Monday, October 6, 2014

دليل اختيار الهدايا

 
السلام عليكم 

سوو جاتني فكرة من وحدة فيكم عالآسك انه أتكلم عن اختيار الهدايا

رح أقولكم على أي أساس أنا أختارها

فـ يلا بسم الله

1- حددوا الميزانية 

 

طبيعي انه لازم نعرف قد ايش نبى نصرف عالشخص 
عشان مانجلس باقي الشهر على شابورة وموية xD

لو حتدفعوا مبلغ كبير فالأفضل توفروا بشكل شهري الين يجي الوقت 
الي حتشتروا فيه 
عشان ماتحسوا ميزانيتكم صار فيها خلل فجأة

2- حددوا مدى قُرب الشخص لكم 


 بمعنى انه الهدية الي رح تهديها لزوجتك مارح تكون نفس الهدية 
الي تهديها لزميلك في الشركة وقيسوا على أساسها 

3- اعرفوا اهتمامات و رغبات الشخص المُهدى إليه



مثلاً أنا أنبسط لمن أحد يهديني شي متعلق بالكتب أو المكياج 
وانتوا أوريدي عارفين يعني :p

فـ حلو لمن تتعبوا شوية و تعرفوا اش الشخص نفسه فيه وتجيبوا له هو 

4- لو ماقدرتوا توصلوا لـ 3 ، عالأقل ابتعدوا عن البديهيات 

البديهيات من وجهة نظري هي: 
طقومة عطور من محلات معروفة و مستهلكة

ما أقول إنها مو حلوة ، بس يعني أكيد في مرحلة 
من مراحل حياتهم جاتهم أو أشتروها 

فلو تبوا طقومة عطور حاولوا تشوفوا روائح أو محلات مميزة 
مثلاً سيفورا - لوكاتيان - ديورانس - 
طقومة بودي شوب الي تكون ليميتد آديشين

5- أستفيدوا من جوجل

بحيث تبحثوا عن الهدايا الي في بالكم و تاخدوا فكرة تقريبية عن الأسعار 
و أماكن الشراء .. إلخ

6- مو لازم تاخدوا رأي أحد

لانه الأذواق تختلف و ممكن يكون عجبكم شي وتحسوه 
يناسب الشخص المُهدى إليه لكن غيركم يشوف لا مو حلو 

في الأخير انت راح تهديه و انت صاحب القرار

إلا لو كان الشخص الي حتاخدوا رأيه عنده خلفية قوية في الشي الي في بالك

يعني مثلاً حابين تهدوا بخور بس ماتعرفوا أيت نوع أحسن و اش الفروق ، 
فطبيعي رح تستعينوا بأحد خبير

7- أطلبوا قائمة الأماني 

عادي لو سألتوا الشخص عن قائمة الأماني حقته، 
مارح تجيبوها كلها طبعاً لكن عالأقل تاخدوا فكرة و يسهل عليكم البحث

حوريكم شوية أفكار للهدايا 

هدايا رجالية:

- كرفتات للدوام 

* لاتنسوا تتأكدوا انها مو حرير طبيعي أو عالأقل مو أكتر من 40% *

و طبعاً في منها أنواع ، في الكبيرة ، النحيفة و القصيرة
و الأسعار الي في الصورة هي أسعار تقريبية من موقع Nordstrom
و الي على فكرة تقدروا تشتروا منه و يوصل للسعودية أو لبريدكم الأمريكي

محلات البيع: زارا - كالفن كلاين - تيد بيكر

الأقل سعراً تلاقوها عند قزاز و زارا 

 

- كبكات Cufflinks 

في منها أشكال: مربع، دائري، مستطيل .. إلخ
الأسعار الي في الصورة تقريبية وماخدتها من نوردستروم  
و Saksfifthavenue
و موقع ساكس برضوا يوصل لهنا

محلات البيع: جيفونشي - باريس غاليري - آرماني - رالف لورن

الأقل سعراً تلاقوها عند قزاز و الأكشاك الرجالية و لومار 


- محافظ 

الأفضل تبعدوا عن الألوان الفاتحة عشان تتوسخ بسرعة 
و كلنا نعرف انه الرجال مارح يجلسوا ينظفوا فيها يعني :p

نفس المواقع الي فوق و نفس المحلات و ضيفوا عليها فتيحي


- علَّاقة مفاتيح " إمبوريو آرماني - إيقنر - غوتشي - قزاز "
- للمبتعثين -> أوشحة برد و قفازات " بربري - رالف لورن - غوتشي "
- للمهتمين بالتقنية " كرت شراء من اكسترا بالمبلغ الي تبغوه "
- لمحبين الكتب " قسيمة شراء من مكتبة جرير "
- لمحبين الأفلام و ماسبق " قسيمة شراء من فيرجين "
 - العطور الراقية -> " توم فورد - لونكوم - مون بلان - كريد "
- ساعات " الحميضي - باريس غاليري - أون تايم "

بالنسبة للهدايا الأنثوية

 - مجوهرات 


حددوا إذا تبغوها كريستال - فضة - مطلي ذهب .. إلخ

عندكم الكريستال من سوارفسكي 
أو من باريس غاليري " نينا ريتشي - جيفونشي - DKNY "

المطليات و الفضيات: فتيحي 

- عطور أو طقومة عطور

" كالفن كلاين - شانيل - نينا ريتشي - ديبون - لونكوم "

من سيفورا - وجوه - قزاز

- أطقم مكياج 

باليت من مكياجي - توو فيسد - ديور - جيفونشي - سيفورا   

- شنطة 

في منها أنواع " الكلتش - الكروس - الشوبينغ .. إلخ " 
شخصياً أحب محل " كاربيرزا " أبو سلحفاة خضرا

عندكم كمان " آكسسوريز - زارا - تيد بيكر - كوتش - فندي - غوتشي "

- للمهتمين بالتقنية " كرت شراء من اكسترا بالمبلغ الي تقدروا عليه "
- لمحبين الكتب " قسيمة شراء من مكتبة جرير "
- لمحبين الأفلام و ماسبق " قسيمة شراء من فيرجين "
- ممكن قطعة ملابس مميزة شفتوها بمكان ، بس أهم شي عارفين المقاس xD

تقريباً دا الي عندي و أعتذر على الشح في الصور
 بس النت بيستخف دمه حبتين 

وسائل التواصل معايا في أعلى الصفحة عاليمين

ابقوا سُعداء

- بيانولا ~

2 comments:

  1. موضوع جديد و حلو كتير
    يعطيكي العافية ❤

    ReplyDelete
  2. تسلم ايديك،جميلة ��

    ReplyDelete