Friday, August 29, 2014

تدشين مجموعة زيت الآرغان من ذا بودي شوب


السلام عليكم

سو أمس كان حفل تدشين مجموعة بودي شوب الجديدة 
الي مصنوعة من زيت الآرغان البري



أكيد كتيرين منكم سمعوا عن زيت الآرغان و فوائده للشعر و البشرة 

هو مقره الرئيسي المغرب بالتحديد جبال الأطلس

بودي شوب سوت فيديو يشرحوا فيه طريقة استخراج الزيت
و مدى أهميته لنساء المغرب

و أنا ترجمته للعربية
و الفيديو فيله موسيقى
فلو تتضايقوا ، 
أكتموا الصوت و شغلوا الترجمة حقتي

لو كنتوا باللاب توب فتختاروا الترجمة 
من الخيارات إلى على يسار شريط الفيديو


 بعدين تختاروا Arabic 
و اضغطوا ON

ولو كنتوا تتفرجوا من الجوال 
لمن يفتح الفيديو في تطبيق اليوتيوب

في 3 نقاط مرصوصة عالجنب
اضغطوا عليها و أختاروا CC
و بعدين العربية


و هادا الفيديو

 

و هنا اللينك 

^ أتفرجوا بعدين نكمل شايفتكم ترى :p

المهم طبعاً زيت الآرغان الخام غالي جداً 

فبودي شوب أخدته و خلته مكون أولي للكولكشن الجديد

مكون أولي يعني هو الأساس وبعدين مخلوط بزيوت ومواد تانية مفيدة

و خلوا الأسعار رخيصة عشان تناسب كل الناس 
و يقدروا يشتروها ويعتنوا ببشراتهم 
وماتكون حكر على ناس معينة بس

أول شي حقولكم اش هي المنتجات 
بعدين نتكلم عن الاستعمالات و الأسعار 

المجموعة مقسمة لـ 3 أقسام

تقشير - تدليل - ترطيب

قسم التقشير والاستحمام

مقشر السكر الخشن للجسم
صابون البانيو
جل استحمام
صابونة تدليك بدوائر بارزة لتنشيط الدورة الدموية



بعدين قسم الترطيب

لوشن مرطب
زبدة الجسم
زيت صلب للمناطق الخشنة و الشعر


و آخر نقطة هي اللمسات الأخيرة و التدليل

مرطب الشفاه بالزيت الصلب
زيت الآرغان للشعر و الجسم


في 3 حاجات متحمسة جداً إني أجربها
بحكم انها منتجات جديدة على منتجات بودي شوب

صابونة التدليك

Image rights go to writingwhimsy 


فيها دوائر أو رؤوس بارزة عشان لمن تمرريها على جسمك 
مو بس تطلع لك المنتج كمان تسويلك مساج للجسم
و تحركلك الدورة الدموية و تنشطها لك

الزيت الصلب

ِ
تقدري تستعمليه للشعر و الجسم في المناطق الخشنة
زي الركبة و الأكواع و حتى جوانب الأظافر
* فكرني بحق البابونج الي عندهم للمكياج والترطيب *

و آخر شي المنتج البطل زي مايسموه عندهم
الزيت 


تقدري كمان تستعمليه للشعر و الجسم
حيعطيكي ترطيب و تغذية 
وكمان تقدري تستعمليه وقت المساج
بس حميه في يدك أول شي عشان يدفى

بالنسبة للروائح ، في بعضها ريحته خفيفة جداً
و في بعضه ريحته كانه حلاوة و فُل على لوز

شخصياً عجبتني ، خصوصاً انهم سووا جلسة تقشير ومساج ليدي
فخلاص أنا مرة سحت و حسيت كل التوتر الي كان فيا خرج 
أنا خلقة لمن أحد يمسك يدي ويلعب فيها يجيني احساس النوم xD

شكراً لهديل الي جلست تدلعني :P



وبالنسبة لأهم نقطة لنا كلنا .. الأسعار
* قرع طبول لو سمحتوا *


عن نفسي أشوفها جداً مناسبة و حلوة

حتى لو كل شهر وفرتي مبلغ و أشتريتي كل فترة منتج واحد تحتاجيه

الكولكشن حينزل ان شا الله أول أسبوع في سبتمبر تقريباً

و الي ماشافوا الفيديو يطلعوا تاني يشوفوه
ترى الترجمة تتعب والله هههههه xD

ابقوا سُعداء

- بيانولا ~

2 comments:

  1. حبيت جدا الكولكشن من اول مانزل برا و متحمسة للمقشر جدا
    و الاسعار فعلا رخيصة نسبة لجودتها بصراحه
    تسلمي ياجميلة <3

    ReplyDelete
  2. جميل الكولكشن! حبيت الأغراض اللي قلتي عليها وناوية أشتريها
    شكرا لك بين ♡♡

    ReplyDelete