Saturday, January 30, 2016

منتجاتي المفضلة في 2015



السلام عليكم

أتوقع كل الناس نزلت دا البوست من 1 يناير إلا أنا xD

بس ماعلينا بالوقت المهم انه ينزل 

بس تنبيه ، 
كل السواتشات أخدتها أونلاين مش أنا الي صورتهم

Disclaimer: 
All swatches are taken online

يلا بسم الله

برايمر Prep and Prime من ماك 


ماله لون لمن ينحط عالبشرة ، 
يعطي ترطيب و نعومة للوجه و يثبت المكياج 

فيله لمعة بس عالوجه ماتبان بالنسبالي 

و يقعد معاكِ لانه ماتحتاجي الا ضغطة ونص منه 

أساس Nars - Sheer Glow



كتبت تدوينة عنه ( هـنـا

درجتي Punjab 


بي بي كريم من L.A Girl



أخدته من موقع Drugstore يعطي تغطية توصل إلى متوسطة
و يقعد ثابت حق 8 ساعات 
وماينشف الوجه ويعطي لوك ديوي شوية 3>
هو من نوعية الأشياء الي تبين كانه وجهك لكن أحسن
( Your skin but better )

في فيديو عاليوتيوب موضح الدرجات لو حابين تشوفوها ( هـنـا )

كونسيلر Nars - Creamy Radiant 



تغطيته عالية و أحسه يقلب على بودرة شوية خصوصاً انه
مو سائل كلياً زي حق أوربان مثلاً
يخطط لو قربتيه من أسفل العين بس مع بودرة يمشي حاله


بودرة بينيفت The Porefessional 



بودرة شفافة للدهون ، أستعملها تحت العين و عالأنف 
فتمنع المناطق الدهنية من انها تعدم لك المكياج 
بس التعليب لاحظت انه يتعبني جداً لمن أكون في سيارة ولا مكان عام 
كأني أسوي خلطة xD

برونزر Elf الـ Mineral 



يعطي دفء للوجه خصوصاً لو الأساس كان فاتح عليكِ شوية 
بس ماحسه يثبت كتير ، ولاحظت الشي دا على
 كل البرونزرات الي جربتها تقريباً

بلاشر The Balm - Downboy




أحس قد ما أحفر فيه ماني قادرة أوصل للقاع :p

لونه وردي صارخ في العلبة بس لمن تحطيه على الخدود 
يبان خفيف وطبيعي 
ويثبت معايا أكتر من 8 ساعات ، 
أحياناً الأساس يروح وهو يقعد ماشاء الله 




برايمر العين من ريفلون



يوحد لون الجفن و يساعد في ثبات الظل 

باليت سيفورا للظلال




بصراحة ماعرف ازا هي تنباع ولا كانت ليميتد اديشن
أتزكر جاتني هدية 
مافيها شي مميز هي كلها ألوان ترابية 
بس عشان علبتها صغيرة ونحيفة فأقدر أشيلها معايا وماتتعبني 

ظل Givenchy الكريمي 




لونه وردي باهت ، مرة أحبه لمن ماليا  نفس أسوي شي 
بس أحطه على كل الجفن و أمشي 
و أحسه من نوعية الظلال الكريمية الي تتحول لبودرة لمن تحطيها عالجفن


آيلاينر L'oreal الرفيع



جداً جميل للناس الي ماهي مرة فنانة في الايلاينر زيي 
فرشاته رفيعة بس في نفس الوقت قاسية شوية
 فيصير ماتتحرك يمين يسار معاكِ
زي ماتمشيها هي تمشي 
مشكلته ماهو مرة ثابت ، مع الوقت يخف السواد شوية

روج Kat Von D - Lolita السائل



من أكتر الدرجات الي تخلص بسرعة 
من حظي الحمدلله ديك الأيام أخدت آخر حبة منه 

اللون لحمي غامق شوية فيبان جميل جداً على البشرة
خصوصاً لو تبي شي رايق حق كل يوم 
أو ازا مسوية مكياج تقيل في العين فهادا يعمل موازنة 


كدا تقريباً خلصنا (: 

وسائل التواصل معايا في أعلى الصفحة عاليمين

ابقوا سُعداء

- بيانولا ~

0 comments:

Post a Comment