Thursday, December 11, 2014

سلسلة الحلم الأبيض: 4- الاستعداد النفسي/المعرفي للزواج


السلام عليكم

سوو خلصنا التجهيزات المادية و اللفلفة و الحوسة حمدلله

دحين نجي لجزء أهم من كل دا 

فـ يلا بسم الله:

طبعاً كونك متزوجة الآن معناه إنك داخلة حياة جديدة مختلفة 
عن الي كنتِ عايشتها في بيت أهلك

انتِ الآن مسئولة عن بيت و عائلة ، 
يعني لازم تحكمي قراراتك و أفعالك و توزنيها صح 

لازم تحطي في بالك انه انتوا ماتعرفوا عادات بعض 
مهما طالت فترة الملكة أو قصرت

لأنه الزيارات والخرجات أبداً مو زي لمن تسكني معاه في بيت واحد 

أكيد حتصدر منه أفعال تضايقك أو انتِ تقولي شي يضايقه ، 
طبيعي جداً و دا الشي كويس عشان تعرفوا كيف تحسنوا من أنفسكم

الحياة مارح تكون كلها بمبي و فوشي و أحمريكا ، 
وبنفس الوقت مارح تكون كلها نكد و غم و أشغال


- أي شي كنتِ تسويه في بيت أهلك تخليه هناك 

بمعنى انه مثلاً لو كنتِ من النوع الي ينام من الفجر الين قرب العصر 
* بالرغم من انه غلط أساساً سواء كنتِ متزوجة أو لاء * 
لكن ضرره دحين أكبر

أو تخرجي مع صاحباتك فجأة بدون سابق انذار

أو تسيبي غرفتك مقلوبة فوق تحت و ما همك شي


- حسسي زوجك انه مهم بالنسبالك 
 
قومي معاه وقت دوامه جهزي ملابسه أعمليله فطور خفيف 
أو أعملي سلطة فواكه يشيلها معاه للدوام
و حصنيه قبل لايخرج و أستودعيه الله

أتطمنتي عليه وخرج؟ كملي نومك إزا مانتِ انسانة صباحية 
وقبل رجعته بساعتين قومي و أتنشطي و أتزبطي وشوفي الغدا

ما أقولك خشي المطبخ و أعملي قدر كوزي xD ، 
و مو شرط انك تطبخي أساساً في بدايات زواجكم
إلا لو زوجك كييف أكل بيت ، الله يعينك :p

بس مقصدي انه جهزي لقمة ياكلها بعد مايرجع من دوامه مهلوك ، 
سواء طلبتِ من برا أو وصيتي أحد من أهلك يجيب لك 
أو خرجتي من الفريزر أكل جاهز ودخلتيه الفرن

انتِ موظفة أو طالبة؟ 
الله يخلي الدليفري (: .. وفي مواقع فيها خيارات أكل كتيرة
 زي Hello Food و طلبات دوت كوم


- كونك مسئولة عن بيت لايعني إنك حرة في تصرفاتك

يعني من آداب العشرة انك تقولي لزوجك 
انك تبي تخرجي للمكان الفلاني ، 
أو حتعزمي الناس الفلانية 

أو مثلاً رايحة للدكتور الفلاني 
أو حابة تشتري حاجة معينة 
* الحاجات الكبيرة مثلاً جهاز أو أثاث أو تغيير جدر *

لأنه مبدأ ( أحطه قدام الأمر الواقع ) غلط ، 
مانتِ في حلبة مصارعة (:

انتوا في عالم مشترك واحد و لازم يكون في مشاركة بيناتكم


- في فرق بين الدلع و تقالة الدم 

بعض البنات الي حواليا يقولوا لي 
أنا كل يوم والتاني أزعل مع زوجي/خطيبي 
عشان أعرف قدري عنده
 أو عشان أخليه يسوي لي الشي الفلاني 
أو عشان أبين له انه زعلي جامد و راسي يابس

 زوجك رح يستحملك مرة مرتين تلاااااتة بالكتير 
وبعدين حيقولك روحي أرمي نفسك من الشباك أريح 

لاتخلي دموعك ولا زعلك سلاح لأي حاجة تحصل بينكم!

آسف ميزانيتي ماتسمح أشتري ألماس دحين 
* لحظة صمت و بكاء مرير *

معليش خلي الخرجة يوم تاني مرة تعبان من الشغل 
* انت ماتحبني و جري عالغرفة مع طيحة حياة الفهد *

حبيبتي اش رايك الويك اند دا مانروح بيت أهلك و نقعد أنا وانتِ سوا؟ 
* انت تبى ربنا يسخطني ؟! ، جرية عالحمام مع عويل *

غلط ياعيني ، 
والي كتبته فوق ماهو مزحة لانه حقيقي يحصل بكثرة !

مو على كل لحظة رفض تزعلي و تلوي وشك ، 
اش خليتي أجل للمواقف الضرورية المهمة؟ 

خليه يعرف انك ماتزعلي إلا في الشديد القوي 
و انك ساعتها لو زعلتي حقيقي حيحتاج يقلب الأرض عشان يرضيكِ
لأنه مو عارف اش حيسوي و كيف حترضي و اش حيرضيكي

أما لو كل شوية نفسنتي عليه حيقول حتصفى لوحدها 
و يحط رجل على رجل ويتفرج Game of Thrones ويطنشك


- سيبي دور الرجال له هو 

في بنات مننا يكونوا في بيوت أهاليهم ماشاء الله الآمر الناهي 
و هي الي تجيب سباك و تكلم كهربائي وتصلح أنبوبة 

أبداً لاتبيني انك تعرفي للمهام الصعبة ، 
لأنه حيعتمد عليكِ و يقعد هو مرتاح ومافراسه شي 
هنا أتدلعي براحتك و حسسيه بأهمية العمل الي يسويه 
* في حال انه صلح حاجة أو ركب شي
أو حتى لو جاب لك حاجة أو وداكِ مكان *

غير كدا كمان لاتتعلي عليه ، 
يعني لاتحسسيه انه كلمتك انتِ الي حتمشي و هو مع نفسه 

تبي طلباتك تصير أوامر؟ أختاري الكلام والفعل الصح 

شوفي في قاعدة عامة منتشرة و هي انه 
( الرجال عبارة عن أطفال كبار )

عارفة كيف الولد الصغير لمن تعطيه حلاوة ينبسط 
و عادي يسويلك أي شي ؟ 

اهو الرجال نفس الشي (:

لو قالك حنسوي كدا كدا ، قوليله طيب اش رايك لو سوينا كيت و كيت ، 
أحسه حيكون أحسن عشان كزا كزا 

أو طيب ينفع المرة دي نسوي كدا كدا ؟ 

أبتعدي كلياً عن صيغة الأمر ، 
أفتكري العبارة دي و كل شي حيجي لحدك 
ان شاء الله 

* بس لاتاخديها حلاوة ترى مو دايماً حيمشيلك xD *


- الزوج في القاموس العربي لايعني الفانوس السحري 

كتير مننا يحسب انه طالما أنا أتزوجت 
يعني زوجي غني و حيجيب لي كل شي كان نفسي فيه

أو لمجرد كوني متزوجة يعني حتحول من 
زبونة في الهرم إلى كلاينت في لوي فويتو

مرة غلط /: ! طبعاً ماقولك لاتبسطي نفسك أو تتجملي ، 
لكن في حدود المعقول 

هو ما أتزوجك عشان يحقق لك أحلامك المادية ! 

سبق و قلت لكم : نفسك في حاجة من زمان؟ 
أشتغلي و أتعبي عليها بعدين أشتريها بنفسك

نفس الشي للمطاعم ، المستشفيات .. إلخ 

مو لازم كل يوم تتعشوا في Fine Dining Restaurants ، 
صح في بداية المشوار ايوا و دلع وكله بس ماتاخديها واجب قومي !


- لفح النار بالنار سبب رئيسي لتصدعات الزواج 

لو كنتوا تتكلموا في موضوع مهم وفجأة هو عصب 
و صار يصرخ أو يقول كلام عشوائي مستفز 
ويحاول يلقي اللوم عليكِ

مو توقفي في وجهه وتردي عليه 
و تبيني له انك قوية و انه لكِ لسان و و و 

كلنا عندنا ألسن ياعيني وكلنا نعرف نرد ، 
بس فكري اش حيصير بعد ماتخلص المعركة؟

مارح يعجبك الوضع بعدها أبداً 
و حتكرهي نفسك و تقولي ياليت و لو

كتير رجال تنعمي بصايرهم لمن يعصبوا أو يزعلوا 

فعندك حلين :

إما تسيبيه يردح زي مايبغى عشان لايفجر طاقته السلبية 
في أشياء تزعلك أكتر 
ولمن يخلص قوليله ماحينفع نتناقش وانت زعلان كدا ، 
لمن تهدأ بعدين نتفاهم بهدوء وعقلانية

أو تشتغلي دلع عليه و قفلي عالموضوع سريع سريع .. 
وي ياقلبي اشبك عصبت كدا؟ بسم الله عليك الموضوع مايستاهل 
تعال أجلس خلاص ماحنتكلم في الموضوع دحين بس انت روق ، 
دحين أجيب لك شي بارد تشربه

أهم نقطة انك لاتخليه يخرج البيت أو ينام و هو زعلان

براحته يرقع أبواب البيت و لايحبس نفسه في غرفة ، 
عادي أهم شي انتِ ضامنة انه معاكِ 

و 90% من الرجال بعد ماينفجروا 
يحبوا يقعدوا لوحدهم أبو ساعة كدا أو اتنين ، 

سيبيه و لاتزني عليه
حتلاقيه هو جالك أو خرج من الغرفة أو سوا أي شي 
يبين لك انه مستعد للكلام أو انه روق 

و إزا خرج و انتِ ماقدرتي تخليه يهدأ
فأستودعيه الله و أجلسي أستغفري بنية انه يهدأ ويرجع بالسلامة

بعد ماتخلص العاصفة و جلستوا تتكلموا سوا 

لاتنفجري انتِ فيه ، قوليله اش الي زعلك أول شي ، مثلاً

1- ماحبيت فكرة انك عليت صوتك عليا بالشكل دا 

2- أنا أعرف انك أرقى وأحسن من الألفاظ الي قلتها 

3- أنا متعودة على انك عقلاني و هادئ بس اليوم كنت غير 
بسبب الضغوط الي كنت فيها أكيد و أنا أتفهم الشي دا

4- أباك تعرف اني حوقف جنبك و أدعمك في رأيك وأتقبله 
بس لازم انت في نفس الوقت تعطيني مجال 
أبدي رأيي فيه ونتناقش زي الناس 

خلي عباراتك ( أنا أشوف .. عشان .. - 
من رأيي الأفضل انه .. عشان أحس .. ) 

( أنا ما أقول انه كلامك غلط بس اش رايك 
لو أخدنا جزء من كلامك و أضفنا عليه جزء من رأيي )

في بنات حيقولوا هادا اسمه ضعف 
و كدا حيخليكي ممسحة لجزمته و حتصيري بلا قوة .. إلخ

أنا من وجهة نظري أشوفها حكمة ، لأنه كدا الحق حيكون معاكِ انتِ 
لأنك ما أتصرفتي بهمجية أو زودتي غضبه
و الرسول عليه الصلاة والسلام أشاد بالشخص 
الي يتحكم في نفسه عند الغضب

و العصبية و المشاجرات من أفعال الشيطان 
لأنها بتؤدي لزعل و توتر و فجوات بين الأشخاص 

و طبيعي الانسان لمن يكون زعلان بيقول كلام يندم عليه بعدين
لأنه ماكان يقصد انه يقوله 
 
 ومافيها شي انك تبيني له بأسلوب راقي 
انه كلامه وفعله ضايقك و أثر فيكِ 

من حقك انك تعبري عن مشاعرك ، بس المهم هو " كيف ؟ " 


- التعبير عن المحبة يختلف من شخص لآخر

مثلاً لو كنتِ تعبري عن حبك بهدايا و أشعار ، 
لاتتوقعي انه هو كمان نفس الشي

في رجال كتير يعبروا عن محبتهم بالفعل ، 
لمن بيخاف عليكي ، يريحك ، 
يوديكي مكان تحبيه ، يشيل غسيله ويسويه بنفسه :p 
مثلاُ يعني لوول

لكون الرجل مابيجيب لك وردة كل يوم
 و ما يفاجئك بهدية في دولاب الملابس مو معناها انه مايحبك 

معناها انه له طرق أخرى في التعبير 

و برضوا مافي مانع انك توصليله انتِ اش تحبي بأسلوب لطيف 

انتِ تعرفي انه متضايق منك أو مو مرتاح معاكِ
لمن يكون معاكِ في نفس المكان وبيتجاهلك 

أو سهراته كتيرة مرة مرة لدرجة انه يادوبك تشوفيه 

في رجال تجيهم صدمة شوية من فكرة الزواج 
فيحاولوا يتقبلوها بانهم يهربوا من البيت 
* مو الهرب الحرفي ، بس انه يشغلوا أنفسهم برا *
و الرجل بطبيعته مايحب الروتين 
فعادي يخرج لوحده أو مع أصحابه
عشان يحس انه حر ومافي شي يخنقه


- عاونوا بعض في الخير 

يعني لو كنتوا سهرانين سوا ، 
قوليله اش رايك نقوم نصلي الوتر بما اننا صاحيين؟ 

أو اتفقوا انكم ماتناموا إلا و انتوا قارئين 
سورة من القرآن و محصنين أنفسكم 

أو بمناسبة مرور شهر عالزواج ، اكفلوا يتيم سوا - 
وزعوا أكل أو أظرف فيها فلوس عالمساكين و الفقراء

كوني انتِ السباقة للخير ، يعني انتِ صحيه للفجر ، 
انتِ قوميه للصلاة لو كان كسلان 

في أيام الإجازات حاولوا تصوموا الأيام البيض أو يومين الأسبوع 

كل فترة و التانية أبعتيله على جواله أذكار يرددها

مافي أحلى من العبادات لمن تسووها سوا ، 
تحسوا في انشراح في صدوركم و توفيق بيناتكم سبحان الله


- صلة الرحم جداً جداً جداً مهمة 

يعني لاتقويه على أهله! 
بدون أهله ترى ماكان قابلتيه أساساً 

لو قعدتوا فترة طويلة بدون ماتكلموا أهله أو تزوروهم 
أقترحي عليه تروحوا لهم وتسهروا عندهم 

أو تعزموهم برا أو تعمليلهم حلا وتروحوا زيارة خفيفة
* ومو شرط حرفياً تعمليه ، 
الله يخلي المحلات والانستقرام :p *

حتى لو شفتِ شي يضايقك من أحد من أهله ، 
أسكتي و أستحملي لانهم في مرتبة أهلك 

إلا لو كان يضر أهلك أو يضرك انتِ على محمل جدِّي


- أهلك مارح يهاجروا لـ بورا بورا بعد ماتتزوجي 

يعني مالها داعي بعد ليلة الفرح ولا بعد شهر العسل 
تقوليله أبى أروح لأهلي 
ولا أبى أبات عند أهلي يومين 

ترى تحسسيه انه جالس يضايقك في حاجة
 أو انك مو مرتاحة معاه 

من حقك تشوفي أهلك وتقعدي معاهم
 بس الأولى انك تكوني معاه! 

و لاتفرضي قانون الـ " كل سبت أروح لأهلي " ، 
لاتحددي زيارة أهلك بوقت 

انتِ كدا تربطيهم وتطفشيهم 
و كمان تطفشي ولد الناس معاكي /:

 
- أخرجي و أنبسطي بس فكري في الوقت أول 

يعني لو أشتهيتِ تخرجي السوق 
أو حابة تزوري صاحبتك .. إلخ 

رتبي جدول خرجتك مع جدوله هو ، 
عشان لايقعد هو في البيت يعد الطوب 
حق الجدران و انتِ برا مبسوطة

شوفي مثلاُ يوم مخطط يخرج مع أصحابه 
أو رايح لأهله في زيارة خاصة ، 
قوليله انك حابة تعملي كدا كدا 

بحيث انه كلكم تخلصوا مشاويركم 
بدون ما واحد يحط يده على خده و يستنى التاني يرجع 

ماقدرتي تخرجي ، أعزمي أحد لعندك يونسك 

ماحد فاضي يجيكي ، أجلسي أعملي يوغا ، أتفرجي موفي ، 
ألبسي بجامة الأرنب الممسوح 
و أتفرجي مدرسة المشاغبين وكلي كنتاكي لوحدك xD

ولو مثلاً خارج مع شلة صغيرة وفي منهم متزوجين 
أو عندهم أخوات ، 
أقترحي عليه انهم يتجمعوا في البيت عندكم

بحيث انه مثلاً الرجال يقعدوا في الجلسة 
و انتوا تجلسوا في الصالون ، من باب #كسر_الروتين

و من باب انك تتعرفي على أهل أصحابه وكدا 

آخر نقطة مهمة أبى أقولكم هي


- لا تسلمي إدنك ولسانك للناس

بمعنى انه لاتحكي صاحبتك/أهلك كل شي يصير بينكم
و لا على أقل حاجة رحتي أشتكيتي عند كبار العيلة 
مرة غلط ، مشاكلكم انتوا تحلوها بأنفسكم
مالها داعي تدخلوا الجار و القريب و الغريب

و كمان لاتخلي أحد يتحكم في تصرفاتك تجاه زوجك

خصوصاً لو كان في نصيحتها خراب بيوت !

انتِ أتزوجتيه و هو أتزوجك انتِ

ما أتزوج صاحبتك صاحبة الرأي الفتاك !

و مو لازم تحكي الناس والله اليوم زوجي فاجئني بهدية
والله اليوم زوجي جاب لي تزاكر سفر
والله زوجي وأنا كأننا أسعد اتنين في العالم!

كدا رح تسببي غبنة للناس 
وتجيبي لأنفسكم العين والحسد لاسمح الله

و لو وحدة كانت تشكيلك عن زوجها 
لاتقوليلها والله زوجي ماقد سوا كدا بالعكس مريحني و و و

لاتجيبي سيرة زوجك 
و قوليلها ان شاء الله ربنا حيفرجلك همك 
و يسعدكم سوا 

يعني واسيها وريحيها بالكلام 

أعيد و أكرر الناس ماتحب الخير لغيرها إلا ماندر 
خلي حياتك لنفسك و لاتشاركيها للناس

سواء بالكلام أو بالصور
أو بحالة الواتس اب
" الله يخليك ليا يازوجي 
وشكراً على الخاتم السوليتير ياااي "

مرة مالها داعي ، تبي تطبقي (( و أما بنعمة ربك فحدِّث ))
شوفيلك نعمة غير ابن الحلال 
 
و بس هادا الي في بالي 

الله يوفقكم و يسعدكم كلكم ويحفظكم من كل عين وحسد

بقي جزء واحد ونخلص السلسلة ان شاء الله 

ابقوا سُعداء

- بيانولا ~

2 comments:

  1. تدويييينه جدددا جميييله ونصاايح قيمة للغايه عجبتني ❤

    ReplyDelete
  2. حكم حكم ����
    بس انا وحده تعاني من غيرة ام الزوج الشديييده
    واحترت كيف اتعامل معاها .. الله يعين

    ReplyDelete