Friday, December 19, 2014

سلسلة الحلم الأبيض: 5- الاستعداد لـ اليوم الموعود


السلام عليكم

اليوم ان شاء الله آخر تدوينة للسلسلة الجميلة دي

حنتكلم عن يومك يا عروسة 

فـ يلا بسم الله


في البيت
- خدي قسط كافي من النوم عشان وراكِ كرف جامد يومها xD

- لاتنامي الين الظهر 
لأنه أكيد الصالون حيقولك تكوني عندنا 3 أو 2 فلاتروحي وجه مفقع
أصحي على الساعة 11 أو 12 ونص بالكتير ، أتروشي و جهزي نفسك 
و جهزي شنطتك الي حتاخديها الصالون ، فيها سناك و فلوس و اكسسواراتك والطرحة لاتنسيها 

- سوي قائمة بالحاجات الي تبي تاخديها قاعة الفرح 
*أهلك يشيلوها معاهم*
دي الخطوة جداً ضرورية عشان أعرف وحدة الله يستر عليها
 نسيت جزمة الفرح في بيت أهلها داك اليوم :P

- خليكِ حنونة
يعني مهما حصل لاتعصبي ولاتتنفري على أهلك ، 
لانهم هم كمان مضغوطين و بيحاولوا قد مايقدروا انهم يسعدوكِ

- أعطِ معدتك حقها
غالباً مع التوتر شوية حتتلخبطي وتقولي ماحاكل، 
بس حاولي تاكلي شي مايهيج معدتك
مثلاً بسكوت - فاكهة - سندويتش صغير - مكسرات

في الطريق/الصالون:

- فكري بايجابية
أبتعدي كلياً عن تخويف الذات ، يعني لاتقولي يالله خلاص 
حبعد عن أهلي خلاص حعيش مع واحد غريب ، 
بلاشي الدراما ياقلبي عشان بس 
تحللي عالأقل فلوس المكياج الي دفعتيها xD

فكري فيها بانه ربنا فتح لك أبواب الخير والبركة 
و قد ايش في طرق جديدة لانك تكسبي حسنات وتقربي من ربنا ، 
وعشان توري فلانة بنت عم ولد خال فلان انه انتِ 
قد المسؤولية وكلهم حيفتخروا فيكي p;

- ريحي عيونك
يعني لاتجلسي كل شوية عالجوال وتكلمي دي 
وتطمني على دا ، اليوم يومك ، لاتستعملي مواقع التواصل الاجتماعي
 إلا لو كان للضرورة القصوى ، أشغلي نفسك بحاجة تنفعك ، 
اقري كتاب ، اتحصني لو نسيتي ، اقري كم صفحة من القران ، 
استغفري بنية انه ربنا يسهلك أمرك

- أتزكري حقوق ربنا عليكِ
يعني أهم شي لاتؤخري الصلاة أو تجمعي و تقصري 
حاولي قد ماتقدري انك تصلي ، 
صدقيني ربنا حيباركلك في ليلتك ان شاء الله لمن تحطيه هو أول شي

- كوني صداقات لحظية 
أجلسي أتكلمي مع الموظفة ، أو لو في عروسة معاكِ
انه مثلاً فين حيكون زواجك ، مين المصورة ، 
في عرايس زواجهم نهاري؟ ، 
اش رايك في *أي حدث اجتماعي حصل قريب* 

دا حيخفف التوتر والتفكير عليكِ و في نفس الوقت تتسلي 

في القاعة

  - قبل الفستان 

حطي كريم مرطب معطر لجسمك و ادهني عود أو مسك 
في أماكن النبض بس * المعصم ، الرقبة *

و بعدين الديودرنت - الشراب أو الهيلاهوب

و أنتبهي وهم يلبسوكِ الفستان ، 
عشان المكياج و الشعر ، 
في مرات مع الحماس وحدة تعطيكي بكوعها 
وهي ماتدري * ترو ستوري ياجماعة*

  - وقت التصوير 

طبعاً دحين أول مرة حيشوفك عريسك بالأبيض فـ BE COOL 
لاتمشي بالفستان و الخيمة الي انتِ فيها له ، 
أستني الين يدخل الغرفة ويجيكِ محل التصوير

و قبل لا تبدئوا تصوير ، حصنوا أنفسكم مع بعض

  - وقت الزفة 

حصنوا أنفسكم تاني و قولوا أدعية التحصين 
و عدد مانتوا ماشيين كبروا في أنفسكم

لاتنسي ضحكتك الحلوة و كل ماحسيتي بتوتر 
كلبشي في يده الين وجهه يحمر 
وتحسيه عينه فرصعت عادي xD

و كلمة بيني وبينك: 

انتِ حتكوني وسط أهلك و أهله يعني نقول 70% 
منهم ستات كبار في السن و متحفظين
فمالها داعي تخلي الناس يتكلموا عليكم بكلام 
وحش بسبب أفعال تشوفوها عادي و انها من حقكم 

ما أختلفنا ، بس لكل شي وقته .. لمن تكونوا لوحدكم سووا الي تبغوه ، 
بس حلاوة العروسة في حياءها و رزانتها

و أرجوكِ لاتبكي لمن تسلمي على مامتك أو ستك 
أو أي أحد ممكن يثير الأغشية الدمعية عندك xD

العريس مسكين حيحس انه هو خاطفك و حينعدم مكياجك 
وحتتحولوا عيلة دراكولا وقت التصوير 
أعتبري نفسك رايحة رحلة :p ، حقيقي مامزح ،
انه لاتحسسي نفسك بانه الموقف شديد 
و قوي و خلاص حبعد عن أهلي

  - جلستك مع أهلك و صاحباتك

حلو انك تجلسي معاهم و تهيصي و تستهبلوا ، 
بس يعني برضوا فكري في العريس الي قاعد يستنى برا في السيارة 
ولا لوحده ياكل معجنات و شابورة في الغرفة ، 
والله أشكالهم تحزن حقيقي :(

لاتقعدي أبو ساعتين و لا الين بعد الفجر في القاعة ، 
المفروض بالكتير 3 تكوني خلاص في السيارة

ترى مصيرك تشوفي الناس دولا كلهم تاني ، 
أستني بعد الفرح ان شاء الله حتجيكم مناسبات كتير 
وحتشوفيهم الين خلاص


- وقتك مع شريك حياتك 

لمن تكونوا سوا في السيارة أو خلاص في الغرفة 
أو محل ماتكونوا يعني 

مرة تانية ، أرجوكِ لاتبكي ، 
إلا لو كنتِ جيعانة هاديك الساعة مسموح لكِ 
تعملي أي شي عشان تاكلي xD

و أنا متأكدة انه حيسوي أي شي ليلتها 
عشان يسعدك و يريحك ، 
فبالمقابل انتِ أسعديه و لاتخليه متوتر أكتر من كدا

و من السنة انكم تصلوا ركعتين شكر لله و تدعوا فيها باللي تحبوه

و انه هو يحط يده على ناصيتك * مقدمة الراس *
 و يقول " اللهم اجعلها ناصية خير و بركة "

و لا تنسوا التسمية في كل شي تسوه 
عشان ربنا يباركلكم في أعمالكم 

و ربنا يوفقكم و يسعدكم سوا و يسخركم لبعض 

أتمنى تكونوا أستفدتوا من السلسلة دي 

و أي استفسارات فوسائل التواصل معايا 
في أعلى الصفحة عاليمين

ابقوا سُعداء

- بيانولا ~

2 comments:

  1. يعطيك العافية ❤️❤️ بس ممكن سؤال �� انتي متزوجة؟

    ReplyDelete
  2. الله يسعدك.. سلسله جميلة و مفيده

    ReplyDelete