Tuesday, April 12, 2016

منتجات خلصتها Product Empties

السلام عليكم

من زمان مانزلت بوست Empties 

ليا فترة مخزنة صور لمنتجات خلصتها 
و كمان دحين عندي منتجات تانية 

فقلت خلاص لازم أنزلها 

فـ يلا بسم الله

* أعتذر على الصور الي بدون نفس/مستعجلة شوية لول *

مزيل كلينيك للعين و الفم 



أتوقع تاني علبة أخلصها ، مرة أحبه لأنه زيتي
 و مايحسس العين و يشيل المكياج بضمير 
بس يمكن الي جفنها دهني تنزعج منه 
حشتريه تاني لمن أحتاجه

مزيل نيتروجينا للعين  



برضوا مزيل زيتي و ممكن يكون بديل أرخص لحق كلينيك 
بس ماعرف ازا يتباع عندنا أو لاء
حشتريه تاني لو لقيته ان شاء الله

زبدة بودي شوب لإزالة المكياج


أول ماتحطيها على وجهك وتفركي ،
 تلاقي انه المكياج حقك ساح و أتفكك 
برضوا ماتسبب حساسية الحمدلله 
بس طبعاً لازم تستعملي غسولك بعدها 
و أوريدي اشتريت تانية منها :p

مزيل المكياج الزيتي من بودي شوب 



نفس تأثير الي فوق بس علبته تلغوص ، 
الزيت يتكبكب من لحاله 
و وفاء تقول بديل رخيص لمزيل ماك بس مدري

كريم نيفيا للعين لمعالجة التجاعيد والسواد



هاديك الأيام كان عندي شوية خطوط تحت العين 
لاني كسلت في الترطيب
فلمن صرت مداومة عليه شفت نتيجة حمدلله 

كريم نيفيا للوجه والجسم 



مرة حبيته و دي تاني علبة أخلصها ،
 ترطيبه خفيف ومافيله عطور أو مواد تهيج 

كريم اليد من بودي شوب بالمورينقا




ريحته زي ورد الفل وينحط معاكي في الشنطة لكل وقت
مافيله شي مميز فمارح أشتريه تاني

عطر بودي شوب Forbidden Flower



من عطوري المفضلة عندهم 
ريحته غموض على اثارة على شي فنان xD 
مررة ماعرف أوصف روايح 
بس فيله ورود و بهارات ، 
لازم تشموه عشان تفهموا احساسي

مرطب الشفاه من بنيفت



على أساس انه يرطب ويعطي لون خفيف ، 
أنا بس لاحظت الترطيب 
وعجبني خصوصا وقت المكياج
بس أي نوع مرطب تاني حيسوي نفس الشي 
فمايحوجني أدفع 70 أو 90 ريال فيه 

معقم من باث اند بدي وركس 



ريحته حلاوة قوية 
كل ما أحط منه لازم أحد يسألني
 اش العطر الي حطيتيه xD

عطر بودي شوب Red Musk Oud



هادا كنت أستعمله بهدرة في رمضان 
ومسكت معايا كل ماشمه كأني دخلت جو رمضان xD
لو منها الين رمضان الجي مانزلوا شي جديد
غالباً حشتريه ان شاء الله 

بي بي كريم من LA Girl



هادا كان صاحبي في الحل والترحال 
تغطيته من خفيفة لمتوسطة ويعطي ديوي لوك
ويقعد ثابت 8 ساعات تقريباً
اشتريته أونلاين ومدري ازا حشتريه تاني 
لأنه ماحب أكرر الأساسات عادة
بس نشوف

غسول الفم من بارودونتكس



البراند هادي الدكتور قالي جيدة للثة الملتهبة 
فصرت أعلق عليه ولاحظت فايدة حمدلله مع اني ماحب طعمه xD

كريم بيبانثين للترطيب



ماخلص كلياً بس أبى أقولكم عليه
مرة ممتاز لمن وجهك يكون متهيج أو محمر من بعد ازالة الشعر 
ومايحسس البشرة 

و بس كدا خلصنا

قولوا لي اش المنتج الي دايماُ تشتروه كل مايخلص؟

وسائل التواصل معايا في أعلى الصفحة عاليمين 

ابقوا سُعداء

- بيانولا ~

1 comment:

  1. مرطب لابيلو بالكرز كل ماينتهي لازم اشتري ❤️❤️❤️


    شكرا استفدت كتير 🌹

    ReplyDelete