Saturday, January 3, 2015

104 كتاب في 365 يوم

 
السلام عليكم

في 2014 الحمدلله قرأت 104 كتاب 

و كانوا يتراوحوا مابين صغار و كبار

تقدروا تشوفوا لستة الكتب الي قرأتها بانكم تبحثوا في المدونة 
عن " تحدي 100 كتاب "

هو أساساً أنا كنت حاطة هدف اني أقرأ 101 كتاب
وبعدها بكم يوم لقيت في الانستقرام تحدي 100 كتاب
فأتحمست ودخلت معاهم

نجي للسؤال الذهبي: كيف سويتها؟

الإجابة بكل بساطة تتلخص في 3 نقاط

1- حددت هدفي

عرفت أنا كم كتاب أبغى و حسبت كم كتاب حقرأ كل شهر 
و أعطيت لنفسي مساحة حرة في الأيام الي كنت مشغولة فيها
و مساحة زايدة كمان عشان ما أطفش من القراءة و أحسها واجب
 
2- حطيت لنفسي دافع

أنا ليش كتبت التحدي من ضمن أهداف 2014؟ 
اش حستفيد بعد ما أحقق الهدف دا؟
كيف حتكون نظرة الناس ليا؟
كيف حيكون أسلوب نقاشي بعد كدا؟
 
3- عرفت أستغل وقتي 

صرت أكثف معدل استغلال الفراغ، 
يعني لمن أكون في السيارة ، في غرف الانتظار ، بريك في الجامعة
صباح الويك اند ، قبل النوم ، بعد الاختبارات 

و قللت فترات نومي ، خصوصاً لمن بنام بدري
 
و أعترف اني أتخليت عن حاجات بسبب القراءة ، 
لكن كلها حاجات ثانوية مقارنة بالهدف الي كنت حاطته

- - -

- أنا يادوبك أقرأ القرآن لسى كمان حقرأ كتب تانية؟؟ 
- اقرأ القرآن أول بعدين تعال أتفلسف
- العبرة مو بالعدد، العبرة بالفائدة
- انت كدا حتدفن نفسك وسط الورق وتنسى الناس
- دا هدف سخيف ، ماتوا الي يقرئوا و يسووا مثقفين

^ هادي بعض من التعليقات الي ممكن تجيكم من أشخاص
 بيستهلكوا أوكسجين و كهربا عالفاضي (:

تجاهلوها كلياً .. انتوا طالما مقتنعين بالهدف و حاطينه قدامكم ، 
مافي أي قوة بشرية حتحبطكم إلا لو سمحتوا لها بكدا 

و كلنا عارفين ربنا حمدلله وعارفين حقوقه علينا
وطالما عرفناه فحنعرف نقسم الوقت بالشكل الي يرضيه ان شاء الله

- - -

تقسيمي للشهور:

كنت حاطة في بالي أقرأ 10 كتب في الشهر 
بمعدل 2 لـ 3 كتب في الأسبوع 
بحيث انه مايعدي يوم إلا و أنا مخلصة 100 صفحة عالأقل

حتشوفوه كتير شوية صح؟

بس انتوا لو أجبرتوا نفسكم في البداية خصوصاً في أوقات فراغكم
حتلاقوا انكم قرأتوا كمية كبيرة
ويصير لمن تنضغطوا في أمور تانية
تقدروا تاخدوا بريك من القراءة 
وانتوا عارفين انكم أنجزتوا جزء كبير

لأنه أنا مو كل الشهور قرأت فيها 10 كتب
في شهور قرأت فيها أكتر شي 5 
بس ماكنت شايلة هم لأنه عارفة 
انه في شهور تانية حقدر أقرأ أكتر

- - - 

كيف كنت أقرأ:

عشان تقدروا تقرئوا أكبر عدد كتب ممكن
لازم تتعلموا القراءة السريعة أو القراءة المسحية
خصوصاً في الروايات أو سطور الحشو 
*الي يكون فيها كلام زايد مو مهم*

في مكتبة جرير كتب تعلم الواحد عالقراءة السريعة
و تقدروا تبحثوا في النت وحتطلعلكم حاجات كتير مفيدة

و لاتخلوا الأجهزة الالكترونية تشغلكم
مو شرط كل ماجاكم تنبيه تفكوه و تشوفوا اش هو 
العالم الافتراضي يقدر يستنى 

و لا تقرئوا وانتوا متضايقين 
ممكن تجيكم نفرة من الكتب

و خلوا جنبكم ورقة و قلم أو بس قلم 
عشان تحددوا عالحاجات الي تعجبكم
أو ازا كنتوا تبوا تبحثوا عن معنى كلمة أو شي

- - -

سجلوا الكتب الي قرأتوها في دفتر
أو في نوت عالجوال بتواريخ الأيام
و على آخر السنة حتحسوا انكم فعلاً أنجزتوا شيء مهم 

- - -

القراءة الورقية ضد القراءة الالكترونية

أنا أدعم الطريقتين بكل ما أوتيت من قوة xD

بداياتي في القراءة كانت ورقية طبعاً ، 
زمان ماكان في سهولة زي دحين

و الورقية عموماً لها طعمها المختلف، 
لأنكم تمسكوا الورق و تحسوا انكم أقرب لكلام الكاتب

* أنا شخصياً أفضل الورقي لمن يكون كتاب علمي 
أو كتاب أدبي قيم وعارفة انه حيعجبني *

بينما الالكترونية فهي مريحة و سلسة 
و تقدروا في أي مكان تقرئوا ، حتى في الظلمة 
خصوصاً لو اضاءة الجهاز تسمح باضاءة خاصة بالظلام
بحيث انه العين ماتتأذى * زي جهاز الكندل حق آمازون *

و كمان في كتب كتير مجانية متوافرة أونلاين
كل الي تحتاجوه انكم تبحثوا عنها و تنزلوها عالجهاز وبس (:
و يصير لو عجبكم فعلاً ، ساعتها تشتروا الورقي
و بكدا تضمنوا انكم مارح تدفعوا فلوس على كتاب حيتركن بعدين

و في تطبيق اسمه المكتبة الجامعة
مرة جميل ، شيكوا عليه و كتبت عنه في الانستا قبل كدا

- - -

و تقريباً دا الي كان في بالي أشارككم هو

أتمنى تكونوا أستفدتوا

وسائل التواصل معايا في أعلى الصفحة عاليمين

ابقوا سُعداء

- بيانولا ~

1 comment:

  1. قراءة الكتب بالنسبة لي مزاجية ^ ^ "
    الحمدلله حددت لي عدد للكتب اللي حابه اقراها هذي السنة .

    و افضل النسخة الألكترونية اسهل بالنسبة لي و اخف من الكتاب العادي =)

    ReplyDelete