Thursday, November 27, 2014

سلسلة الحلم الأبيض: 2- العناية الشخصية



السلام عليكم 

سوو نزولاً لرغباتكم قدمت البوست دا على الدبش :p

بس بصراحة أنا أؤمن بحاجة معينة، مصطلح عناية العروس 
مستعمل للتسويق للمنتجات بس 

و لا مافي عطر خاص للعروسة 
و البنت الي ماهي متزوجة حرام تستعمله 

هو طالما انتِ تنتبهي لنفسك و مخصصة عناية 
يومية - أسبوعية - شهرية لنفسك فخلاص انتِ زي الفل

النظافة و الدلع ماهي حكر على حالتك الاجتماعية أبداً 

النظافة الشخصية طبعاً هادي كلنا بنسويها 
لأنها من الضروريات و من الدين الاسلامي كمان

* الملابس النظيفة - الاستحمام - مزيل العرق - 
نتف/حلق الشعر - التعطر *

في حاجات تانية زايدة احنا بنسويها كبنات 
من باب الاهتمام زي الماسكات - المقشرات - المرطبات .. إلخ

حنفترض انه في عروسة فقدت الذاكرة 
و ضاعت أشيائها و حتبدأ تجهز من الصفر 

1) اعرفِ نوع بشرتك و شوفي اش فيها عيوب واضحة تحتاج علاج 
* و الأفضل انك تستشيري دكتور جلدية مختص*
أول شي عشان نفسك ، تاني حاجة عشان ماتضطري تخفي العيوب بالمكياج 
سواء عشان زوجك أو عشان أحد تاني ، 
تالت حاجة عشان وقت الفرح ماتحتاجي كونسيلر تقيل يكتم بشرتك


2) جيبي دفتر و قلم ملون و سوي جدول لعنايتك الدورية
يعني مثلاً يومياً: استحمام - ترطيب كامل للجسم *بمعدل مرتين*
أسبوعياً: تقصير الأظافر - تقشير للوجه و الجسم - قناع للوجه
شهرياً: قناع للشعر - حلق/نتف الشعر - الاغتسال و التطيب - حمام مغربي

أقنعة أنصح بيها:


1- شوفان مطحون - عسل - نقطة موية ، 
بعد ماتغسلي وجهك بالغسول حطيه ربع ساعة 
و غسليه بالفرك بشويش 
رح يمتص الدهون الزايدة الي بالوجه 
و يعطي روقان للوجه أو تقدري تستبدليه بقناع بودي شوب ، 
نفس المكونات و جاهز 


2- عسل طبيعي ، 15 دقيقة على وجه نظيف يقتل البكتيريا 
و يساعد في مشاكل الحبوب و الآثار



3- قناع بودي شوب بالأعشاب البحرية 
نفس تأثير قناع رقم 1

4- الأقنعة الجاهزة من ذا فيس شوب ، 
كتبت تقييمات عن بعضها الي جربتها 
في الانستقرام في #BeenSkin

مقشرات للجسم:

إما بشكل طبيعي بحيث انك تخلطي سكر مع أي نوع زيت طبيعي 
مع موية ورد و شوية ليمون لو حبيتي

عرضي جسمك لموية حارة عشان تنفك المسام 
و أبدئي أفركي بحركة دائرية و بعدها غسلي جسمك بموية باردة 
عشان تتقفل المسام

و بعد أي عملية تقشير ضروري ترطبي جسمك ، 
والأفضل مرطب غير معطر عشان مايتحسس الجلد

أو حقت المحلات عندك من سوب آند قلوري ، بودي شوب ، نزيه

أقنعة الشعر:

اختاري زيت طبيعي و حطيه في شعرك لنص ساعة 
و بعدين غسليه و أتروشي عادي

أو تقدري تختاري من الماسكات الجاهزة بس شخصياً 
ماحبها كتير أحسها تسبب لي تساقط  

و طبعاً لو عندك مشاكل تساقط ، قشرة ، جفاف
استشيري صيدلي أو دكتور

الحمام المغربي

  
دحين ماحكتب شي كتير غير اني أقولكم مودة كتبت عنه قبل كدا

( هـــنــا )

3) عطور ، كريمات ، مسك ، عود 

احنا كبنات في كتير مننا مايحب الروتين و يطفش بسرعة ، أولكم أنا xD

فبنسبة 90% ، شريك حياتك يحب التجديد و التغيير

فانتِ جددي في حاجات صغيرة بس بيكون لها أثر كبير

زي مثلاً العطور، خلي لكِ عطر للنهار .. 
عطر لليل خاص بالبيت .. عطر للمناسبات و السهرات

حقت النهار حاولي تشوفي روائح خفيفة رايحة على زهور - 
فاكهة - أعشاب
و حقت السهرات شوفي شي بـ خشب الصندل - 
المسك - العود - الزهور البرية

نفس الشي للكريمات ، كريم ترطيب غير معطر ، 
كريم عطره خفيف زهري للنهار ، كريم معطر لليل 

ملحوظة * الكريمات المعطرة ماتسبب اسمرار في البشرة 
إلا لو أتعرضتي لشمس بدون واقي *

لكن ممكن تسبب حساسية للبعض ، فشوفي اش يناسبك انتِ

العود أو المسك ، شخصياً ماعندي خبرة قوية في المحلات الكويسة 
لكن جربت مسك العروسة حق العربية للعود وعجبتني ريحته كتير 

4) الأسنان


كتيرين بنات يقولوا لي يبوا يسووا تبييض 
شخصياً ما أؤيد الفكرة لأنه الي أعرفه التبييض 
يضعف الطبقة الي تحمي الأسنان 

بس تقدروا تسووا تنظيف دوري عن دكاترة الأسنان 
و تخففوا من الصبغات ، المنبهات ، الحلويات 

و تستعملوا المعجون 3 مرات في اليوم

5) الأيدي و الأرجل


كتبت تدوينة عن العناية [ هـنـا ]

+ لمن تغسلي الصحون و الكاسات استعملي Gloves
عشان يدك ماتخشن و تنشف

و اتأكدي انك غسلتي يدك و رطبتيها كويس بعدها

6) اهتمي بأكلك و شربك مزبوط

 
بمعنى انه يكون عندك وعي بالحاجات الي تاكليها
قللي الجنك فود ، الشيبس ، الغازيات ، الحلويات

انتِ بس جربي شهر واحد بدونها ، 
شوفي كيف جسمك و صحتك حيتغيروا للأحسن 

كتري فاكهة و خضار ، أعصريها ، أخلطيها ، قطعيها

زي ماتبغي ، المهم لا يخلص اليوم وانتِ ما أكلتِ شي منها

اشربي موية دافية مع شرائح ليمون ، 
رح تنظف جسمك و تصفي الوجه 

أو موية مع ماء الورد

أو زنجبيل مغلي 

كلها تساعد عالتنظيف 

7) سيلوليت ، خطوط بيضاء ، ترهلات 

هادي حلولها الرياضة و الأكل الصحي 

لازملها التزام صارم .. 

حطي قدامك هدف أو صورة للشكل الي تبيه 

وحتوصليله ان شاء الله 

8) ألغي الكسل و التسويف من حياتك


رح تعدي عليكي أيام تقولي فيها لنفسك:
هادا مو لازم يصير اليوم ، خليه بكرة
و تستمري على كدا للأبد

من هنا حتبدأ نقطة السقوط 
لازم تجبري نفسك على الشي الي بتسويه 
عشان توصلي للي تبغيه

و اعرفي انه مافي شي حيصير بين ليلة و ضحاها
لازم تتعبي و تجري عشان تكوني أحسن من أمس

في نقاط ما أتكلمت عنها و أنا عارفة انه كتيرين منكم كانوا يستنوها
بس حقيقي أنا ماعندي الصلاحية في إني أتكلم فيها أبداً
أو إنه أنا ماقد جربتها فماذكرتها من الأساس
تقدروا تستشيروا دكاترتكم أضمن و أفضل

وسائل التواصل معايا في أعلى الصفحة عاليمين

ابقوا سُعداء

- بيانولا ~

0 comments:

Post a Comment