Thursday, November 13, 2014

عناية بيانولا للشعر

 
السلام عليكم

بدون مقدمات تضيع وقت :$

يلا نبدأ بسم الله

طبيعة شعري عادية حمدلله، 
أحياناً يكون جاف بحسب تقلب الجو 

و هو حالياً قصير ، يعني طوله يوقف عند آخر الرقبة 

بشكل عام ماعندي شامبو معين أحب أستعمله دايماً ، 
كل فترة و التانية أغير 

حالياً مازلت على أورغانيكس الي بالآرغان 

ماني شايفته بيسوي شي سيئ لشعري حمدلله ، 
و في نفس الوقت ماحسه ينشف لمن ماحط شي بعده

جربت دوف وبرضوا يعجبني لانه يعطي ترطيب ، 
و جربت لوريال الأسود وكمان كان عاجبني 

بالنسبة للعناية ، بعد الاستحمام أنشفه بالمنشفة و أركز عالأطراف

و بعدها أستعمل له زيت للشعر 
* بإني أبخ منه على يدي بختين و أفركه عالأطراف و شوية على جوا *

هادا كتير أتكلمت عنه في الانستقرام xD

أخدته من صيدلية بوتس ، هو بس زيت جوز الهند ، 
وفايدته انه يغذي الشعر زي باقي الزيوت 
و يعطي لمعة صحية و يخفف التقصف
 

 زيت الآرغان من ذا بودي شوب


زي مانتوا شايفين ماستعملته كتير ، 
بخة وحدة تكفي شعري النقطة :$

دا ريحته طبعاً أحلى ، تفكرني بالياسمين ماعرف ليش ، 
و شخصياً ماشفت الين دحين شي مميز ، 
يعني ماضيعتي شي خرافي على نفسك لو ماشتريته ، 
يقولوا انه جيد للمساج ، لمن تطول يديني و أقدر أمسج نفسي 
حقولكم رأيي ان شا الله لوول
 
و أحياناً بدل الزيوت أستعمل كريمات للشعر 

 

 هادا من نفس الخط حق الشامبو الي بستعمله حالياً ، 
صح انه بخاخ بس الي يخرج كانه كريم 

و لمن ينحط عالشعر مايعطي ترطيب كافي ، يعني شي بسيط مرة ، 
هادا حلو لليوم التاني من الاستحمام أو قبل النوم مثلاً

عشان يعطي ريحة حلوة فقط لا أكثر و لا أقل

كريم جوز الهند من بالمرز


 كتبت عنه في الانستقرام ، 
هو شمعي قوامه فممكن يكون مزعج للبعض

فأنا أحب أستعمله لمن ينشف شعري ، 
و أحط مررة شوية عشان لا يبان شعري مدهن 

و ريحته جوز هند مرررة ، فاللي مايحب الريحة ماحيعجبه xD

هو للتصفيف أكتر من كونه لتغذية الشعر 

بالنسبة للشامبوهات الجافة
جداً مناسبة للبنات الي شعورهم دهنية عند الفروة 
و حتى للبنات الي يبوا يعطوا كثافة لشعورهم 

هادا أخدته من صيدلية بوتس بس يبالك تبخي من بعيد 
و تفركي كويس عشان لايقعد الأثر الأبيض


دا برضوا يعطي نفس غرض الأول ، 
بس انه من تركيا مو من هنا :$ .. بس قلت أديكم خيار برضوا 
 

و تقدري تستبدليهم ببودرة جونسون للأطفال ، 
بس افركي كويس

بالنسبة لبداية كل شهر


ليا فترة بحب أستعمل زيت الصبار لشعري ، 
أحطه للأطراف و ألفه نص ساعة و بعدين أغسله عادي

بس لاتفكروا تشموا ريحته أو تتأثروا بلونه ههههههه

لاحظت انه أعطى كثافة ماشا الله و طول شوية ، 
خصوصاً انه له فترة مايبى يطول ولا سم

بس حاولوا ماتحطوا كتير أو توصلوه للفروة ، 
شخصياً صعب أخرجه و يطفشني xD

موجود في الصيدليات و السوبرماركتس

آخر نقطة بخصوص التسريح 

قبل ما أستعمل السشوار أو الفير بستعمل بخاخ واقي للحرارة


موجود في الصيدليات و أحياناً السوبر ماركتات الكبيرة

ماعرف بصراحة لو يسوي شي ولا بس دلع xD

بس حقيقي لاحظت شعري مايطيح بنفس معدل الأوقات الي ما أستعمله فيها حمدلله

و بخصوص موضوع الفير ، 
عارفين كيف تجيكم أيام مرة مالكم نفس تتعبوا 
و تسشوروا و تسووا فير؟

أنا أعتبر دا الشي المنقذ حقي


أحطه على كل الشعر و أبدأ ألف الخصل 
و أحط لهم بنس و أسيبه لـ 4-8 ساعات و أفكه 

و شويه تمشيط باليد و يصير ويفي جبار :D

أو مثلاً بدل مثبت الشعر ، حطيه على كل الشعر 
و أستعملي الفير عليه و لفيه ببنس و بس 

و بس تقريباً دا الي أسويه لشعري ، 
ماعمل أي شي غريب أو مجنون xD

طبعاً غير انه الواحد يهتم بغذاءه 
و شربه و المكملات الغذائية الي يحتاجها .. إلخ

و في تدوينة أتكلمت فيها عن أساسيات العناية بالشعر


وسائل التواصل معايا في أعلى الصفحة عاليمين

ابقوا سُعداء

- بيانولا ~

2 comments:

  1. ثانكيووو
    كنت حاطه ببالي اشتري الزيت من ا بودي شوب،بس احس خف حماسي هه
    عكسك تماماً قبل ثلاث سنين لما كنت احط زيت كنت اركز عاجذور اككثر شي��
    تسلم ايديك

    ReplyDelete
  2. كريم بالمرز بجوز الهند رائع، و فعلا كثرته تجعل الشعر دهني، شكرا جزيلا لك

    ReplyDelete