Tuesday, January 26, 2016

اجتياز المقابلة الشخصية .. نصائح و خدع ~



السلام عليكم 

سبب كتابتي للتدوينة دي انه أنا سويت مقابلات شخصية
لأشخاص كثيرين خلال الفترة الأخيرة 

و لاحظت انه في أشياء هي الي تخلينا نغض النظر عن شخص معين

فحبيت أشارككم النقاط دي وحقولكم على كتاب يساعدكم في الأخير

يلا بسم الله

1) ماقبل المقابلة 


- اعرفوا معلومات عن الشركة الي حتعملوا عندهم المقابلة
اقروا عن تاريخها ، نطاق خبرتها ، متى تأسست ، على يد مين ؟

- اتأكدوا انكم تعرفوا المكان قبل ماتروحوا عشان لاتتأخروا

- استرجعوا الأشياء الي درستوها أو أشتغلتوها قبل كدا

- جهزوا أسئلة تسألوهم هي في آخر المقابلة

( اش مهام الوظيفية للمنصب دا ؟ اش الصفات الي أحتاجها
أو بتدوروا لها لاتقان الوظيفة دي؟ 
اش هو متوسط الرواتب للوظيفة دي؟
هل أحتاج خبرات معينة عشان أنجح فيها؟ 
اش الضغوطات الي ممكن تواجهني فيها؟)

اسألوا بذكاء ..
لأنه لمن تقولوا ( كم الراتب؟ الوظيفة فيها كرف؟
الوظيفة فيها شغل كتير؟ )
هادا كله يبين انكم مو جديين تجاه الوظيفة دي
 وبتدوروا على الراحة والفلوس

- اقرأوا عن الأسئلة الي ممكن تنسأل لكم في المقابلة 
( رح نتكلم فيها قدام شوية )

- جهزوا لبس العيد :p

بمعنى انه الهيئة لازم تكون مرتبة 
سواء عباية نظيفة أو ثوب مكوي مع شماغ أو شعر محلوق 

ولاتكونوا أوفر في الشكل: أظافر تركيبة ، مناكير أو مكياج صارخ ،
زمام أو حلق شفة ، ثوب مزخرف ملون ، شعر سبايكي .. إلخ

و خلوا الجوال سايلنت وفي الشنطة/الجيب

- حدِّثوا السيرة الذاتية و خدوا منها نسخة 

- وسعوا آفاقكم في المصطلحات بحسب الوظيفة

مثلا موارد بشرية يعني توظيف ، استقطاب كوادر ، أجور و بدلات .. إلخ 

2) أثناء المقابلة


أكتر سؤال شائع هو ( كلمنا عن نفسك )
فبالعادة تلخص دراساتك وخبراتك المهنية لو عندك 

و مهاراتك اللغوية أو العملية ( الانجليزية ، سرعة الانجاز ، 
تحمل الضغوطات ،
 حب التعامل مع الناس ، سرعة الكتابة .. إلخ )

( ليش تبى تشتغل معانا ؟ )
الجواب الخاطئ هنا هو: والله سمعت انكم شركة معروفة وناجحة
 ورواتبكم عالية بس ماعرف شي عن الشركة 
1- واضح انك تسعى للمال 
2- مانت متجهز للمقابلة ومانت عارف الا اسم الشركة

الجواب الصح: انك تسرد انجازات الشركة و انك تبى تكون
جزء من الانجازات هادي وانك تبى تعطي كل الي عندك 
عشان تثبت وجودك .. الخ 

الأجوبة الصح تتلخص في اختيار الكلمات 

- كونوا واثقين من أنفسكم 

لاتخلوا رهبة المقابلة ترعبكم .. ترى هم الي يحتاجوكم مو العكس 
و اعتبروها محادثة ودية بينكم وبين شخص تعرفوه 

- نقاط قوتك و ضعفك 

من الأسئلة الشائعة برضوا ، و جداً غلط تقولوا ماعرف
 أو ماشوف فيا عيوب أو ماقدر أحكم على نفسي
كل انسان على نفسه بصيرة ، اجلسوا كدا و فكروا مع نفسكم
 أو اسألوا المقربين لكم وسجلوا النقاط الي يقولوها

و حاولوا لمن تتكلموا عن نقاط الضعف ، لاتسردوا الي تكون في صلب العمل

يعني مثلا ماتقول والله من نقاط ضعفي اني غير ملتزم بالوقت والمواعيد
هادا على طول اكس كبيييير 

وبرضوا ماتسردوا نقاط القوة على انها نقاط ضعف
زي مثلا والله مشكلتي اني أمين بزيادة أو مشكلتي اني أحب العمل الكامل التام

دا كله بكش واحنا عارفين xD

- أسهبوا في الحديث
يعني لو مثلا سألوك فين درست؟
ماتقول اسم المكان وخلاص
اتكلم عن التخصص ، المواد ، اش أكتر مادة عجبتك .. الخ

3) مابعد المقابلة 


أنتظر رد من الشركة خلال 7 أيام عمل ،
في حال لم يتم الرد بأي وسيلة ( سواء ايميل أو اتصال )
ممكن تتصل من باب الاستفسار و مراجعة حالة طلبك 
مررة وححححدة بس
بعد كدا لاعاد تتصل لأنه يارفض يا انه موضوعك معلق
في كلتا الحالتين لاتستنى
كمل وشوف مكان تاني

في حال تم القبول ، احرصوا انكم تخلصوا متطلبات التوظيف
بأسرع وقت وتكونوا متعاونين مع الموظفين

بالنسبة للكتاب الي قلتلكم عليه في البداية
أخدته من مكتبة جرير


ان شاء الله يفيدكم والله يوفقكم 

وسائل التواصل معايا موجودة يمين الصفحة 
@Bayanola92

ابقوا سُعداء

- بيانولا ~

1 comment:

  1. حقيقة قرأت مواضيع كثيرة عن كيفيه اجتياز المقابلة الشخصية، لكن كلامك هنا مييز ومفيد ماشالله ���� اديتينا افكار ونقاط مهمة ، رائع شكراً بيان وبالتوفيققق،❤️ وعقبالنا بالوظايف ����

    ReplyDelete