Friday, October 10, 2014

مشاكل و حلول : حب الشباب




السلام عليكم

سوو بفكر أبدأ سلسلة تختص بالمشاكل الي تطفشنا 
و تخلينا نشتري مية منتج عشان نعالجها 
أو أي مشكلة تواجهنا بشكل عام 

حسميها ان شاء الله سلسلة 
( مشاكل و حلول )  
والتاق حقها في المدونة اسمه ( PandS )

المهم اليوم حقولكم طريقتي في معالجة حب الشباب صاحب الدم الخفيف xD

طبعاً المسببات الرئيسية الداخلية لحب الشباب 
هي زيادة افراز في الدهون - تجمع بكتيري - تحسس الجلد

بس كعوامل تزيد الموضوع سوء هي المؤثرات خارجية 
يعني سوء تغذية - ضغوطات .. إلخ و دا الي عندي 

بينما في أشخاص تكون عندهم بسبب مشاكل هرمونية أو دوائية
فعشان كدا لازم دكتور جلدية عشان يسوي تحاليل وكمان يعرف نوع حب الشباب 

بالنسبة للحاجات الي نفعتني:

أول منتج كدا أحط عليه تاج هو الغسول الي كلمتكم عنه 
في الانستقرام في هاشتاق #beenskin 


دي تاني علبة أشتريها بس مافكيتها :p

قوامه خفيف بالنسبالي وكنت أستعمله بمعدل مرتين في اليوم 
وأركز بس على منطقة الحبوب

فكان ينشفها ويصغرها حمدلله

سعره المفروض مايتجاوز 50 ريال


مقشر سينت ايفز بالشاي الأخضر


دا أشتريته بعد ما خلص من عندي الي فوق ، 
وصرت أستعمله يومياً في الليل قبل النوم 

مافيله حبيبات تعور أو قوية عالبشرة 
فشفت انه ان شا الله ماحيضرني لو أستعملته كل يوم 

حسيت انه يخفف الاحمرار ويوقف ظهور الحبوب حمدلله 
لانه بينظف البشرة مزبوط 

سعره 32 ريال في مانويل و بن داوود

مرهم كليراسيل سريع المفعول


يقولوا انه يخفف حجم الحبة واحمرارها في 4 ساعات ، 
ماجلست أعد بصراحة بس فعلاً ألاحظ تغيير فيها 
و أحياناً يخرج الي محبوس جواتها فأضطر على طول أعالجها 
بعسل و لا حاجة عشان لا تترك أثر

في واحد نزلته زمان في الانستا بس لونه أزرق ، 
كلهم نفس الشي تقريباً بس دا أحسن بالنسبالي

مرهم ديفيرين 


قلتلكم عنه برضوا للرؤوس السوداء ..
الدكتور كتبلي هو لحب الشباب بس ماحسيته سوا شي بصراحة ، 
بس نشف وجهي وقشره

كريم كلين آند كلير بحمض الساليساليك


من الحاجات الي تساعد على تنشيف الحبة و اختفائها 
هو حمض الساليساليك
عشان كدا أحب الكريم دا ، 
أحطه عالحبة كل ماينشف و ألاحظها تختفي بعد 4 أيام تقريباً

العسل


طبعاً معروفة فوائد العسل الطبيعي في قتل البكتيريا و تنظيف الجلد

أحطه عالحبة بعد ما أغسل وجهي لربع ساعة كدا و أغسله بشويش 

العسل حقي من موقع آيهيرب اسمه Real Raw Honey 

وكتبت تدوينة عن كيفية الطلب من الموقع

حلول بديلة ماجربتها شخصياً لكن نفعت غيري:
* بالنسبة للمنتجات الطبية أنصح باستشارة مختص أول *
 
1- مرهم البنزاك
2- مرهم الرتن آيه
3- حبوب الريكوتان
<- جربتها زمان ووقفتها
4- حبوب الزركتان
5- قطرات شجرة الشاي من بودي شوب
6- الثلج 
<- كحل سريع لتخفيف الاحمرار


كيف أخفف من ظهور حب الشباب؟


1- التغذية الجيدة
بمعنى انكم تدخلوا فاكهة و خضار في أكلكم

أنا لاحظت ان بشرتي و جسمي يكون أحسن لمن بسوي العصيرات حقتي
* شفتوها في الانستقرام غالباً *

2- تغيير مناشف الوجه - بيوت المخدات - الطرحة وغطاء الوجه
لأنه تتجمع فيها البكتيريا والجلد الميت 
فلازم تتنظف بشكل دوري

3- التخفيف من المنتجات العطرية - الكحولية
لأنها بتهيج الجلد عادةً

4- تنظيف المكياج كاملاً
حاولوا ماتقعدوا كتير بالمكياج أو تناموا بيه أو تستعملوا أدوات غيركم 

5- التخفيف من لمس الوجه 
لأنه اليد مو دايماً تكون نظيفة فانتِ كدا تنقلي البكتيريا لوجهك 

6- أبداً لاتلمسي الحبة
دايماً تجينا رغبة عارمة في اننا نمسك الحبة ونتسلى بيها 
بس دا غلط ، لانه البكتيريا راح تتنقل لمكان تاني
و ممكن تفكي الحبة وبالتالي ينزل السائل ومايتنظف
أو يندفع السائل لجوا وبالتالي يسبب حبة جديدة

و بكدا أكون خلصت البوست
يارب تكونوا أستفدتوا 

و ان شا الله رح أسوي تدوينة عن علاج الآثار 

وسائل التواصل معايا في أعلى الصفحة عاليمين

ابقوا سُعداء

- بيانولا ~

0 comments:

Post a Comment