Saturday, October 10, 2015

منتجات ذا بودي شوب الجديدة ( السبا + النضارة )


السلام عليكم

من فترة وريتكم منتجات ذا بودي شوب الجديدة عالسناب والانستقرام 
ودحين حعطيكم تقييمات سريعة عاللي جربته
لاني أخرت التدوينة كتير 
وحستنى انطباعاتكم لو جربتوا شي منها

يلا بسم الله

بودي شوب قاعدة تغير المفهوم حق الماركة حقتهم
و يبوا يكونوا Premium Brand يعني ماركة مرتبة وفخمة وحركات :p

فقاعدين يجددوا التعليب حق منتجاتهم و كدا 

و بالنسبة لمنتجات السبا والعناية فنازل منها 3 خطوط مختلفة

الأصفر -> رفاهية
البنفسجي -> استرخاء
الأزرق -> انتعاش



المقشر الأفريقي دا موجود من قبل بس في علبة شفافة كان لو فاكرين
و سعره حوالي 119 ريال.

من زمان مجربته و ماعجبني شخصياً ، مرة ناعم ومايقشر كويس
بس يعطي ريحة لطيفة


كريم مخملي مرطب بزهرة الكاميليا اليابانية ،
مرة حلو ملمسه كانه لمن تخلطوا بياض بيض بقوة
 ويصير كانه رغوة متماسكة *تشبيهي مرة فنان أدري بس كدا منظوري*

الريحة زهرية و مرة رايقة وأحياناً أخلطه مع الزيت 
الي حتكلم عنه بعد شوية 
ويثبت بشكل مرة ممتاز وريحته فواحة 


قناع فحمي للجسم 
تستعملي بعد المقشر تحطيه زي الكريم وتسيييه 10 دقايق بعدين تغسليه
المفروض يعطيكي صفاء و نظافة
شخصياً ماحسيته يسوي شي غير انه يعدم الحمام xD


كريم مرطب للجسم ببذرة الكوكوي 
قوامه أقرب لزبدة الجسم ، حلو بس أحس ريحته أقوى من التاني 


زيت للشعر والجسم 
أستعمله على أطراف شعري بعد الاستحمام وعلى جسمي مع الكريم الي فوق 

ريحته مرة حلوة و فعلاً يرطب منجد
بس لاتكتروه عالشعر ولا حيصير منظره وحش ومزيت 

المجموعة التانية الي هو خط العناية و النضارة

فكرته انه يؤخر علامات سن التقدم و يجدد خلايا البشرة

بصراحة ماجربت شي منه لسى لانه ماشية على روتين من الدكتور ومابى أخبصه 


موية للوجه ، نفس فكرة التونر بس بدون الكحول والأشياء 
الي تنشف الوجه وتتعبه
المفروض يعطي نضارة و يشيل الشوائب 


كريم مرطب للوجه للبشرة العادية أو الجافة


كريم مرطب بس قوامه زي الجِل للبشرات الدهنية


زيت للوجه ، يصفي الوجه ويشيل آثار التعب ويخفف التجاعيد


آداة لمساج الوجه و الرقبة

تمرري الكورتين على وجهك ورقبتك 
على فوق طبعاً
يشد البشرة بعد الاستمرارية في الاستعمال ويبرد الوجه

ماني ملاقية ملف الأسعار أعتذر 
لمن ألاقيه رح أحدث البوست ان شاء الله

وسائل التواصل معايا في أعلى الصفحة عاليمين

و أستنى آرائكم 

ابقوا سُعداء

- بيانولا ~

2 comments:

  1. حلو اعطيتيني فكرة قبل م اشتري كنت ناويه اخذ المجموعة كلها وماقد لقيت ريفيو كامل عنهم
    اشكرك :$

    ReplyDelete
  2. ما شاء الله عليهم فعلا شغالين على اشكال العبوات
    شكلها جدا يلفت ، ودك تصفيفها عندك حتى لو ماهي ذاك الزود .. عارفين لنا
    كنت ناوية اشتري كل المجموعة بس بعد ريفيوك مبين ان مو كل شي حلو و يسوى
    يعطيك العافية بيانو ()*

    ReplyDelete