Thursday, December 25, 2014

تحدي 100 كتاب الجزء السادس و الأخير

 
السلام عليكم

وصلنا لآخر مرحلة في تحدي 100 كتاب 

و الحمدلله يارب خلصت 104 كتاب قبل نهاية 2014 ماشاء الله

نبدأ بكتب نوفمبر

رواية قاطف الفراولة


كتبت تقييمي عنه في الانستقرام ( هــنــا )

رواية Anna & The French Kiss


رواية كوميدية/رومانسية 
تتكلم عن آنا البنت الي يرسلوها أهلها فرنسا عشان تدرس
و حياتها هناك والمواقف الي تحصل لها
 مع طلاب السكن و صعوبة اللغة عليها

الرواية جداً لطيفة و خفيفة و منجد تضيع وقت و تونس بصراحة 

في منها جزئين تانية بنفس الفكرة ، ابحثوا عن الكاتبة و حتلاقوها

4/5

رواية After Dark 


تتكلم عن مجموعة أشخاص تبدأ حيواتهم في الليل متأخر

- أختين ، وحدة عارضة أزياء والتانية طالبة تهرب 
من مشاكل البيت بإنها تقرأ في مطعم الين الفجر
- صاحبة فندق و مشكلتها مع المومس الصينية 
- غريب يزعم معرفته بهم كلهم 

الرواية زي روايات موراكامي الباقية ، 
كدا جوها مرة غريب و يقشعر ، صرت أحب أسلوب اليابانيين منه هو 

4/5

رواية The Country Club


عن نادي سري للأثرياء يتم فيه خطف عامة الشعب 
و اجراء تجارب سادية / مضطربة عليهم حتى الموت

من الروايات الي جابتلي غثيان و أنا انسانة ماتقرف أبداً من الرعب 

بس طريقة الوصف يالله كانه قدامي بيصير الشي دا

3/5

رواية الزنبقة السوداء


رواية كلاسيكية تتكلم عن مزارع يبى يشارك في 
مسابقة زرع زنبقة سوداء صافية 
و تصير له مشكلة و ينسجن و يحاول بشتى الطرق انه يفوز بالمسابقة 
حتى و هو في السجن

على انها كلاسيكية بس متخلفة شوية xD ، آسفة يعني بس جداً طفوية و سطحية 

2/5

رواية Piercing 


تتكلم عن أب مضطرب يتخيل انه جالس يطعن بنته الصغيرة وهي نايمة 
و لقاؤه الغريب ببنت عندها هوس بانها تآذي نفسها كل مايحصل لها شي

برضوا من الروايات اليابانية الغريبة و المجنونة ، بس ما أستمتعت بيها 

2/5

كتاب رقائق القرآن



بيتكلم عن معجزات القرآن البلاغية و الواقعية 

كتاب حلو كفائدة دينية بس سيئ كترغيب و دعوة 

3/5

كتاب من قال انه عالم الرجال؟



بيعلم المرأة الطرق الي تساعدها في انها تنجح في حياتها كـ أم و كموظفة 

3/5

- - - 

بالنسبة لكتب ديسمبر

مدينة الموتى ( مخطوطة ابن اسحاق #1)


* كتبت عنها في الانستقرام في هاشتاق #BeenBooks *

رواية رعب تتكلم عن يوسف الي يشتري كتاب قديم 
ويكتشف انه مربوط بالسحر و عالم الجن 

حقيقي الرواية دي مرة رائعة كأدب الجن و العالم الآخر 

لاتقولوا لي حوجن و الجنية و مدري ايش ، دا يتفوق عليهم بمرااااحل 

هادا الي منجد رعب و آكشن ، 
صح انه في أجزاء كانت هبلة مرة بس بشكل عام مرة جيدة

3/5

المرتد ( مخطوطة ابن اسحاق #2 )


الجزء التاني من السلسلة

يحمس أكتر بكتير من الأول 

4/5

  We Were Liars

 
* كتبت عنها في الانستقرام في هاشتاق #BeenBooks *

رواية تتكلم عن بنت بتقضي كل صيف في جزيرة مع أهلها و أصحابها
ويحصل لهم موقف يغير حيواتهم كلياً

الرواية فيها شي غريب يجذبك ، يخليك تبى تخلص الكتاب بأسرع وقت 

مع انه وسط القراءة تحس انه اش دا مافي شي 

لكن لمن توصلوا لآخر صفحة حتجيكم ديك الصدمة ! 

4/5

Please Look After Mother

 
كتبت عنه من ضمن كتبي المفضلة زمان 
بس المرة دي قرأت النسخة الانجليزية

وهي تتفوق على النسخة العربية بكتييير 
خصوصاً انه في أجزاء محذوفة !
مع انه مافيها حاجة تستحق الحذف يعني 

4/5

Thinner

 
رواية الرعب الي عملوا منها فيلم

تتكلم عن واحد يدهس غجرية فقبيلة الغجر تنتقم منه 
بانها تلعنه لعنة تموته بشكل بطيء

حلوة و تحمس في البداية بس بعد ماوصلت للنص أو بعده بشوية 
بدأت أطفش وصرت أقرأ بسرعة بسرعة عشان أخلصها

3/5

شيروفوبيا


رواية تتكلم عن تداخل حياة شاب و شابة بشكل عجيب 
و محاولات كل واحد منهم انه ينسى الماضي ويعيش حياته 

رواية من النمط العادي ، فكرة الفوبيا كانت محاولة يائسة
 من الكاتب انه يكون لها طعم مختلف

 2/5

13 Reasons Why


رواية تتكلم عن هانا بيكر ، البنت الي أنتحرت
و أرسلت 13 سبب لكل شخص كان سبب في انتحارها

القصة تحمس لكن المحتوى جداً سيء

الأسباب سخيفة و الأسلوب عبيط 

1/5

Right to Life

رواية مرعبة تتكلم عن وحدة حامل تنخطف و تتعذب

ماعجبتني كتير وحسيت فيها شي ناقص 

2/5

و بكدا خلصنا تحدي الكتاب الحمدلله يارب 

وسائل التواصل معايا في أعلى الصفحة عاليمين 

ابقوا سُعداء

- بيانولا ~

1 comment:

  1. شكراً كثير، مرة مفيدة مراجعتك صراحة
    تساعد عالاختيار،، كونقراااتز ال100 كتاب
    ثانكيوووو

    ReplyDelete