Monday, June 13, 2016

YSL Tribute Sandals Unboxing | Farfetch




السلام عليكم

من فترة نزلت لكم على السناب لشحنة وصلتني و كنت متحمسالها من زمان

الشحنة كانت من موقع Farfetch وميزة الموقع
انه يوفر ماركات كتير ويوصل دايركت للسعودية

و دحين فترة تخفيضات فمرة حبيت أستغل الفرصة
 خصوصاً انه في فرق كبير في الأسعار

و في قطع كتير أرخص بكتير من عندنا بالمحلات وبعضها
صعب تلاقيها لانها تخلص بسرعة عندنا

بس أنا مع الأسف شحنت المنتج لبريدي الامريكي بعدين على جدة.

رح أحكيكم الهرجة بالتفصيل والي رح تفيدكم 
لمن تدوروا على منتج معين

في البداية كنت أتسوق بالشحن للسعودية و لقيت المنتج
الي عجبني ولمن جيت أختار المقاس
كان مكتوب انه مو متوفر غير في بوتيك في ايطاليا
ومايوصل للسعودية

و في لون تاني كان من بوتيك في ايطاليا برضوا
لكن الشحن يكلف 800 ريال زيادة على سعر المنتج
* ماني فاكرة دا برضوا فارفتش ولا موقع تاني *

طبعاً مرة بطلت من الموضوع وقلت خليني أحول عالشحن
 لأمريكا يمكن حيفرق و فعلاً فرق معايا

لقيت المنتج من نفس بوتيك ايطاليا بس الشحن مجاني!

( فهادي حركة حلوة ممكن تجربوها 
قبل ماتطلبوا أي حاجة أونلاين )

طلبته على طول وعبيت بياناتي ووصلتني الشحنة
خلال 4 أو 5 أيام عمل تقريباً

ومن بعدها شحنته على جدة عن طريق شركة WorldShip
و أتكلمت قبل كدا عن المواقع الي توفرلكم بريد أمريكي

تقدروا تشيكوا على التدوينة من ( هــنــا )

المهم وبدون ما أطول عليكم أكتر من كدا ، هادا الي طلبته D:



Saint Laurent Tribute Sandals 
in Antique Pink Leather

جات فترة طفشتكم في السناب شات بكعب سالوران 
وكان صعب اني ألاقي ألوان حلوة عندنا وقت التخفيض
والحمدلله ربنا سهل لي الأونلاين
و أستخرت فيها قبل ما أطلبها





أكتر شي عجبني في الكعب انه مرة مريح ماشاء الله 
ويعطي شكل حلو للجسم واللبس 

وجا معاه دست باق عشان تحمي كل فردة فيله من الجو والغبرة

سالوران متوفرة في مواقع كتير مو بس فارفتش
فخلوا عيونكم على كل المواقع عشان تلحقوا التخفيضات 
و الأشياء الحصرية

الكعب حقي أخدته بـ 693 دولار 
و دحين لقيت سعره نازل وصار 686 دولار

ان شاء الله تكون عجبتكم التدوينة 
أستنى آرائكم و اقتراحاتكم في صندوق التعليقات أسفل

تابعوني على الانستقرام والسناب شات على Bayanola92

و شكراً لبنان لانها صورت لي 
انستقرامها @banansindi

ابقوا سُعداء ~

2 comments:

  1. مره حبيييت اللون عليكي ماشاءالله
    و من جد تجربتك اضافت لي معلومات كنت اجهلها عن فرق السعر بالشحن
    تتهني يارب بالشوز
    XOXO

    ReplyDelete
  2. حبيت راقي ورايق بالعافيه وننتظر جديدك :)

    ReplyDelete