Saturday, October 25, 2014

طريقة بين في المذاكرة


السلام عليكم

قد أكون متأخرة شوية لبعضكم ، 
بس ان شاء الله رح تستفيدوا عموماً

رح أقولكم طريقتي الي معتمدتها في المذاكرة

فـ يلا بسم الله

● أول شي أحب أعرفكم بالركن الانعزالي حقي


هنا أجلس أزاكر ، أكتب ، أفكر 

و هو ضروري تختاروا مكان بعيد عن الازعاج و الاسترخاء 

يعني ماينفع الجلسة - المطبخ - السرير 

كلها حتسبب تشتت و توتر لكم

اللعبة الخضرا دي زي كانها رياضة لليد ، 
أحب أستعملها لو يدي تعبت أو أتصلبت
أخدتها من دايسو دبي بس في زيها في محلات الرياضة
أو تقدروا تستبدلوها بكرات الضغط 

و الصور الموجودة عالمكتب 
عشان تحفزني ، تضحكني ، تساعدني عالتركيز

عدة الانقاذ حقتي


كل شي في الحياة هنا ماشا الله ، حتى في مشرط على فكرة xD

هو الفكرة بس انه يكون قريب منكم الأشياء الأساسية الي تحتاجوها ، 
أقلام ملونة - أقلام تحديد - مسطرة - فواصل .. إلخ

العلب الدائرية و المستطيلة دي كانت علب عطور و شموع 

و كتبت الطريقة في الانستقرام زمان 

بالنسبة لطريقتي الرسمية في المزاكرة 

فهي اني أجيب مجموعة أوراق و أكتب فيها النقاط المهمة في المنهج

يعني لو في مقارنات - تعاريف - تعداد ممكن يلخبطني أو أنساه

أقوم أسجله بالألوان و بشكل مرتب و جداول و خرائط ذهنية

زي لمن وريتكم هنا


فكرة الخرائط الذهنية


في كتب في جرير مفيدة عن الخرائط الذهنية 
أو حتى لو بحثتوا في جوجل حتستفيدوا كتير

فكرتها انكم تحطوا الموضوع الأساسي في دائرة كبيرة في الوسط

و تخرجوا منها فروع عريضة ملونة 

و ماينفع تكرروا الألوان 

و الأفضل تكتبوا بالأزرق وبشكل عريض ، 
زي المكتوب على الفروع الحمرا

و أسهل لكم لو تستبدلوا الكلمات بالرسوم ، 
ترسخ في الذهن أسرع

أنا حقتي معقدة شوية و تلخبط بس ممكن تاخدوا كل عنوان 
و تسووا له خريطة لوحدها

مثلاً خريطة لأنواع المدراء 

و خريطة تانية لصفات المدراء 

و خريطة تالتة لمهام المدراء

أو مهما كانت العناوين الي تدرسوها طبعاً

هادي الحركة حتسهل عليكم المراجعة و الاستذكار باذن الله

أدوات الكتابة


ورق مسطر - ورق لاصق - أقلام تحديد - أقلام ملونة أساسية

الورق عشان أكتب فيه جدول اختباراتي و أحطه على جدر المكتب

أو عشان أعطي نفسي عبارات تحفيزية بين صفحات المنهج

أو عشان أسجل ملاحظات مهمة على نقطة معينة

و حاولوا ماتختاروا ألوان تعور العين أو تجهدها

● تخزين الورق


أحب أخزنه في ملف واحد يصير الوصول لها يكون أسهل
 
أو أحياناً أستفيد من الدفاتر الي تكون فيها تقسيمات 
يصير أرتاح و أضمن انه مافي شي حيضيع ان شا الله 

* الملف على فكرة من تنسيق أفنان ، 
أكيد عارفين أفنان القلب مين مايحتاج أعبر :p * 

و تقدروا انتوا بنفسكم تزينوا دفاتركم أو ملفاتكم بالشكل الي يعجبكم

سواء عبارات تحفيزية - صور تفرحكم - ألوان تنشطكم .. إلخ

أسوي المراجعات و الملخصات من بدري

يعني مثلاً الأسبوع دا خلصنا فصل كامل 
أقوم أحاول أنسق جدول آخر الأسبوع بحيث انه أشتغل عليه

مو اني أزاكره و أضغط نفسي ، 
كاني أتصفح الفصل بس عشان أعرف محتواه 

يصير لمن يتحدد الاختبار و كدا ما أجلس أحوس و أتجنن
و أكرف نفسي قبلها عشان ألخص و أزاكر و أراجع

تطبيق مبدأ العقاب الفوري

يعني مثلاً لو انه دوبي خلصت سطر من المذاكرة 
أقوم أفتح الجوال ، و لا أجلس أشخمط و أنسى اش كنت بسوي

فأعاقب نفسي في ساعتها ، 
مثلاً أحط الجوال سايلنت و بعيد عني
* أنا أحتاجه قريب عشان لمن أبحث عن شي *
أو رح أسحب 5 دقايق من وقت البريك
أو آكل شي صحي ماحبه زي مثلاً الطماطم xD

في حركة جيدة بس تعور :p
تحطوا من الشريط اللاصق أو لصق الجروح على اليد 
و كل ما تفقدوا التركيز تسحبوا وحدة و بسرعة 
عشان تتنشط عندك الحواس من جديد 
* فيها اجرام شوية بس مفيدة *

التوكل على الله

طبيعي انه الواحد يخلص نيته لله
و انه دا كله التعب في سبيل طلب العلم
لانه الرسول عليه السلام قال 
" من التمس طريقاً يلتمس فيه علماً ، 
سهل الله له به طريقاً إلى الجنة

و دائماً حطوا قدامكم الهدف الي تبغوا تنجزوه
هل هو علامات كاملة؟
هل هو شهادة امتياز؟
هل هي مرتبة شرف؟
 مهما كان هدفكم صغير أو سخيف في نظر الآخرين
فاشتغلوا عليه طالما انتوا مقتنعين بيه 

و في الأخير ، أبداً لا تيئسوا بمجرد انكم أخدتوا علامات سيئة
ماهي نهاية العالم ، لسى في فرص تانية حتجي عشان تعوضوها
باذن الله

وسائل التواصل معايا في أعلى الصفحة عاليمين

ابقوا سُعداء

- بيانولا ~ 

0 comments:

Post a Comment