Thursday, November 6, 2014

تحدي 100 كتاب - الجزء الخامس

 

السلام عليكم 

سوو لو أول مرة تقرئوا عن تحدي الـ  100 كتاب فتقدروا تبحثوا 
في خانة البحث حقت المدونة عن " 100 كتاب " وحتطلعلكم النتايج

* في كتب كتير كتبت عنها في الانستقرام فحنسخ الكلام الي كتبته هنا ، 
وتقدروا تشيكوا عالبوستات الأصلية على هاشتاق #BeenBooks *


بالنسبة لكتب شهر سبتمبر

 I've Got Your Number



*هي نفس الي كتبت Confessions of a Shopaholic*. ق
صة الكتاب انه بنت تضيع دبلتها وجوالها وتلاقي جوال في الزبالة 
فتقرر تستعمله الين تلاقي خاتمها لكن تكتشف انه في غيرها بيطالب بالجوال. 
حياتين تتداخل في بعضها في مواقف مضحكة و غريبة ، 
أول كتاب يخليني أضحك عالمواقف الي فيله 😂. وكنت أتمنى لو يعملوا منها فيلم 
لانه خلاص كل الشخصيات والأماكن رتبتها في مخي 
وأنا أقرأ بصراحة 🌚❤️. المصطلحات الي فيله سهلة نسبيا، 
في كلمات كانت جديدة عليا شخصيا فحست شوية لكن مرة ممتعة و مسلية.

 A Long Way Down



القصة انه ٤ يقرروا ينتحروا وبالصدفة يختاروا نفس البقعة 
و مع حصول حدث ورا التاني يقطعوا عهد انه ماينتحروا إلا بعد ٦ أسابيع. 
 الرواية مضحكة جدا و فيها أحداث رهيبة 
بس بعدين فقدت حماسي بعد ٨٠٪ من الكتاب ماعرف ليش ، 
حسيت في مط وقرقرة كتير. بس عموما مرة جميل ودرامي 👌. 

If I Stay



الرواية لها جزء مدري جزئين زيادة ، قصتها انه بنت يصير لها حادث 
هي وأهلها وهي تدخل في غيبوبة لكن نفسها واعية 
وتقدر تتنقل وتسوي كل شي بس ماحد يشوفها فتبدأ رحلة الاختيار 
بين الحياة والموت. في البداية كنت مرررة متحمسة للرواية 
وبعدين طفشت و في النهاية حقددددت 🔫. 
ماعرف كيف الفيلم بس أتمنى يكون ماخد كل أجزاء الرواية 
وحاططها فيه لانه أبدا ماعندي استعداد أكمل قراءة البقية

ادارة الأداء


قرأته عشان بدرس المادة ، 
أستفدت منه و شرحه مختصر و سلس ومرة عجبني

Stolen


الرواية أسلوبها رسالة بنت للي خطفها لمن كان عمرها ١٦ سنة. ب
تحكي من البداية إلى النهاية. لأول مرة أتعاطف مع مجرم 🚶 ، 
الكاتبة عرفت تنتج قصة تخليكم تحبوا الشخصية غصبا عنكم ، 
عمركم شفتوا خاطف يسوي بنفسه خاتم من حجر غالي عشان الي خطفها؟ 😭 
هادا أنا أبرؤه مع بوسة على راسه 
*واضح جدا انه جاتني متلازمة ستوكهولم* 😅 
بس عموما عموما الرواية حلوة وخفيفة وتعيشكم جو المناطق النائية 
والحر لانهم عاشوا في صحراء منعزلة عن العالم

The Giver

 
القصة انه الناس عايشة في عالم مثالي روتيني مافيله حروب 
ولا متعة ولا ألوان ويجي واحد اسمه جوناس ويطلع ان عنده قدرات مميزة 
تؤهله انه ياخد ذكريات الأجداد ويختبر المشاعر المنبوذة. 
 من ناحية فلسفية فهو حلو عشان الواحد يفكر قد ايش الحاجات الصغيرة 
في الحياة هي الي تكوننا وتغيرنا بس في كزا حاجة ماقدرت أفهمها 
يعني مسلا ليش يخلوهم يختبروا المشاعر دي ازا هم رافضينها؟ 
ماخلاص يخلوها تندفن. الجو العام للكتاب والرواية كان بارد و ممل شوية ، 
كان يحتاج شوية حبكة مزبوطة. نوعا ما أتحطمت آمالي فيه

ثم لم يبقَ أحد


أول رواية أقراها لآغاثا كريستي و وقعت في غرامها بشكل مجنون ، 
القصة انه 10 أشخاص غرباء يتجمعوا في جزيرة 
و يبدأ كل واحد منهم يموت طبقاً لأنشودة قديمة. 
حبكة الرواية جية من العالم الآخر ! 
مرة حلوة و ممتعة و النهاية تخليكم تقولوا: ايش؟ كيف؟ لحظة اش دا؟!! xD

Forbidden


رواية غريبة عن أخ و أخت من دم واحد يحبوا بعض 
بسبب مصاعب الحياة الي واجهتهم.
شوفوا بصراحة على آخر الرواية مرة مرة مرة حزنت عليهم ، 
مع انهم مختلين و يبالهم اعادة تأهيل
بس حقيقي الي يحصل يزعل :(

Everything I Never Told You

رواية تتكلم عن موت ليديا و محاولة أهلها لفك غموض القصة 
و يبدئوا يكتشفوا أسرار و أمور عجيبة.

ماعجبتني كتير ، مملة و كلامها كتير و ماله داعي 

قونقليز


خلاصتها: رواية مادري اش تبغى ، حقيقي ناسية حتى قصتها /:

 شهر أكتوبر:

فن قراءة الوجوه للدكتور أيمن

مايوصل مية صفحة و حتى الآن مو عاجبني كتير، 
ماعرف ليش في كتب للفراسة تحسوها يمسكوا فئة ويجلسوا يحشوها 
ويقولوا كلام وحش عنهم 😒. يعني يقدروا يقولوا ان الصفات دي 
ظهرت بكثرة عند فئة محددة بس لانه غلط يعمموا العلم البشري دا ع
لى كل الناس ولا مثلا ، الي عنده ذقن مدبب دا واحد ضيق الأفق 
والتفكير وفي نفس الوقت يحب الاستطلاع والفضول .. 
طيب ؟ 😶 اش الانفصام دا؟؟

The Duff



رواية كوميدية رومانسية تتكلم عن حياة بيانكا 
و كيف تتعايش وسط صاحباتها الي أحلى منها وأيامها 
مع أكتر ولد تكرهه في المدرسة. رواية خفيفة وتسلي مرة، 
مادري ازا تنباع النسخة الورقية عندنا بس تقدروا تلاقوها 
أونلاين مجانا أو من أمازون

Adultery 

روحدة متزوجة و غنية وعندها بزورة بس ماهي مبسوطة ، 
تحس انه في شي ناقص في حياتها فتلجئ إلى الخيانة الزوجية كمهرب. 
طبعا برضوا الرواية كلها فلسفة و فيها عمق نفسي 
زي أي كتابات تانية من باولو. أنقال لي انه الرواية 
مارح تدخل عندنا السعودية بس ماعرف مدى صحة المعلومة دي، 
بس مارح أنصدم لو كان الشي دا صحيح 😅. 
باولو شوية أتحمس في الوصف والأحداث في بعض المقاطع، 
يعني أتخيلوا رواية احدى عشر دقيقة برشات من خمسين ظل لقري. 
 المهم على الصعيد الفلسفي فهي حلوة و عجبتني ، 
بالرغم من اني كرهت ليندا ونفسي أرميها من البلكونة 
بس كمية الصراع الداخلي والتضاربات الي كانت عايشتها 
تحمسك انه تكمل وتشوف اش حتهبب في الأخير

عودة ادريسي


قبل ما أقرؤه كنت أتخيله كتاب فلسفي وجودي 
ولمن بدأت فيه طلع شي مختلف كليا! 
يفكركم بأقوم قيلا لكن بشكل مرتب وأمتع .. 
صفحة ١٥ بالذات هي الي حمستني وخلتني أبى أخلص الكتاب في جلسة وحدة! 
بتتكلم عن بعض القصص النبوية والآيات القرآنية وتشرح لنا ندين بأسلوب لطيف وسلس جدا ماشاء الله 👌 وخلتني أستوعب حاجات ماقد فكرت فيها. أنصحكم بيه خصوصا انه الكتاب مايوصل ١٣٠ صفحة ، يعني مرة قليل 😅

Wrath of Angels


رواية تتكلم عن حطام طائرة وُجِد في غابة و علاقتها بحوادث تحصل في المدينة 

هي نوعاً ما سلسلة لأنه البطل له أكتر من كتاب بس منفصلين عن بعض

جداً تحمس و تخوف و ان شا الله رح أشوف لي كتب تانية لنفس الكاتب 

The Girl Next Door


عارفين كيف أحيانا شي واحد ممكن يغير حياتكم في لحظة ؟؟ 
هادا الي صار معايا بعد ماخلصت الرواية دي. 
أنا شفت الفيلم حقها زمان وحقيقي اتأثرت و حقدت وزعلت 
بس الرواية كانت شي تاني كليا ، خلتني أحس بالغل والألم والخوف، 
قلبي كان مقبوض الين آخر صفحة 😢. القصة باختصار مقتبسة عن حادثة 
حصلت في الستينات عن بنت عمرها ١٦ سنة ماتت بسبب تعذيب خالتها
و أولاد الجيران لها. يعني الي كانوا يسووه حقيقي مايتقبله أي انسان عاقل! 
والي كان يرفع الضغط انه البنت لمن راحت تكلم المأمور حق البلدة 
ماصدقها وقالها هادي زي أمك ولازم تسمعيلها!!. 
مصلحات الكتاب مابين سهلة لمتوسطة وما أنصح بيه أي أحد 
بسبب الوصف التعذيبي الي فيه. 
و مع ذلك ترى الكتاب عجبني لان المؤلف عرف يوصل الحياة 
الي كانت عايشتها البنت وأختها وكيف انه في ناس منزوعة 
من قلوبها الرحمة يالطيف

The Five People You Meet in Heaven
 

من أشهر كتب ميتش آلبوم و من أكبرها احباطاً ليا !

يعني اوكيه الفكرة حلوة انه واحد يموت وهو بيحاول ينقذ بنت صغيرة ففي البرزخ يقابل 5 أشخاص يشرحوا له حاجات حصلت في حياته وكيف انها مترتبة على بعض

بس المضمون كان مرة سطحي و غير جذاب أبداً

The Woman in Black

رواية مرعبة كلاسيكية و انعمل لها فيلم في 2013 تقريباً أو 10 
بطولة الوسيم دانييل ريديلكيف 

القصة عن واحد يروح قرية و يلاحظ وجود امرأة بالأسود تلاحقه 
و يشوفها في أغرب الأماكن 

لأول مرة حقول انه الفيلم أحلى بمراحل من الرواية !

الرواية مملة و فيها تمطيط غبي

سارة


أول كتاب أقراه للكاتب و أعتقد انه كان غلطة 😅. شخصيا ماحبيت الأسلوب في البداية بس بعد كدا أتحمست للغة والأسلوب .. حسيت انه كان يبى يورينا نظرة الرجل للبنت المنفتحة ضد البنت المتحفظة. بس برضوا ماعجبتني كتير ، مافيها الشي الي يجذب أو يرسخ في الذهن مع الأسف

الأدب في خطر

 بيتكلم عن تطور الأدب ، نوعاً ما أستمتعت بيه بس ماحبيت الترجمة أبداً

اجتياح - حنين الغامدي

مافي صورة للغلاف و هو كان حق أختي أصلاً ورجعته لها :$

بس موجود في جرير ، غلافه أبيض و أسود و غريب 

كتاب جميل وخفيف ومفيد مرة من ناحية انه يعيد بناء الثقة في نفسك و يعطيك أمل في الحياة و كمان فيله نصايح مرة حلوة للحياة العامة 

Eat That Frog


كان توصية و جداً أنبسطت لاني أشتريته حمدلله ، الكتاب محفز و مساعد كتير في المواضيع المؤجلة أو قلة التخطيط و التنفيذ

وأنا أقراه أحس أبى أخلص بسرعة عشان أطبق الي قراته ، وفيله اقتباسات مرة حلوة تشجع الواحد


العهد الأخير


تعرفوني قد ايش أتحمس لقصص الجن و الشياطين! و أنا كنت أدور على دي الرواية من 2013 إن ماكان قبلها 

ولمن لقيتها في جرير و قرأتها جاني شوية احباط ، الفكرة نفسها مرة حلوة انه كيف الجن عايشين في نظر المؤلف و كيف سقط عهدهم و و و.

بس الأسلوب و الحوار والحبكة كانوا سيئين

The Monk Who Sold His Ferrari


قصة شخص ناجح و مليونير بعد ماجاته جلطة و رحلته للتغيير إلى الأفضل.

حلو و فيله حاجات تفيد لو كنت محبط أو نفسك في كتاب يجمعلك ملخصات معظم كتب تطوير الذات التانية

وسائل التواصل معايا في أعلى الصفحة عاليمين

ابقوا سُعداء

- بيانولا ~

1 comment:

  1. ثانكيوووو، بوستات الكتب مرة تساعد في الاختيار. ثانكيوو

    ReplyDelete