Sunday, May 3, 2015

تخصص إدارة الأعمال ، هل أنصح بيه؟



السلام عليكم

معظمكم عارف انه أنا أتخرجت من جامعة الملك عبدالعزيز الحمدلله 

و كلكم كنتوا متحمسين أقولكم عن تجربتي في التخصص و الجامعة ككل 

فـ بسم الله نبدأ

طبعاً في عبدالعزيز السنة التحضيرية إلزامية 
للي ماسبق لهم الدراسة الجامعية

بتاخدوا مواد عامة إما عربية أو انجليزية حسب قسمك * علمي - أدبي *

و في الترم التاني رح تدخلوا على نظام الطلبة الـ Odus Plus
و ترتبوا التخصصات الي حابينها

و هم حيختاروا لكم أول الرغبات لو معدلاتكم كانت متوافقة مع الشروط 

و كل سنة تتغير حسب شطارة الدفعة 

عموماً نجي لتخصصي 

إدارة أعمال عامة - كلية الاقتصاد و الادارة 

زمان كان ( مسار إدارة أعمال - تخصص كدا كدا كدا )

دحين كل قسم صار مستقل بنفسه و كدا أحسن بكتير طبعاً 

كلية الاقتصاد و الادارة فيها التخصصات دي بالاضافة لتخصصي 
( اقتصاد - مالية *تمويل* - محاسبة - نظم معلومات إدارية - تسويق -
موارد بشرية - إدارة عامة - علوم سياسية - إدارة مستشفيات )

على أيام دراستي كانت التخصصات للعلمي فقط ماعدا ( إدارة عامة )

و الدراسة طبعاً باللغة الانجليزية لطالبات العلمي

إدارة الأعمال ميزته انه يجمع لكم كل مواد التخصصات الباقية 

يعني هو الصورة العامة لكل شي: رح تدرسوا استثمار ،
 محاسبة ، مبادئ تسويق ، ادارة موارد .. إلخ 

و أنا أشوف دا شي مرة حلو لأنه يعطيكم
 نظرة شمولية عن المجالات التانية 

و الحلو كمان انه تقدري تقدمي على 
وظائف لواحد من التخصصات دي كمان 

فبالتالي المجالات الوظيفية مفتوحة عندك باذن الله ،
و تقدري تقدمي على مدارس و جامعات في الأقسام الإدارية 

الدراسة نفسها سهلة لو حبيتيها و عرفتي فين نقاط قوتك و ضعفك 

طبعاً أنا نقاط ضعفي كانت في المحاسبة و مايتبعها xD

أنا و الأرقام مانتفق أبداً ، فحاولت انه أركز على المواد التانية
الي ممكن أكسب فيها درجات أكتر 

و دا كان غلط شوية لأنه كان المفروض أقوي ضعفي و أحسنه ،
بس مرة ماكنت طايقة الموضوع لوول

بالنسبة لمستوى الانجليزي في التدريس فأنا أشوفه متوسط نسبياً

كل الي تحتاجوه انكم تعرفوا المصطلحات الادارية 

يعني زي الي يدرسوا طب مثلاً رح يحتاجوا مصطلحات طبية/لاتينية

احنا نفس الشي بس على فرع إداري 

في كلمات كتير رح تتكرر 
مثلاً
( Payroll - Administration - PLC - Management )

فلازم تكونوا عارفين انتوا اش بتقرئوا و تدرسوا عشان تحلوا 

ما أنصح بالحفظ المطلق لأنه مارح تعرفوا تطبقوا الي درستوه
في وظائفكم أو دراساتكم العليا  

فبالتالي رح تعطي صورة سيئة عن الجامعة و عن شخصك للي قدامك

كل مادة لازم يكون فيها عمل جماعي ( قروبات )
و يكون هو أساس درجاتكم بعد الاختبارات 

فلازم تتعودي على فكرة انك تشتغلي مع غيرك ،
و دا رح يهيئك للمستقبل الوظيفي ان شاء الله 

الدكاترة الي درسوني كانوا رائعين جداً الحمدلله و
ودودين طالما انتِ عاملتيهم بالشكل الي هم يبغوه 

لاتستحي انك تسأليها حاجة أو تطلبي مساعدتها في شي ، 
هي موجودة عشان تفهمك 

و لا تسمعي لكلام البنات الي حواليكي انه الدكاترة مستفزين
و يستقصدوا البنات و يدوروا الزلة و أسئلتهم صعبة و و و

كل واحد له نظرة في الانسان ونظرته دي هي انعكاس عنه هو 

و انتِ ماتعرفي هي اش سوت أو قالت عشان تستحق التصرف دا

فأبداً لاتسمعي لهم 

جربي بنفسك ، و ماعجبك أسلوب الأستاذة تقدري خلال أسبوعين 
انك تحذفي المادة أو تغيري الشعبة

يعني عادي ماهي نهاية العالم أبداً (:

و كتيرين من صاحباتي يشتكوا من الجامعة و أسلوب الموظفات و و و

صحيح أنا معاهم انه في كم موظفة تحسيها جاية غصباً عنها
و انك السبب في عدم راحتها  
بس لازم تستحملي عشان تاخدي الشغلة الي تبيها 
و ماحينفعك الكبرياء و العناد

لكن بالنسبالي الحمدلله الغالبية العظمى كانوا لطيفات
و ساعدوني في بداياتي و في تخرجي كمان 


بس الجامعة ككل فهي ممتازة و قوية و بتطلع أجيال ذكية و ناضجة
* هادي تكون مشتغلة على نفسها كمان و عندها طموح *

تقريباً هادا الي عندي بخصوص الموضوع 

ان شاء الله حكتب تدوينة عن ( مابعد التخرج ) 

أتمنى تكونوا أستفدتوا

وسائل التواصل معايا في أعلى الصفحة عاليمين

ابقوا سُعداء

- بيانولا ~

0 comments:

Post a Comment