Thursday, November 20, 2014

سلسلة الحلم الأبيض: 1- تجهيزات الملكة و الزواج

 
السلام عليكم

سوو تدوينة اليوم حتكون نوعاً ما مختلفة 
و شخصياً أحسها مميزة

لانه أستمتع لمن أتكلم عن الموضوع دا 
و أساعد أحد في التخطيط :p

أول شي مبروك للي مقبلين على زواج 
و الله يكتب الخير للي ما أنكتب لهم النصيب لسى

يلا بسم الله ..

الي حقوله دحين يتطبق في الملكة و الزواج ، 
بس طبعاً بتحديد المسؤوليات لأنه كتيرين يسووا زواجات مشتركة 
فعشان لاتصير لخبطة اعرفي اش لكِ و اش لهم

فـ بسم الله نبدأ

1/ الميزانية 

 
حددي قد ايش تبي تدفعي في المناسبة دي ، 
وكل ما وفرتي كل ماكان أحسن لك

2/ المكان


هل حتسويه في بيتكم ؟
في استراحة ؟
في قاعة ؟
و إزا قاعة ، هل قاعة منفصلة و لا قاعة في فندق ؟
هل المكان يوفر لك الاضاءة المناسبة؟ الكيكة؟ 
غرفة للعروسة عشان التصوير والتغيير؟ 
العصيرات؟ البوفيه؟ الضيافة؟ 

3/ الصالون 

 
 روحي أكتر من واحد عشان تقرري ، 
و أطلبي انك تشوفي شغل المكياج و الشعر

حعطيكم لستة لصوالين رحت سألت عنها في بداية 2014 

* هادي الأسعار تبع الملكة ، 
وفي صوالين تختلف باقات الزواج عن الملكة *

* الي سويت عندهم * -> منَّة سنتر في الخالدية

2200 مكياج مع رموش - شعر - لون أظافر

 3000 مكياج مع رموش - شعر - أظافر - 
فتلة - حمام مغربي - حلاوة - منيكير

أنصح بـ نوال للشعر و إيمان للمكياج

--

صالون لمسات في الخالدية

3300 مكياج - شعر - أظافر - مساج - واكس - تغذية

--

زواريه في التحلية ورا كارتييه

2500 مكياج - شعر - فتلة - بديكير - منيكير

--

كلود مكسيم جنب زواريه 

4000 مكياج - شعر - حمام مغربي - تنظيف بشرة - 
بديكير - مناكير - حواجب

3000 مكياج - شعر بدون بروفة

--

ديمتريوس في التحلية قدام مركز التحلية

2500 مكياج مع رموش - شعر

--

ريما سنتر 

1400 مكياج مع رموش - شعر - تنظيف بشرة
1000 مكياج - شعر

4/ المصورة


عندك حسابات كتير مشهورة في الانستقرام زي

taw_2am
amalhmadd
helm_photography
missfelemban
orjisk
taghreedfelemban
cindiana_photographer
wahajsalem_studio

أو روحي لاستديوهات تصوير محلية ، 
عندك مثلاً الروضة و شارع قريش كتيرين هناك و أرخص نوعاً ما
5/ الفستان


تفصيل و لا جاهز؟
اش تبي لونه ؟
كيف تبي شكله ؟

بالنسبة للشكل قصدي هل تبيه يكون ماسك عليكي ، 
أو ماسك من فوق ومنفوش من أسفل *ذيل السمكة* ، 
و لا تبيه زي حق سندريلا؟ 
 
 
 لو حتسوي الملكة منفصلة عن الزواج ، 

فأنصح بـ لون بارز ، 
يعني حتى لو تبي وردي لاتاخدي وردي فاتح مرة 
عشان ليلة الفرح تكون طلة الأبيض مميزة

و على اختيار اللون و الشكل فدا راجع لك ، 
عادي لو رحتي المحلات والبوتيكات و جلستي تقيسي و تجربي

مو لازم تشتري من عندهم بس أقلها يكون عندك فكرة 
عن الشكل و اللون المناسب لكِ

و لو لقيتي فستان عجبك بس ناقصته نفشة ، 
يصير تزودي طبقات في الجيبون عشان يتنفش 

محلات للفساتين:

- لو عندك فيزا و مانتي مستعجلة 
فأنصحك جداً جداً جداً بالموقع دا ( هــنــا

أسعار فساتين السهرة و الزواج عندهم رخيصة جداً 
مقارنة بأسعار الأسواق ، و جودتهم عالية

و يشحنوا دايركت على السعودية عن طريق آرامكس 

جربتهم في 3 فساتين و شوز كمان الله يكرمكم 
و مرة مبسوطة من الخدمة و الخامة ماشا الله

لو ينفع أوريكم كان وريتكم :$ ، 
أستنوا كم شهر و أنزل بوست خاص بيها لو تبوا xD

- لو ميزانيتك تسمح لك فـ : 
دائماً و أبداً محلات ديميتريوس الي في جدة مول 

و برضوا مو لازم تشتري منهم 
بس روحي أتفرجي و قيسي و أتصوري و أطلعي :p

فستان شبكتي كان من عندهم ، 
نزلتلكم صورته في تاق أسرار دولابك

- عندك سوق اليمامة
سوق لمسات *الي قدام البوادي*
سوق النجار 

هادولا أسعارهم أقل نسبياً من ديمتريوس 
و بعض المحلات هناك عندهم تفصيل 

6/ الجزمة 


لو انتِ طويلة الله يحميكِ و الباشا طويل فانتِ في نعمة 
الله يديمها عليكِ لانه مارح تحتاجي كعب وماحد حيدري عنك 

ألبسي فلات مزين و تصير مية مية :p ، 
بس مايمنع انك تلبسي كعب لو حابة !

أما إزا انتِ ربنا كرمك بطول سنفوري زيي 
فعاد أستحملي و ألبسي كعب غصباً عنك xD

حاولي لمن تختاري الكعب يكون عريض شوية + فيله رفعة من قدام 
* ماهو أساسي لكنهم مريحين أكتر من عكسهم *

و تقدري تاخدي كعب سادة و تزينيه بنفسك
شوفي في جوجل DIY wedding heels


7/ المسكة


طبعاً تنسقيها بحسب لون فستانك 

لو غامق فالمسكة فاتحة و العكس 

و لو فستانك فيه شغل كتير فخلي الباقة بسيطة 

و تقدري تدخلي لولو و لا كريستال بسيط كمان

خشي موقع Pintrest و أكتبي Bridal Bouquet 
وتطلعلك أشكال كتير مرة 


8/ الطرحة 
<- للزواج بس 


شخصياً أشوف:

تاخديها قصيرة لو الفستان له ذيل و مشتغل من ورا 

و تاخديها طويلة لو الفستان من ورا صامت 


9/ اكسسوار الشعر

إما تاج أو ورود أو كريستال 


10/ اختيار التسريحة و المكياج

هو المتعارف عليه انه في الشبكة الشعر يكون نازل و الزواج مرفوع 

بس مو شرط تلتزمي بالقانون الفلة دا لو انتِ مايناسبك واحد فيهم





 
بالنسبة للمكياج ،عندك خيارات كتيرة

لو تحبي الشغل الهادي فروحي للورديات أو الترابيات الناعمة

و لو تحبي المكياج يكون قوي فممكن السموكي التقيل أو الكلاسيكي القوي
* شخصياً ما أحبذه*



و في صور عندي لقيتها في الجوال قلت تفيدكم ان شا الله (: 









تقريباً كدا خلصنا أول جزئية حمدلله .. 

يلا يا عروسة ريحي xD

الجزء التاني حيكون ان شا الله عن الدبش و تجهيز العروسة 

و الجزء التالت الي هو الاستعداد النفسي و الجدِّي 
مع كلام بيني وبينكم D;

تحبوا أسوي جزء فرعي للعناية الشخصية قبل الفرح وكدا؟ 
أستنى تعليقاتكم D:

وسائل التواصل معايا في أعلى الصفحة عاليمين

ابقوا سُعداء

- بيانولا ~

2 comments:

  1. thanks u so much
    http://chatc2.blogspot.com/

    ReplyDelete
  2. thanks u so much
    http://chatc2.blogspot.com/

    ReplyDelete