Friday, May 8, 2015

مابعد التخرج ( الوظيفة ، البيت ، الدراسة ، المشروع )


السلام عليكم 

طالما انتِ هنا معناها مبروك التخرج ( الجامعي أو الثانوي ) 

خليني أسألك: 

اش ناوية بعد التخرج؟

تريحي سنة؟ تريحي 6 شهور؟ تبدئي تدوري شي يشغلك؟

عندك خيارات كتير ممكن تعمليها ، 
لكن المهم تسويها وانتِ مقتنعة و راضية كلياً 

شخصياً أشوف انه لو كملتي دراسات عليا 
سواء عامة أو خاصة فدا شي حلو 

و معناها انك حابة تتعلمي أكتر و حابة 
يكون عندك شهادة تخليكي مطلوبة في العمل

طبعاً الماجستير له شروط في التقديم
 و تختلف من تخصص لآخر 

فعشان تعرفيها لازم تدخلي لموقع الجامعة 
أو الكلية الي تبي تقدمي فيها و تقرئي 

-

هادي خطوة ، في خطوة تانية الي هي الوظيفة 


و الي كتيرين منكم يحلم بيها و أنا وحدة منكم 

شخصياً أشوف انه لو أتوظفتي على طول بعد تخرجك لمدة سنة
 أو سنتين و بعدها قدمتي عالماجستير 

و ان شاء الله تقدمي على وظيفة بعده ، 
كدا حيكون عندك حاجتين مهمة 

1- الخبرة
2- الشهادة 

-

الخطوة التالتة الي ممكن تسويها هي انك تنشئي عملك الخاص 


تفتحي محل لبيع المنتجات المستوردة ، 
محل لتزيين الحفلات ، حضانة للأطفال .. إلخ 

-


حددي أولوياتك و لو كنتِ محتارة سوي قائمة 
بايجابيات وسلبيات الأشياء و أستخيري 


طبعاً هنا رح أتكلم عن الوظيفة 

أنا بدأت أقدم على الوظائف في بداية شهر مارس 2015 ،
يعني بعد شهرين من تخرجي لأسباب شخصية 

لكن أنصحك بانك تقدمي أول ماتخلصي اختبارات نهائية
طالما ماعندك التزامات و حاجات أهم

اش الوظيفة الي تناسبني؟

حسب شهاداتك و مهاراتك 

لأنه مستحيل شهادتك في قسم الجغرافيا 
و تروحي تقدمي على وظيفة محاسب مالي 

و في اختبار الـ MBTI المعروف تقدري تاخديه
عشان تعرفي اش القطاعات الي ممكن تبدعي فيها
موجود ( هـنــا ) أو ( هــنــا )

فين تقدمي ؟

أول شي شوفي جامعتك ، 
دوري على الكليات و الأقسام التابعة لشهادتك

يمكن عندهم نقص في الموظفات و محتاجين خريجات جدد يعلموهم 

شيلي السي في حقك و أطلعي لهم 

غير كدا عندك المواقع الي تعرض لك وظائف شاغرة 

من أهمها ( موقع بيت ، جدارة ، ملتقى التوظيف

و تقدري كمان تدخلي على مواقع الشركات 
لو في شي محدد في بالك

مثلاً المركز الطبي الدولي ، دار الحكمة ، عفت ، كمال جمجوم ،
علي رضا ، عبداللطيف جميل ، بوبا ، الطبابة .. إلخ 

كل مكان تفكري فيه قدمي سيرتك الذاتية عندهم 

و أنصحك تحاولي تروحي لبعض الأماكن شخصياً 

لانه كتيرين مايعترفوا بالايميل أو مجرد الاتصال ، 
لازم يشوفوكي شخصياً ومعاكي الورق عشان يقتنعوا

بس حطي في بالك انه في محلات ماتقبل السير الذاتية يدوياً
يعني لازم بالايميل مو تجي وتسلمي 

ففي كدا و كدا 

و اسألي الي حواليكي سواء من الأقارب أو المعارف الموظفين 

خليهم يعطوكي ايميل الموارد البشرية عندهم
أو يسألوا عن شواغر أو ازا يعرفوا أحد في مكان تاني .. إلخ

لاتتوقعي انه لمن تحطي يدك على خدك الوظيفة حتجيكي طيران

رح تتعبي و تنكرفي الين تلاقي الوظيفة الي تناسبك 

أهم شي تكوني حاطة في بالك انه ربنا كاتبلك 
حاجة عظيمة و مستنياكي تلقيها 

رح أحط لكم ايميلات شركات عندهم شواغر مختلفة 
أبعتوا سيركم الذاتية باللغتين 
و ارفقوا نبذة مختصرة عنكم في الايميل 
و انه انتوا بتدوروا على وظيفة في القطاع الفلاني
أو انه انتوا مرنين لأي وظيفة موجودة 
* حسب رغبتك *

المركز الطبي الدولي
recruiter@imc.med.sa

مركز الطبابة
altababah@altababah.com

جامعة دار الحكمة
أو
966-12-6303333

تحويلة 124 / 385 / 806

جامعة عفت

 jobs@effatuniversity.edu.sa 

أو

 00966-12637447

تحويلة 3307 / 3306


بوبا للتأمين الطبي


الباقي عليكم ، دوروا على الشركات الي نفسكم تشتغلوا عندهم 
و أرسلوا لهم ، و بالتوفيق 

لاتنسي انه ربنا حيسألنا عن الوقت و العمر الي بنقضيه في الدنيا
فحاولي قد ماتقدري انك تستفيدي منه 
و ان شاء الله ربنا حيباركلك و يسهلك أمرك

وسائل التواصل معايا في أعلى الصفحة عاليمين

ابقوا سُعداء

- بيانولا ~

3 comments:

  1. تدوينة جميلة ربي ييسر لك أمورك

    ReplyDelete
  2. الله يعطيكي العافية بيانو :* عالموضوع الكامل والمميز والي كثير مننا بحاجة له وزي ماقلتي لازم الواحد يعرف ايش يبغا ويبحث عنو ويعرف كيف يوصلو,, ولا بتلاقي الاغلب بيقول مافي وظايف ومافي شغل , احنا الي مانبا نشتغل وندور مزبوط

    ReplyDelete
  3. بس حابه انبه ان من الحكمة ان الوحده تتوظف بعدين تكمل دراستها ، هذا اذا هدفها انها تشتغل في مكان عمل مرموق ؛ الشركة حتى لو عندك شهادات عالية و انت ما عندك تجربة او خبرة عملية في الشركات ما راح تستفيدين ، بصير حالك حال الي توها متخرجة من الجامعة
    الي عندها اهداف ثانية مثل فتح شركتها الخاصة و دراسة الماجستير هي لتطويرها الشخصي فاكيد بتستفيد
    و عقبال قبولك بالمكان الي يسرك بيان
    و الله يبارك فيك ههههههههههه

    ReplyDelete