا تاخدي الموضوع بحساسية و تزعلي و تتنكدي

بالعكس ، حطيه تحت رجلك و أمشي 

و خليه هو الدافع والحافز الي يخليكي تكوني أحسن و أفضل 

و ازا مرة قفلت معاكي يعني

أكتبي كل الي يضايقك في ورقة ولاتقرئيها 
أول ماتخلصي شقيها و أرميها في الزبالة

أو امسكي ورقة فاضية و ألوان
و أمسكي الألوان مرة وحدة وشخمطي في الورقة 
الين تخرجي كل الي في نفسك
و بعدين أرميها

5- طيب أنا شايفة نفسي وحشة ، اش الحل؟

يعني انتِ شايفة انه خلقة ربنا بشعة؟ 
و انه ربنا مايعرف يخلق البشر صح؟

أتزكري الآية (( لقد خلقنا الإنسان في أحسن تقويم ))

يعني ربنا خالق كل واحد فينا في أحسن صورة و أحسن حال

لاتجلسي تقولي فلانة أحلى مني 

 الجمال في عيوننا أمر نسبي ، يختلف من عين للتانية

و دي حكمة من ربنا

يعني عادي لو سين من الناس مرررة حلوة بالنسبالك
و صاد من الناس جمالها أقل من جمالك في نظرك

غيرك حيشوف العكس

فلاتفكري في الناس و أنشغلي بنفسك و أقنعيها بانك حلوة 
بكل بساطة لانك من صنع ربنا

6- عندي بقع، جروح، مشاكل في البشرة تحرجني

أتقبلي وجودها و بعدين عالجيها! 

لا تدفني نفسك على مشاكل حلولها بسيطة

ماتقدري تستحملي تكاليف العلاج ، 
شوفي عمنا جوجل حيعطيكِ خلطات وتجارب و حلول 

7- أهلي دايماً يهزئوني و يقولوا اني فاشلة 

في أهالي كتير يشوفوا انه لمن يضغطوا على الأبناء
و يقولوهم كلام سلبي و غير صحيح
فدا معناها انه أنا جالس أربيه صح 
عشان يكبر و يصير شديد وسط الناس ومايخاف من أحد

لانه في بالهم انكم حتاخدوا الكلام السلبي دا 
و تحاولوا كل جهدكم انكم تغيروه للأحسن و ترفعوا راس أهاليكم 

انتوا من لحمهم و دمهم ، يبغوا مصلحتكم و مايبغوكم تغلطوا نفس أغلاطهم
عشان كدا يضغطوا عليكم و يقرفوكم أحياناً

لكن غصباً عننا نستحمل ونقول طيب و حاضر عشان مالنا غيرهم

خدوا كل الكلام حقهم و أعتبروه تحدي

عشان مستقبلاً تقولوا شفتوا؟ اهو صرت أحسن مما تتخيلوا 
و رفعت روسكم و خليتكم تفخروا بيا

8- أنا مين عشان أكون ناجحة زي فلانة؟ 

أرجعي أسألي نفسك على طول بعدها
( انتِ مين عشان تكوني أقل من فلانة ؟ )

كل الناس الناجحة كان عندها مشاكل في الثقة
و كانت تفشل كتير و تواجه عقبات بالهبل

بس هم أخدوا كل شي وقف في طريقهم 
و حولوه لسبب نجاحهم و تميزهم 

كلنا بشر ، فطالما هم قدروا يسووا الشي الفلاني
معناها انتِ كمان تقدري تسويه 

و حطي في بالك انه كل واحد فينا عنده شي يميزه
موهبة خاصة بيه 
بحبشي عن الموهبة دي و نميها و كوني أحسن وحدة فيها

أتمنى أكون غطيت المشاكل الي تواجهنا في حياتنا اليومية
و لو نسيت شي قولوا لي ورح أضيفه في التدوينة

و شيكوا على التدوينة دي -> [ أسرار الشخصية الناجحة ]

لاتنسوا تتحصنوا كل يوم و تخلصوا النية لأي شي تسووه

ابقوا سُعداء

- بيانولا ~

4 comments:

  1. تمنيت التدوينه ما تخلص استمتعت فيها جدا
    احس مهما قلنا لنفسنا يبقى م غيرنا غير
    شكرا لإيجابيتك بحجم السماء

    ReplyDelete
  2. قد ايش كنت محتاجه عالتدوينه الله يسعدك ويوفقك يا بيان وييسر لك كل شيء صعب بحياتك������

    ReplyDelete
  3. كلامكك ماشاءالله ممممممرررةة خففيف وله اثرر قويي وجمييل في النفسس , يسعددك ياربب قد ماتسعدي اللي حولك واكترر.

    ReplyDelete
  4. خلال هاليومين كُلفت بمهمة بالدوام واليوم سويتها وتعبت فيها وحسيت اني مسوية انجاز
    لكن البرووود وكلمة ماله داعي حطمتني وجلست منرفزة طول الوقت
    من الصبح للحين كان راسي يوجعني واللي صار قلت ستوب ! خلاص انتهى الموضوع لمتى ابقى معصب ؟!
    الحين انتظر يخلص الدوام وارجع اكافيء نفسي بغدا في مطعم اومال ايه
    والعمل اللي سويته لله فـ لله وربي يعوضني عن تعبي =$ ربي سبحانه اكرم من خلقة
    مدري ايش دخل كلامي بالبوست بس حسيته نفس السياق ، وحابة افضفض =$

    ReplyDelete