Thursday, December 4, 2014

سلسلة الحلم الأبيض: 3- الدبش، نصائح و أفكار



السلام عليكم

طبعاً مرحلة الدبش أمتع و أتعب مرحلة قبل الزواج

فحقولكم على نقاط بسيطة تفيدكم ان شاء الله


1) حطي المبلغ في حساب خاص في البنك

كدا عشان ماتحسي انه في يدك فلوس وتجلسي تصرفيها بدون تفكير

2) تعاونوا على قضاء حوائجكم بالكتمان

يعني مو لازم فلانة و علانة تعرف كم مهرك 
و من فين رايحة تشتري و كم صرفتي 

لأنه دا شي يخصك انتِ لوحدك 
و ماتعرفي اش في نفس كل وحدة تعرفيها
حطي في بالك عالأقل 15% منهم 
بشكل غير واعي تضمر حقد/حسد لأي أحد سعيد



3) أبداً لاتفكري انك تصرفي كل المهر في التجهيز

بكل بساطة لانك ماكنتي عايشة في مجاعة 
وماعندك قطع جديدة أو مرتبة
أو مافبالك تشتري مثلاً بعد الزواج شي !

خلي عالأقل 40% منه قاعد عشان ينفعك مستقبلاً ان شاء الله

4) سوي جرد لدولاب ملابسك 
عشان تشوفي اش عندك قطع جديدة 
أو مرتبة ينفع تاخديها معاكِ
و تشوفي اش ناقصك 

5) جيبي ورقة و قلم و سجلي الناقص 

مثلاً محتاجة قمصان - صندل بيج .. إلخ

6) لاتلتزمي بعدد سحري

يعني مو تقولي والله حروح أشتري 20 قميص نوم ولا 30 بنطلون
مرة غلط كدا .. خديلك مجموعة بسيطة جداً 
لأنه حتجيكِ هدايا من صاحباتك
و غير كدا بعد الزواج حتنزلوا السوق سوا 
وتختاروا ملابس لبعض دا طبيعي
بالإضافة لانه في احتمالية تغير الوزن إما زيادة أو نقصان

7) لاتشتري كل القطع الي عالموضة

لأنه حتجي فترة و موضتها تموت ومارح تعجبك وحتترمي
ركزي عالكلاسيكيات والألوان والطبعات الي تظهر جمالك

8) خصصي جزء من المبلغ للذهب

دحين سعر الذهب نازل ، روحي محلات الذهب المزبوطة 
و أشتريلك  طقم ولا متفرقات
عشان تخشي بشي مرتب و عشان تكون استثمار حلو لكِ



9) كل شي تشتريه تكتبيه 

عشان تعرفي الفلوس دي فين راحت و كيف جات
و ماتشتري شي مكرر 



10) لاتاخدي رأي أحد

انتِ الي حتلبسي بالتالي لبسك يعكس ذوقك 
ممكن إزا مرة مرة ، تاخدي معاكِ وحدة قريبة منك

غير كدا حتنسد نفسك و تطفشي عمرك من اختلاف الآراء


11) اشتري بحكمة

يعني لو مانتِ مستعجلة لاتشتري من دحين 

استني التخفيضات تنزل ، خصوصاً عالقطع الرئيسية 

و كمان معناها لاتصرفي 30% منه على شنطة وحدة ولا فستان !

نفسك فيه من زمان؟ أتوظفي و أتعبي و بعدين أشتري الي تبيه ياعيني  

12) فرحي أهلك

بمعنى بعد ماتخلصي جهازك ، أفتكري أمك و أبوكِ بحاجة بسيطة ، 
مثلاً عطر و لا كبك و لا ساعة 

حيفرحوا كتير انك أفتكرتيهم ، خصوصاً انهم تعبوا معاكِ

 
13) الصدقة

حاولي تتصدقي بمبلغ بسيط منه
أو تكفلي يتيم 
أو تشتري بجزء منه موية و ساندويتش 
وتوزعيه على الي ينظفوا في الشارع

----

 طيب ، نبدأ بـ ايش أشتري؟

بعد ماراجعتي دولابك و عرفتي اش ناقصك 
حقولك على قطع أساسية لاتنسيها

- طقم استقبال 
بمعنى انه لو أحد جا زاركم
و أحلى شي في كونك عروسة انه مافي حاجة اسمها 
" لبسك اليوم أوفر " إلا لو زودتيها xD 

محلات FG4 و Mango و Femi9 
و حتى سنتربوينت أحياناً تلاقي عندهم قطع أنيقة 

مثلاً

دا من FG4

ممكن القطع دي تكون فستان ، بلوزة وبنطلون ، تنورة ، جمب سوت 
أهم شي تنتبهي عالخامة و النقشة .. 
يعني أبتعدي عن القطنيات في الفئة دي

- طقم زيارات

هادي تلبسيها لمن تروحي لأحد ، 

حلو لو أخدتي طقم تنورة ميدي أو بنطلون و جاكيت مفتوح 
ويكونوا موردين ، أو انه لونهم واحد 

لون أوف وايت - نيلي - وردي باهت .. 
اختاري الي يناسب درجتك 

وتفصيلهم سهل جداً ، أعطي أي خياط في الحياة مقاساتك 
و الشكل الي تبيه وهو يسويلك زيها 



أو تقدري ممكن فساتين ناعمة ملونة ، 
أو فستان صامت و اكسسوارات ملونة * الشوز - الشنطة *

- أطقم حجاب

بمعنى انه لو كنتِ حتجلسي مع أشخاص ماهم محارمك أو في سفر 


- ملابس البيت

* فساتين - بناطيل - تنانير قصيرة .. إلخ *

لاتعلقي على نوع واحد ، 
شكلي و غيري في الألوان والموديلات

- فساتين السهرة

غالباً في أول 4 شهور من زواجكم أهلك حيجبروكي 
تروحي المناسبات الكبيرة بفستان فرحك :p

فعندك خيارين: إما تنصاعي لرغباتهم وتتعزبي 
أو تشوفيلك فستان أبيض فخم و مريح
و يكون مناسب لعروسة و تهلكيه لبس

- ملابس النوم

ماحتعمق فيها ، انتِ أدرى باحتياجاتك

بس نفس الشي الي قلته ، لاتعلقي على نوع واحد ، 
شكلي مابين بجامات لقمصان لشورتات 

- الاكسسوارات
كـ جزم و شنط ، خلي شي للاستعمال اليومي 
و شي للزيارات و شي للمناسبات الكبيرة

يعني ممكن غرضين أو 3 لكل مناسبة

و كاسسوارات تانية فالأفضل تلتزمي بالذهب - اللولو - الأحجار .. 
ومافي مانع شوية اكسسوار عادي بس لاتكتري لأنه مصيره يترمي

----

كـ عناية



- المكياج

خدي الأساسيات خصوصاً لو مانتي كييفة مكياج 
أو تحبي البساطة عموماً

و أرجوكِ أرجوكِ لاتقولي مارح أحط مكياج عشانه .. 
لاتحطي عشانه ، حطي عشان نفسك و عشان تكسري الروتين 
ومو شرط كل يوم فل ميك اب !

اعرفي فين نقاط قوتك و أظهريها صح .. أستعملي ذكائك

تقريباً الأساسيات هي نفسها حقت ( أساسيات الجامعة 101 )
بالإضافة انه في بلوقرز كتير أتكلموا عن الأساسيات
من ضمنهم مودة

و ازا انتِ من النوع الي يسوي مكياجه في الصوالين 
فحتخففي حمولة على نفسك xD

مو شرط كله تشتريه من سيفورا و لا وجوه ، 
عادي تخشي سنتربوينت ولا موقع درق ستور وتشتري منه الي يعجبك


- العطور

عطر للنهار
عطر لليل
عطر للمناسبات

- الكريمات 

نفس الشي  
+ خدي واحد يكون بدون عطور 
كترطيب عادي 
 --

طيب كدا نقول خلصنا تجهيز ، دحين تعليب

عندك خيار انك تحطي ملابسك في شنط سفر كبيرة ومرتبة 
أو من الصناديق المزخرفة زي دي


تنباع حوالي 20 حبة أو 15 حبة مع بعض بأحجام مختلفة 
بـ 170 إلى 300 ريال باختلاف المكان و الحجم

أنا حقتي كدا شكلها ، ماتتخيلوا منظري و أنا أشوفها من برا المحل xD

أخدتها بـ 160 ريال تقريباً من الخاسكية .. 
فين بالزبط؟ لاتسألوني :$ 

بس عموماً انتوا لو لفيتوا في الخاسكية والهنداوية 
دايماً تلاقوا حاجات كيوت كدا

و كمان سوق الشاطئ عنده هادي الدوائر ، 
الكبيرة الوحدة بـ 50 ريال


---

بعد كدا لو حابة تسوي حركة الطيبين و تلفيها بالتل 
مع فيونكة وورد عادي برضوا xD

و بس ياعروسة .. 

بقي جزئين و نخلص السلسلة ان شاء الله 

- الاستعداد النفسي
- الاستعداد في أسبوع الفرح

لو في شي معين حابين أتكلم عنه قولوا لي (:

وسائل التواصل معايا في أعلى الصفحة عاليمين

ابقوا سُعداء

- بيانولا ~

1 comment: