Friday, April 22, 2016

كتابة السيرة الذاتية



السلام عليكم

من فترة في سناب نزلتلكم شوية نقاط عن كتابة السيرة الذاتية 
و أتحمستوا معاها

فقررت أسوي تدوينة مفصلة عن الموضوع

بدايةً نختار الـ Template أو النمط الي رح نسوي السيرة الذاتية عليه 

في أشكال مختلفة وهادي بعض منها 


وتقدروا تبحثوا في قوقل ( CV Template ) 

بالنسبة للغة السيرة الذاتية ، يفضل جداً انها تكون باللغة الانجليزية 
خصوصاً لو حتقدموا في مؤسسات كبيرة 
لانه حطوا في بالكم في موظفين مايقرئوا العربية 
فلمن يشوفوا السي في بالعربي رح يهملوه 

فـ يا انكم تسووه باللغتين أو بالانجليزية بس 

طيب حقولكم أهم النقاط الي تنكتب في السيرة الذاتية 

1) المعلومات الشخصية 
- الاسم
- تاريخ الميلاد 
- الجنس

- الجنسية <- جداً جداً جداً مهم 
و في حال كان الشخص غير سعودي لكن الأم
أوالزوج/الزوجة سعوديين لازم تنذكر النقطة دي
لانه كدا الشخص يُعامل معاملة السعوديين

- الهاتف المتنقل 
- البريد الالكتروني

2) الشهادات أو الخبرات الدراسية 

نبدأ من الأحدث للأقدم بالصيغة دي 

بكالوريوس ادارة أعمال عامة ، جامعة الملك عبدالعزيز ، 2011-2015 
و ممكن تكتبوا المعدل ماهي مشكلة ( 5/5 .. 4.5/5 .. إلخ ) 

ثانوية عامة ، المدرسة الـ .. 2008-2010 ، 98%

لو شهاداتكم جامعية أو ثانوية تكتفوا بذكر الاثنين فقط 
بينما لو أقل أو ثانوية فقط، فتذكروا الأحدث
ولو دراسات عليا فهي أول وبعدها البكالوريوس و خلاص

-- 

طيب لو كنتوا لسى تدرسوا ؟

جامعة الملك عبدالعزيز، تخصص ادارة أعمال عامة، 2015-2019 
أو تكتبوا بدل التواريخ ( قيد الدراسة )
( مستمر بالدراسة ) ( التخرج 2019 )

--

3) الخبرات العملية ( إن وجدت )

لو أشتغلتوا قبل كدا أو أتدربتوا بشهادة من مكان ، تنذكر هنا 
برضوا تترتب من الأحدث للأقدم

المسمى الوظيفي، المكان، تاريخ البدء والانتهاء

مثلا: مساعد اداري، مؤسسة الكعكي للضيافة،
سبتمبر 2015 - على رأس العمل 

أو: مسئولة مبيعات، مؤسسة كمال عثمان جمجوم،
أبريل 2012- مايو 2015 

فلو مثلا كنتِ بائعة في معرض أو مسئولة معرض ، 
اذكري اسم صاحب المعرض لاتذكري اسم المحل ( سيفورا ، زارا .. إلخ )

وممكن تحت كل وظيفة تذكروا المهام الوظيفية حقتكم بشكل مختصر

--

4) المهارات 

تكتبوا الأشياء الي تشوفوا نفسكم مبدعين فيها أو أشياء تميزكم في العمل 

- القدرة على تحمل الضغط 
- حب العمل كفريق

- اجادة استعمال برامج الحاسب الآلي
 ( Microsoft Office - Oracle - AutoCAD ) 
* المايكروسوفت أوفيس يضم الوورد و الاكسل والاوتلوك .. إلخ *

- امكانية التحدث أمام الجمهور
- اجادة اللغة الانجليزية تحدثاً وكتابة 

--

5) اللغات 
مبتدئ / متوسط / متقدم 

اللغة العربية -> اللغة الأم
اللغة الانجليزية -> متقدم 
اللغة الفرنسية -> مبتدئ 

--

6) الدورات التدريبية 

لاتكتبوا كل دورة أخدتوها في حياتكم ،
 لانه كتير منها مالها علاقة بالعمل بشكل مباشر
مثلا حقت تطوير الذات و لا تحليل الخط و لا الحياة الزوجية 

اذكروا الدورات المهمة والي اخدتوا عليها 
شهادات فعلية مو شهادة حضور 
مثلا دورة تدريب مدربين - دورة موارد بشرية -
دورة التعامل مع أطفال التوحد - دورة تدريس الأطفال .. إلخ

و برضوا ترتبوها من الأحدث للأقدم

--

7) المراجع

هادولا الأشخاص الي الشركة تتصل عليهم عشان تسأل عن الشخص 

فإما انكم تحطوا أرقام ناس درسوكم ، دربوكم ،
اشتغلتوا عندهم بس لازم تاخدوا موافقتهم أول
أو تكتبوا ( متوفرة عند الطلب ) 

أبداً لاتحطوا رقم أصدقاء أو أحد من العيلة ، ماهو احترافي أبداً 

و بكدا خلصنا الأساسيات الي لازم تنكتب في السيرة الذاتية 

حكتب لكم نقاط تتجنبوها في السيرة الذاتية

- الهوايات 
أبداً ماهي مهمة 
كلنا عارفين اننا مارح نوظف فلان عشان كاتب انه هوايته القراءة
و لا جمع الأسلحة و لا لعب المونوبولي xD 

- المهارات VS الهوايات

في ناس تلخبط بين الاتنين هادولا 

فمثلا تكتب في المهارات: قراءة ماهو جديد في مجال تخصصي -
 تعلم حرف جديدة - قراءة الكتب 

هادي كلها هوايات و أشياء تسويها وقت فراغك ،
 لكن مارح تميزك عن غيرك في العمل 

- اللغات 

حددوا مستواكم بكل صراحة في اللغات ، ماهو عيب أبداً 
لكن لاتكتبوا انه مستواكم متقدم بينما انه مستواكم الفعلي مبتدئ 
لانه لمن تسووا المقابلة رح تنسألوا عن النقطة دي 
و حتكون بصمة سيئة لكم 

- البهرجة في السيرة الذاتية 

السيرة الذاتية هي ملخصك الاحترافي 
لازم تكون مرتبة ومنمقة بحيث انكم تستعملوا الألوان الأساسية
وتبعدوا عن الفوشي، الأصفر..إلخ 

ماهي مشكلة تكون ملونة لكن تعتمدوا لون واحد مريح للعين

ولاتحطوا سمايلي فيسز ولا ورود (":

- لاتكبروا الخط

لو كنتوا خريجين جدد وماعندكم خبرات 
فماهي مشكلة لو السي في كان بسيط
لاتكبروا الخط عشان يبان انه الكلام كتير 

- في ناس تكتب الوظائف الي هي حابتها في الأخير 
ودا شي جيد ، لانه بيوفر العناء على الشركات في البحث 
بس ما أؤيدها عشان لاتحكروا أنفسكم في نطاق معين
 و تضيعوا فرص تانية عليكم

و بكدا أكون خلصت الي عندي
ان شاء الله تكونوا أستفدتوا 

سيبوا لي تعليقاتكم و آرائكم أسفل لانها تسعدني 

ابقوا سُعداء

- بيانولا ~

4 comments:

  1. ربي يسسسعدك و يوفقك على شرحك الجميل و المبسسط
    جزاك الله خير

    ReplyDelete
    Replies
    1. امين يارب اجمعين وبالتوفيق ان شاءا لله

      Delete
  2. يعطيك العافيةة بيان
    جد استفدت من كلامك و طبقته ع السي في تبعي
    الله يكتب اللي فيه الخير

    ReplyDelete
    Replies
    1. الله يعافيكي عزيزتي والله يوفقك ويسهلك امرك

      Delete