Thursday, September 11, 2014

مشاكل و حلول : الرؤوس السوداء - أسبابها و طرق علاجها




السلام عليكم

أدري اني طولت في التدوينة هادي و أصلاً منزلتها و أنا مو مخلصتها 100% 

بس كتيرين طلبوني هي فقلت خلاص حنزل الي عندي 
و أي زيادة إما تنضاف بعدين أو تنحط في الانستا

بداية رح أتكلم عن ماهية الرؤوس السوداء و اش أسبابها ..

في مادة دهنية اسمها Sebum في الجسم هي الي تخرج 
من فروة الراس أو البشرة عن طريق المسام

بس أحياناً ماتلاقي منفذ فتتجمع البكتيريا هناك و تسبب الرؤوس السودا 
بسبب تأكسد صبغة الميلانين في الـ Sebum 

و دا فيديو لها

أسبابها:

1/ الضغوطات النفسية

2/ عدم غسل و تنظيف الوجه سواء على معدل يومي أو من المكياج

3/ لمس الوجه بشكل مستمر

4/ ملامسة الشعر للوجه خاصة الشعر الدهني

5/ الأكل الدهني أو منتجات الألبان

^ آخر سبب فيله اختلاف كتير .. نص مؤيد و نص معارض .. 
بس شخصياً أشوف الموازنة هي الحل المطلق

طيب نجي للحلول:

حقولكم عالحلول الي جربتها و نفعت معايا
* كلها متواجدة في الصيدليات والسوبر ماركت*

1/ سائل كلين اند كلير المنظف 

جداً فادني في الرؤوس الي تطلع بين الحاجب 
وفي أعلى الجبهة حمدلله
بعد ما أغسل وجهي أحطه قبل التونر 
و أمسح بمعدل مرتين كل يوم و يوم 
* يعني يوم ايوا و يوم لاء *
بس طبعاً مو شرط تلتزموا بالجدول دا، الي يريحكم

سعره مابين 15 - 35 ريال

2/ لصقات نيفيا و بيورا آلترا للأنف و الوجه 

برضهم مرة جيدين و يبان المفعول بعد استعمالين لـ 3
و عشان تبان النتيجة مرضية بللوا المنطقة بموية شبه حارة 
عشان تنفك المسام ويصير النزع أسهل

3/ بيكربونات الصوديوم مع الموية * Baking Soda *



تخلطيها مع شويييية موية عشان يصير القوام تقيل 
و تحطيه عالأنف بعد ماتحطي موية حارة
وتسيبيه بالكتير 4 دقايق وغسليه بالفرك

كرريها 3 مرات في الأسبوع الين تبان النتيجة صح
^ لاحظت نتيجة بنسبة 20% من أول مرة لأنه السواد خف 

4/ حمام البخار 

و كتبت طريقته في الانستقرام قبل كدا في هاشتاق #BeenSkin ، 
دا سهل للرؤوس السودا البارزة بس يطفش للي تحسيها تحت الجلد

5/ مرهم ديفيرين

هو أشبه بالمقشر ، تستعمليه مرة قبل النوم وتخليه عادي ، 

بالنسبالي طولت النتيجة أبو أسبوعين وماكانت مرة واو

6/ استعمال الغسول و المقشر باستمرار 
* تختاروه حسب نوع البشرة 
و تقدروا تستعينوا بصيدلي أو دكتور جلدية للاختيار *

7/ أبداً أبداً أبداً لاتنامي وفي وجهك نقطة مكياج
المسام تنكتم وماتقدر تخرج الدهون فبالتالي الوجه ينصدم و يهيج

8/ غسلي بيوت المخدات و المناشف والطرح حقتك باستمرار

9/ اختاري واقي شمس يكون خفيف على بشرتك ومايكتمها

10/ أستشيري دكتورك الخاص قبل ماتعملي أي شي من عندك 
واعرفي مكونات الشي الي تستعمليه 

و آخر منتج ماعجبني كتبت عنه في هاشتاق 
( #درج_الأموات ) في الانستقرام

و بس هادا الي عندي بخصوص الرؤوس السودا

يارب تكونوا أستفدتوا ، 
وشاركوني حلولكم انتوا عشان نفيد بعض 

ان شا الله رح أنزل تدوينة عن الرؤوس البيضا 
*حب الشباب - الحبوب الدهنية .. إلخ*
بس مو دحين فلاتسألوني عنها ..

وسائل التواصل معايا في أعلى الصفحة عاليمين

ابقوا سُعداء

- بيانولا ~

2 comments:

  1. A very useful post. Thanks for sharing doll ^^

    -Nariman.
    www.narimanspage.blogspot.com

    ReplyDelete